އިންތިހާބުތަކަށް ސަރުކާރުން ނުފޫޒު ފޯރުވަމުންދާތީ އިންތިހާބުތައް އިންސާފުވެރި ކުރުމަށާއި މިނިވަން ކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކޮށް މަގުފަހި ކުރަން ގޮވާލައި އެމްޑީޕީގެ ރައީސް މުހައްމަދު ނަޝީދުގެ ފެކްޝަނުން މިއަދު މަޖިލީހަށް ގަރާރެއް ހުށަހަޅައިފިއެވެ.
މަޖިލިހުގެ މިއަދުގެ ޖަލްސާގައި ފުރަތަމަ ކިއުން އިއްވި ގަރާރު ހުށަހެޅުއްވީ އެ ފެކްޝަންގައި އިސްކޮށް އުޅުއްވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އެވެ.
އެ ގަރާރުގައި ވަނީ އިންތިހާބުތަކަށް ސަރުކާރުން ނުފޫޒު ފޯރުވަމުން ދިއުމާ މެދުގައި އާންމު ރައްޔިތުންނާއި ސިޔާސީ ޕާޓީތަކުންނާއި މަދަނީ ޖަމިއްޔާތަކުން މިހާތަނަށް ފާޅުކޮށްފައިވާ ކަންބޮޑުވުންތަކަށް އިތުބާރު ކުރުވަނިވި ހައްލެއް ހޯދިފައި ނުވާތީ އިންތިހާބުތައް އިންސާފުވެރި ކުރުވުމަށާއި މިނިވަން ކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކޮށް މަގުފަހި ކުރުމަށް ގޮވާލައިފައެވެ.
ޑިމޮކްރަސީގެ މައިގަނޑު އެއް އަސާސަކީ މިނިވަން، އިންސާފުވެރި، ހާމަކަން ބޮޑު އަދި އިތުބާރު ކުރުވަނިވި އިންތިހާބު ބޭއްވުމަށް ޖާގަ ކަށަވަރުވެފައި އޮތުން ކަމަށްވުމާއި ގާނޫނުއަސާސީގެ 26 ވަނަ މާއްދާ އިން ވޯޓު ދިނުމުގެ ހައްގާއި އިންތިހާބުތަކަށް ކުރިމަތިލުމުގެ ހައްގުގެ ކަށަވަރުކަން ދީފައިވުމުން އެއީ މިނިވަން އަދި އިންސާފުވެރިކޮށް ހިނގާ ޕްރޮސެސްއަކަށް ވާން ޖެހޭނެ ކަމަށް އެ ގަރާރުގައިވެއެވެ.
މީގެ އިތުރުން އެސްއެމްއީ ލޯނުތައް އިއުލާންކުރުމާއި ސަރުކާރާށް ތާއީދުކުރާ ފަރާތަށް ވޯޓު ނުދީފި ނަމަ ޕްރޮޖެކްޓުތައް އަތުލާނެ ކަމުގެ އިންޒާރު ދެމުން އަންނަ ކަމަށް ވެސް އެ ގަރާރުގައި ވަނީ ތުހުމަތުކޮށްފައެވެ. އެ ކަންކަމުގެ ސަބަބުން އިންތިހާބުތަކުގެ ސައްހަކަން ގެއްލި އިތުބާރު ކުޑަވެފައިވާ ކަމަށާއި ރާއްޖޭގެ ޑިމޮކްރަސީއަށް ގެއްލުންވަމުން އަންނަ ކަމަށް އެ ގަރާރުގައި ވަނީ ބުނެފައެވެ.
ސަރުކާރުން ނުފޫޒު ފޯރުވުން ހުއްޓާލައި އިންތިހާބު މިނިވަން ކުރުމަށްވެފައިވާ ވައުދުތަކާ އެއްގޮތަށް ސާފު ސިޔާސަތެއް ގެންގުޅުމަށް އެ ގަރާރުގައި ވަނީ ގޮވާލައިފައެވެ.
އަދި ދައުލަތުގެ ބްރޯޑްކާސްޓް ކުރާ ފަރާތްތަކުން ކެންޑިޑޭޓުންގެ މެދުގައި ހަމަހަމަ ފުރުސަތު ނުދީ، ސަރުކާރުން ތާއީދު ކުރާ ކެންޑިޑޭޓަށް ފާޅުކަން ބޮޑު ގޮތެއްގައި ކެމްޕެއިންކޮށްދީ އިންތިހާބުތަކަށް ނާޖައިޒު ނުފޫޒާއި ބާރު ފޯރުވަމުންދާތީ ސަރުކާރުން އިންތިހާބުތަކަށް ނާޖައިޒު ނުފޫޒު ފޯރުވުން ހުއްޓުވުމަށް ގަރާރުގައި ވަނީ ގޮވާލައިފައެވެ.
