ސިޔާސީ މަސްރަހު މިހާރު އޮތް ގޮތަށް ބަލާއިރު، ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީން ރައީސް އިބްރާހިމް މުހައްމަދު ޞާލިހާއިއެކު ކޯލިޝަން ހެދުމަކީ ނާދިރު ކަމެއްކަމަށް ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހަށް ތާއީދުކޮށް އަދާލަތު ޕާޓީންނާއި، އެމްޑީއޭއިން ނިންމާފައިވާ ދަނޑިވަޅެއްގައެވެ. ނަމަވެސް އިއްޔެ ފެށި ޖުމްހޫރީ ޕާޓިގެ ކޮންފަރެންސުގައި ޤާސިމް ވަނީ މިސަރުކާރަށް ނުސީދާކޮށް ފާޑުވިދާޅުވެ ރައީސް ޞާލިހުގެ މިހާރުގެ އެންމެ ބޮޑު ވާދަވެރިޔާ ރައީސް ނަޝީދަށް ވަރަށް ބޮޑަށް ތައުރީފް ކުރައްވާ ވާހަކަ ދައްކަވާފައެވެ.
ޕީޕީއެމްގެ ނައިބް ރައީސް ޝިޔާމް ވިދާޅުވީ ސިޔާސީ މަސްރަހު މިހާރު ދައްކާ ގޮތުން ރައީސް ޔާމީންގެ ވިސްނުންފުޅު ހައިރާންކުރުވާ ވަރަށް އަކުރުން އަކުރަށް ދިމަވާތަން ފެންނަ ކަމަށެވެ. މިހާރުގެ މަސްރަހަށް ބަލާއިރު ކުރިއަށް އޮތް ރިޔާސީ އިންތިޚާބުގައި ރައީސް ޞާލިހާއިއެކު ޖުމްހޫރީ ޕާޓީން ކުރިއަށް ނުދާނެކަން ޔަގީންވާކަމަށް ޝިޔާމް ވިދާޅުވިއެވެ. މިކަންކަމަށް ބަލާއިރު ޕީޕީއެމްއަށް އޮތް އުންމީދު ބޮޑުކަމަށް ޝިޔާމް ވިދާޅުވިއެވެ.
ސިޔާސީ މަސްރަހުގެ ކުޅިބައި އެތުރެމުންދާ ގޮތުން އުއްމީދު އިތުރަށް އާލާކޮށްދޭ. ޖުމްހޫރީ ޕާޓީ މިވަގުތު ރައީސް ޞާލިހާއިއެކު 2023 އަށް ކޯލިޝަން ހެދުމަކީ ނާދިރުކަމެއް. ރައީސް ޔާމީން ގެ ވިސްނުންފުޅު ހައިރާންކުރުވާ ވަރަށް އަކުރުން އަކުރަށް އެބަ ދިމާވޭ!
– ޝިޔާމް ވިދާޅުވިއެވެ.
މި އަހަރުގެ އިންތިހާބުގައި ޖުމްހޫރީ ޕާޓީ ވަކިން ވާދަކުރަން، އެ ޕާޓީގެ މެމްބަރުންތަކެއް ވަނީ ކޮންފަރެންސަށް ގަރާރެއް ހުށަހަޅައިފައެވެ. އެނގިފައިވާ ގޮތުގައި ގާސިމް އިންތިހާބުގައި ވާދަކުރަން، ނަޝީދު ވެސް އަންނަނީ ބާރުއަޅުއްވަމުންނެވެ. ނަޝީދު ވަނީ އެމަނިކުފާނާ ވާދަކޮށް އެމްޑީޕީގެ ރިޔާސީ ޓިކެޓް ކާމިޔާބުކުރެއްވި މިހާރުގެ ރައީސް އިބްރާހިމް މުހައްމަދު ސޯލިހަށް ތާއީދުނުކުރައްވާނެ ކަމަށް ވިދާޅުވެފައެވެ.
ޤާސިމް ވަނީ އިއްޔެ ރައީސް ނަޝީދަށް ވަރަށް ބޮޑަށް ތައުރީފް ކުރައްވާ ވާހަކަ ދައްކަވާފައެވެ. ޖޭޕީން މީގެ ކުރިން 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރިއެވެ. އެ ދެ އަހަރު ވެސް އެ ޕާޓީގެ ޓިކެޓުގައި ވާދަކުރެއްވީ ގާސިމެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
