ރައީސް ޔާމީން މިނިވަން ކުރުމަށް ގޮވާލާ އިދިކޮޅު ޕްރޮގްރެސިވް ކޯލިޝަނުން ރޭ ކުރިއަށް ގެންދިޔަ މުޒާހަރާގެ ތެރެއިން ރައީސް ޔާމީންގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އާދަމް އާސިފް، ހައްޔަރުކޮށްފިއެވެ.
ޕީޕީއެމުން ވަނީ އޭނާ ހައްޔަރުކުރުމުން އެކަން ކުށްވެރިކޮށް ބަޔާނެއް ނެރެފައެވެ. އެކޯލިޝަނުން ބުނީ މިއީ ސުލްހަވެރި އިހްތިޖާޖްގެ ކަންކަން ރާވައި ހިންގާ ގާނޫނީ ވަކީލުންނަށް އަމާޒުކޮށްގެން ސަރުކާރުން ފުލުހުން ލައްވައި ކުރުވި ކަމެއްކަމަށެވެ.
ބަޔާނުގައި ބުނި ގޮތުގައި އިހްތިޖާޖުގެ ތެރެއިން މީހުން ހައްޔަރު ކުރާއިރު، ބައިވެރިނުވެ ދުރުގައި ތިބޭ މީހުން ވެސް ހައްޔަރު ކުރަމުން ގެންދާތަން މިހާރު ދަނީ ފެންނަމުންވެ. ރޭގެ އެއްވުމުން ވެސް ގިނަ ބަަޔަކު ހައްޔަރުކޮށްފައިވާ ކަމަށް ޕީޕީއެމުން ބުންޏެވެ.
އެގޮތުން ޒުވާން ކަނބަލަކު ހައްޔަރުކުރުމުގައި ފުލުހުން އަމަލުކުރި ގޮތުން އެ ޒުވާނާ ހޭނެތިފައިވާއިރު، އެ ޒުވާނާގެ ސިއްހީ ހާލަތު ސީރިއަސްވެ މިހާރު ގެންދަނީ ހޮސްޕިޓަލްގައި ފަރުވާ ދެމުންނެވެ. މިފަދަ ލާއިންސާނީ އަމަލުތައް ފުލުހުން މެދުވެރިކޮށް ސަރުކާރުން ހިންގަމުން ގެންދާއިރު، މިކަންކަން ބަލާ ފިޔަވަޅު އެޅުމުގެ ޒިންމާ ގާނޫނުން މަތިކޮށްފައިވާ މުއައްސަސާތައް ނިދާފައި ތިބުމުގެ އިތުރުން ސަރުކާރު ބޭނުންވާ ގޮތަށް ބަޔާންތައް ނެރެމުން ގެންދިޔުމަކީ ވެސް އެ މުއައްސަސާތަކުގެ މުސްތަގިއްލުކަން ގެއްލިފައިވާ މިންވަރު ހާމަކޮށްދޭ ކަންކަމެވެ.
– ބަޔާނުގައިވެއެވެ.
މުޒާހަރާ އިން ހައްޔަރުކުރި އެންމެން ދޫކޮށްލަން ޕީޕީއެމުން ވަނީ ގޮވާލައިފައެވެ. ޕީޕީއެމާއި ޕީއެންސީން މުޒާހަރާކުރަމުން ދަނީ އެކޯލިޝަންގެ ރިޔާސީ ކެނޑިޑޭޓް ރައީސް ޔާމީން މިނިވަންކުރަން ގޮވާލައެވެ. އެމަނިކުފާނަށް ހުކުމް އިއްވި ދުވަހުން ފެށިގެން ސިލްސިލާކޮށް އެއްވުންތަކެއް ދަނީ ބާއްވަމުންނެވެ.
