އެމްޑީޕީގެ ރައީސް މުހައްމަދު ނަޝީގެ އެދިވަޑައިގެންނެވުމަކަށް މިރޭ އެޕާޓީގެ ފަރާތުން ޖުމްހޫރީ ޕާޓީއާއި މަޝްވަރާ ކުރުމަށް ހަމަޖެހިއްޖެއެވެ.

މިބައްދަލުވުމާއި ގުޅޭގޮތުން އެމްޑީޕީގެ ކުރީގެ ޗެއާޕާސަން ހަސަން ލަތީފް ވިދާޅުވީ އެމްޑީޕީގެ ރައީސް މުހައްމަދު ނަޝީދުގެ އެދިވަޑައިގެންނެވުމުގެ މަތީން މިރޭ ޖުމްހޫރީ ޕާޓީއާއި ބައްދަލުކުރުމަށް ހަމަޖެހިފައިވާކަމަށެވެ. އެމްޑީޕީގެ ފަރާތުން މިބައްދަލުވުމުގައި ބައިވެރިވަނީ އޭނާއާއި، އެސްޓީއޯގެ އެމްޑީޕީ އަމްރުކަމަށް ހަސަން ވިދާޅުވިއެވެ.

އެމްޑީޕީގެ ފަރާތުން، ޕާޓީގެ ރައީސް މުހައްމަދު ނަޝީދުގެ އެދިވަޑައިގަތުމުގެ މަތީން އަޅުގަނޑާއި، ހުސެއިން އަމްރު އާއި ދެމީހުން މިރޭ ޖުމްހޫރީ ޕާޓީއާއިއެކު މަޝްވަރާ ކުރުމަށް އެބަ ބައްދަލުވަން.

– ހަސަން ލަތީފް ވިދާޅުވިއެވެ.

އެމްޑީޕީގެ ފަރާތުން ޖުމްހޫރީ ޕާޓީއާއި ބައްދަލު ކުރާކަމަށް ހަސަން ވިދާޅުވި ނަމަވެސް މިއީ އެމްޑީޕީގެ ރަސްމީ ބައްދަލުވުމެއް ކަމެއް އަދި މިހާތަނަށް އެޕާޓީން ހާމަކޮށްފައި ނުވެއެވެ. އެމްޑީޕީގެ ރައީސަކީ ނަޝީދު ކަމުގައި ވީނަމަވެސް އެމްޑީޕީގެ ރިޔާސީ ޕްރައިމަރީއަށްފަހު، ރައީސް ނަޝީދު ގެންދަވަނީ ފިކުރެއްގެ ދިރުުމުގެ ނަމުގައި އެމްޑީޕީގެ ތެރޭގައި ވަކި ފެކްޝަނެއް ހަދައިގެން މަސައްކަތް ކުރައްވަމުންނެވެ.

ހަސަން ލަތީފާއި، އަމްރުއަކީ ރައީސް ނަޝީދުގެ ފެކްޝަންގައި މަސައްކަތް ކުރައްވާ ބޭފުޅުންނެވެ. ކުރިއަށް އޮތް ރިޔާސީ އިންތިހާބުގައި އެމްޑީޕީ އާއެކު ކޯލިޝަން ހަދާފައިވާ ޕާޓީތަކާއެކު މުލިއާގޭގައި ބޭއްވި ބައްދަލުވުމަށް ފަހު ނޫސްވެރިންނާއި ވާހަކަ ދައްކަވަމުން ރައީސް ޞާލިހު ވިދާޅުވީ އެމްޑީޕީގެ ތެރޭގައި ރައްޔިތުންގެ މަޖިލިހުގެ ރައީސް އަދި އެ ޕާޓީގެ ރައީސް މުހައްމަދު ނަޝީދަށް ވަކި ފެކްޝަނެއް ނުހެދޭނެ ކަމަށެވެ.

އެމްޑީޕީއާއި އެކު ކޯލިޝަން ހެދުމަށް ޖުމްހޫރީ ޕާޓީއަށް ދައުވަތު ދިން ނަމަވެސް އެޕާޓީން އެކަން ގަބޫލު ކޮށްފައިނުވެއެވެ. ޖުމްހޫރީ ޕާޓިން ނިންމާފައިވަނީ އެޕާޓީން ވަކިން އިންތިޚާބުގައި ވާދަކުރުމަށެވެ.