އިރާނުގެ އެންމެ އިސް ނިއުކްލިއަރ ސައްިންޓިސްޓު މިހަފްތާގެ ހުކުރުދުވަހު މަރާލި މަރާލުމުގެ ބަދަލު ހިތިގޮތަކަށް ހިފާނެ ކަމުގެ އިންޒާރު އިރާނުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއި ދެއްވައިފިއެވެ. އަދި ޚާމަނާއި ވަނީ، ނިއުކްލިއަރ ސައިންޓިސްޓް މަރާލި ކަމުގައިވި ނަމަވެސް، އިރާނުގެ ސައިންޓިފިކް އަދި ނިއުކްރިއަރ ޕްރޮގްރާމް ހުއްޓުމެއްނެތި ކުރިޔަށް ދާނެކަމުގައިވެސް ވިދާޅުވެފައެވެ.
އިރާނުން ތުހުމަތު ކުރާގޮތުގައި މުޙުސިން ފަހްރިޒާދެ ބަޑިން ހަމަލާދީ މަރާލާފައިވަނީ އިޒްރޭލުންނެވެ.
އިރާނުގެ ނިއުކްލިއަރ ޕްރޮގްރާމުގެ ހަގީގީ ރަމްޒުގެ ގޮތުގައި ގިނަ ބަޔަކު ސިފަކުރާ މުޙުސިން ފަހްރިޒާދެ މަރާލާފައިވަނީ، ހުކުރު ދުވަހު، އިރާނުގެ ވެރިރަށް ތެހެރާންގެ އިރުން އޮންނަ އަވަށެއްގައި ބަދަލު ކުރެވުނު ބަޑީގެ ހަމަލާތަކެއްގައެވެ. މުޙުސިން ފަހްރިޒާދެ މަރާލުމަށް ދެވުނު މިހަމަލައަށްފަހު އާންމު ވެގެން ގޮސްފައިވާ ފޮޓޯތަކުން ފެންނަ ގޮތުގައި، ހަމަލާ ހިގި ސަރަހައްދުގައި އޮތް ކާރުގެ ކުރީގެ ބިއްލޫރިގަޑަށް ވަޒަން އަރާފައިވެއެވެ. އަދި އެސަރަހައްދުގެ މަގުމައްޗަށް ލޭތައް އޮހޮރިފައި ވަނިކޮށް ފެންނަން ހުރެއެވެ.
"ޒިންމާދާރު މަގާމްތަކުގައި ތިބި މީހުން ކުރަންހުރި ކަންކަމުގެ ލިސްޓެއް ހަދަންވީ ދެސަބަބެއް ފާހަގަ ކޮށްލާނަން: 1- މި ޖަރީމާ ހިންގި މީހުންނަށް ހައްގު އަދަބު ދިނުން. 2- ޝަހީދު ފަހްރިޒާދެ ކުރިޔަށް ގެންދެވި ސައިންސާއި ޓެކްނިކަލް އެންމެހާ މަސައްކަތްތަކެއް މެދުކެޑުމެއްނެތި ހަމަ އެމަގަށް ކުރިޔަށް ގެންދިއުން،" ޚާމަނާއިއަށް ނިސްބަތްވާ ޓުވިޓަރ އެކައުންޓަކުން، ކުރި ޓުވީޓެއްގައި އިރާނުގެ ނިއުކުލިއަރ ޕްރޮގްރާމަށް އިޝާރާތް ކުރައްވަމުން ލިޔުއްވާފައި ވެއެވެ.
ޚާމަނާއި އަދިވެސް އިތުރަށް ލިޔުއްވާފައި ވެއެވެ. "އަަހަރުމެންގެ އަދުއްވުން ވަނީ، އަހަރުމެންގެ ގައުމުގެ ދިފާއުގައި ހުންނެވި، ފަޚުރުވެރި ސައިންސްވެރިޔާ، މުޙުސިން ފަހްރިޒާދެ މަރާލާފައި. މަދުން ނޫނީ އުފަން ނުވާނެ، ސައިންސްގެ ތޫނުފިލި ވިސްނުމުގެ ވެރިޔާގެ ފުރާނަ ނެތިގެން އެދިޔައީ އޭނާ ކުރަމުން އައި، އަބަދައްޓަކާ ދެމިހުންނާނޭ ސައިންޓިފިކް މަސައްކަތްތަކުގެ ނަތީޖާއެއްގެ ގޮތުން. އޭނާގެ ފުރާނަ ނެތިގެން ދިޔައީ ﷲ އަށްޓަކާ. އިރާދަ ކުރެއްވިއްޔާ އަހަރުމެން އޭނާގެ ފުރާނައިގެ ބަދަލު ހިފާނަން."
ހޮނިހިރު ދުވަހު ބޭއްވުނު ކެބިނެޓް ބައްދަލުވުމެއްގައި އިރާނުގެ ރައީސް ވިދާޅުވެފައިވަނީ: "ތިންކް ޓޭންކްތަކުންނާއި، އަދި އީރާނުގެ އަދުއްވުންވެސް ދަންނަންވީ ކަމަކީ، އެންމެ އެކަށީގެންވާ ވަގުތުގައި، މި ގަތުލުގެ ބަދަލު ހިފުމުގެ ހިވްވަރާއި އަދި ކުޅެދުންތެރިކަން އިރާނުގެ ކިބައިގައި އަދި، އިރާނުގެ ޒިންމާ އުފުލަންތިބި އޮފިޝަލުންގެ ކިބައިގައިވެސް ހުންނާނެކަން."
އިރާނުގެ ރައީސް ރޫހާނީއާއި އަދި ސީނިއަރ އޮފިޝަލުންވެސް މި ހަމަލާގެ ޒިންމާ އަޅުވާފައިވަނީ، އިޒްރޭލު ސަރުކާރުގެ ކިބައިގައެވެ. އަދި ވަނީ މިހަމަލާގެ ބަދަލު ހިފާނެކަމަށްވެސް ވިދާޅުވެފައެވެ.
އިރާނު ސަރުކާރުގެ ޚަބަރު ފަރުތާ ފާސް ނިއުސް އޭޖެންސީގައި އާންމު ކޮށްފައިވާ ބަޔާނެއްގައި ރޫހާނީ ވަނީ، އިޒްރޭލުން މި ހަމަލާގެ ޒިންމާ އުފުލަން ޖެހޭނަ ކަމުގައި ވިދާޅުވެވެއެވެ. "އަނެއްކާވެސް، އަދުއްވުންގެ މުޑުދާރު އަތްތައް، އަދި ޒަޔަނިސްޓުންގެ އައިރު ގާނޫނީ ދައުލަތް، މިވަނީ އަހަރުމެންގެ ގައުމުގެ އަގުހުރި ދަރިއެއްގެ ލެއިން ތަތްތެޅިފަ. އަދި މިމީހުން މިވަނީ އަހަރުމެންގެ ގައުމަށް ނުހަނު ޚިދުމަތްތެރި އަދި އަގުހުރި ސައިންވެރިއްގެ ވަކިވެދިއުމުން އަހަރެމެންގެ ގައުމުގެ ރައްޔިތުން މޮޅިވެރި ކޮށްފަ." މިބާޔާނުގައި ރޫހާނީ ވިދާޅުވެފައި ވެއެވެ.
ހުކުރުދުވަހު، އިރާނުގެ ފޮރިންގ މިނިސްޓަރ ޖަވާދު ޒާރިފް ވިދާޅުވެފައި ވަނީ، މިއީ އިޒްރޭލު އަޑީގައި އޮވެގެން ދީފައިވާ ހަމަލާއެއްކަމުގެ ހުރިހާވެސް ނިޝާންތަކެއް ފެންނަން ހުރި، ފިޑި ހަމަލާއެއްގެ ގޮތުގައި ސިފަ ކޮށްފައެވެ.
މިހާތަނަށް އައިއިރު، މިހަމަލާގެ އަޑީގައި އިޒްރޭލު އޮތްކަމުގެ ހެއްކެއް އިރާނުން ދައްކާފައެއް ނުވެއެވެ. އަދި މިހަމަލާއާއި ގުޅޭގޮތުން އެއްވެސް ކޮމެންޓެއް ކުރުމަށް އިޒްރޭލުގެ ބޮޑުވަޒީރުގެ އޮފީހުން ވަނީ ދެކޮޅު ހަދާފައެވެ.
2018 ވަނަ އަހަރު، އިޒްރޭލުގެ ބޮޑުވަޒީރު ވަނީ، އިޒްރޭލުގެ ޖާސޫސުން އަތުލައިގެންފައިވާ އިރާނުގެ ނިއުކްލިއަރ ސިއްރުތަކެއްކަމަށް ބުނާ ލިޔުންތަކެއްގެ ޕްރެސެންޓޭޝަނެއް ދެއްވަމުން، އެ ޕްރެސެންޓޭޝަންގައި މުޙުސިން ފަހްރިޒާދެގެ ނަން ގެންނަވާފައެވެ. އެ ޕްރެސެންޓޭޝަންގައި ނަތަންޔާހޫ ވިދާޅުވެފައިވަނީ މުޙުސިން ފަހްރިޒާދެއަކީ، "އަމަދު" ނަމަކަށް ކިޔާ، އިރާނުގެ ސިއްރު ނިއުކްލިއަރ ޕްރޮޖެކްޓެއްގެ ވެރިޔާ ކަމުގައެވެ. "ފަހްރިޒާދެ، މިނަން ހަދާން ބަހައްޓާތި" ނަތަންޔާހޫ މި ޕްރެސެންޓޭޝަން ދެއްވަމުން ރިޕޯޓަރުންނަށް ވިދާޅުވެފައި ވެއެވެ.
އެމެރިކާގެ ސްޓޭޓް ޑިޕާޓްމަންޓުންނާ އަދި ބައިނަލް އަގުވާމީ އެޓޮމިކް އެނާޖީ އޭޖެންސީންވެސް ތައްޔާރު ކޮށްފައިވާ އެތަކެއް ލިޔެ ކިޔުންތަކެއްގައި، އިރާންގެ ނިއުކްލިއަރ ގާބިލްކާ ގުޅޭ މުހިންމު ސިއްރުތަކެއް ދެނެވަޑައިގަންވާނޭ ބޭފުޅެއްގެ ގޮތުގައި މުޙުސިން ފަހްރިޒާދެގެ ނަންވަނީ ފާހަގަ ކޮށްފައެވެ.
ކޮމެންޓު ފޮނުވާ