ދައުލަތުގެ މިއަހަރުގެ ހަރަދު 10 ބިލިއަން ރުފިޔާއަށް އަރައިފިއެވެ.
ފިނޭންސް މިނިސްޓްރީން މި މަހުގެ 16ވަނަ ދުވަހުގެ ނިޔަލަށް އާންމުކުރި ތަފާސް ހިސާބުތަކުގައިވާ ގޮތުން މިއީ މިދިޔަ އަހަރު ކުރި ހޭދައާ ބަލާއިރު ތިން ބިލިއަން ރުފިޔާގެ އިތުރުވުމެކެވެ.
އެންމެ ބޮޑު ހޭދައެއްކޮށްފައިވަނީ ރިކަރެންޓު ޚަރަދުތަކަށެވެ. އެގޮތުން މުސާރައާއި އެލަވަންސްތަކާއި އިދާރީ ހިންގުމުގެ ޚަރަދަށް ޖުމްލަ 6.2 ބިލިއަން ރުފިޔާ ހޭދަކޮށްފައިވެއެވެ. އޭގެ ތެރޭގައި ސަރުކާރުގެ އެކި ދަތުރުތަކަށް 41 މިލިއަން ރުފިޔާ ޚަރަދުކޮށްފައިވެއެވެ.
ދައުލަތުގެ ހަރަދު މިދިޔަ އަހަރުގެ މި މުއްދަތުގައި ހުރީ 7.8 ބިލިއަން ރުފިޔާގައެވެ. މިދިޔަ އަހަރުގެ މި މުއްދަތާ އަޅާބަލާއިރު މި އަހަރުގެ މި މުއްދަތުގައި ދައުލަތުގެ ހަރަދު ވަނީ 28 ޕަސަންޓު އިތުރުވެފައެވެ. މުވައްޒަފުންގެ މުސާރަ އާއި އިނާޔަތްތައް އަދި ޕެންޝަނަށް މިއަހަރު ދެ ބިލިއަން ރުފިޔާ ހޭދަކުރިއިރު އިދާރީ އަދި ހިންގުމުގެ ހަރަދަށް ހަތަރު ބިލިއަން ރުފިޔާ ވަނީ ހޭދަކޮށްފައެވެ.
އެންމެ ބޮޑު ޚަރަދެއްކޮށްފައިވަނީ އެއާޕޯޓުތައް ތަރައްގީކުރުމަށެވެ. މިދިޔަ އަހަރު 22.3 މިލިއަން ރުފިޔާ ޚަރަދުކުރި ނަމަވެސް މި އަހަރު، އަހަރުގެ މިހާތަނަށް 333.8 މިލިއަން ރުފިޔާވަނީ ހޭދަކޮށްފައެވެ. ކެޕިޓަލް ޚަރަދުގެ ގޮތުގައި ތިން ބިލިއަން ރުފިޔާވަނީ ހޭދަކޮށްފައެވެ. އާމްދަނީގެ ގޮތުގައި ދައުލަތަށް މިހާތަނަށް ލިބިފައިވަނީ 7.1 ބިލިއަން ރުފިޔާއެވެ.
އޭގެ ތެރެއިން 5.7 ބިލިއަން ރުފިޔާއަކީ ޓެކުހުން ލިބުނު އާމްދަނީއެވެ. ދައުލަތަށް މިދިޔަ އަހަރުގެ މި މުއްދަތުގައި އާމްދަނީގެ ގޮތުގައި ލިބުނީ 5.6 ބިލިއަން ރުފިޔާއެވެ.
