އެމެރިކާގެ ނޫހެއް ކަމުގައިވާ ވޯލް ސްޓްރީޓް ޖާނަލްގެ ރިޕޯޓަރ އީވާން ގާރސްކޮވިޗް، ޖާސޫސް ކުރުމުގެ ތުހުމަތުގައި ރަޝިއާގައި ހައްޔަރު ކޮށްފިއެވެ. އުމުރުން 31 އަހަރުގެ ނޫސްވެރިޔާ މިއަދު ހައްޔަރު ކުރުމަށްފަހު ރަޝިއާގެ ކޯޓަކަށް ހާޒިރުކޮށް، އޭނާ ބަންދުގައި ބެހެއްޓުމަށް ކޯޓުން މިހާރުވަނީ އަމުރު ކޮށްފައެވެ.
ބައިނަލްއަގުވާމީ މީޑިއާތަކުން ރިޕޯޓު ކޮށްފައިވާ ގޮތުގައި، ސިއްރު އަޑުއެހުމެއްގެ ގޮތުގައި ކުރިޔަށްދިޔަ އޭނާގެ ބަންދުގެ ޝަރީއަތުގައި އީވާން ގާރސްކޮވިޗް ވަނީ އޭނާގެ މައްޗަށް ރަޝިއާގެ ސަރުކާރުން ކޮށްފައިވާ ޖާސޫސް ކުރުމުގެ ތުހުމަތަށް އިންކާރު ކޮށްފައެވެ.
ކޯޓުން އަމުރު ކޮށްފައިވަނީ، އީވާން ގާރސްކޮވިޗް މައްޗަށް ކުރެވޭ ތުހުމަތުތަކުގެ ތަހުގީގަށް އޭނާ ދެމަސް ދުވަހަށް ބަންދު ކޮށްފައި ބެހެއްޓުމަށެވެ.
މީޑިއާތަކުން ރިޕޯޓު ކޮށްފައިވާ ގޮތުގައި އީވާން ގާރސްކޮވިޗް ފާއިތުވި 6 އަހަރު ދިރުއުޅެފައިވަނީ ރަޝިއާގައެވެ. އަދި ހައްޔަރު ކުރިއިރު އީވާން ގާރސްކޮވިޗް ގެންދިޔައީ، ޔޫކުރެއިން ހަނގުރާމާގައި ރަޝިއާގެ އަސްކަރިއްޔާއާއެކު ހަނގުރާމަކުރަމުންދާ ކުލީ ސިފައިންގެ ޖަމާތެއް ކަމުގައިވާ ވަގްނަރ ގުރޫޕުން ހަނގުރާމާގައި އަދާކުރަމުންދާ ދައުރާ ގުޅޭގޮތުން، ޔެކަޓެރިންބާގް ރީޖަންގައި މައުލޫމާތު އެއްކުރަމުންނެވެ.
އީވާން ގާރސްކޮވިޗްއަކީ ވޯލް ސްޓްރީޓް ޖާނަލްގެ ރަޝިއާ ރިޕޯޓަރެއްގެ ގޮތުގައި މަސައްކަތް ކުރަމުންދިޔަ ވަރަށް ތަޖުރިބާކާރު ނޫސްވެރިއެކެވެ. އަދި އޭނާއަކީ ވަރަށް ރަޝިއާ ބަހުން ވާހަކަ ދަންނަ މީހެއްވެސް މެއެވެ.
އޭނާ ހައްޔަރު ކުރުމާއި ގުޅިގެން ވޯލް ސްޓްރީޓް ޖާނަލްއިން ބުނެފައިވަނީ، އީވާން ގާރސްކޮވިޗްގެ ސަލާމަތާމެދު ވަރަށް ބޮޑަށް ކަންބޮޑުވާ ކަމަށާއި، އޭނާއާމެދު ކޮށްފައިވަނީ ދޮގު ތުހުމަތުތަކެއް ކަމުގައެވެ.
ރަޝިއާއިން ބުނެފައިވަނީ ރިޕޯޓަރު ހައްޔަރު ކޮށްފައިވަނީ ޖާސޫސް ކުރަމުން ދަނިކޮށް "ރެޑް ހޭންޑް"ކޮށް ކަމުގައެވެ. އަދި އޭނާ މަސައްކަތް ކުރަމުން ގޮސްފައިވަނީ އެމެރިކާ ސަރުކާރުގެ އެންގުމަށް، ރަޝިއާގެ ދައުލަތުގެ ސިއްރުތައް ހޯދުމަށް ކަމަށްވެސް ރަޝިއާގެ ޖާސޫސީ އިދާރާއިން ބުނެފައި ވެއެވެ.
