ރައީސް އިބްރާހީމް މުޙައްމަދު ޞާލިޙަށް ރިޔާސީ ޓިކެޓު ޙަވާލުކުރަން ހުކުރުދުވަހުގެރޭ ބޭއްވި ޖަލްސާއަށް އެމްޑީޕީގެ ރައީސް މުޙައްމަދު ނަޝީދު ވަޑައިނުގަތުމަކީ ވަރަށް ދެރަވަރު ހުތުރު ޢަމަލެއްކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
ދެބައިވެފައިވާ އެމްޑީޕީގައި މަވޯޓާއަކީ ރައީސް ޞާލިޙުގެ ފެކްޝަނަށް ނިސްބަތްވާ މެމްބަރެކެވެ. ފަހަކަށް އައިސް ވަރަށްބޮޑަށް ނަޝީދަށް ފާޑު ވިދާޅުވާ މަވޯޓާ ކުރެއްވި ޓްވީޓެއްގައި ވަނީ ޑިމޮކްރަސީގެ ރީތި ހަމަތައް ޤަބޫލުކުރާ ކޮންމެ މީހަކުވެސް އިންތިޚާބަކުން ބަލިވީމަ ބަލި ޤަބޫލުކުރާނެކަމަށެވެ. އަދި ރައިސް ޞާލިޙަށް ރިޔާސީ ޓިކެޓު އެރުވި ރަސްމިއްޔާތަށް، އެމްޑީޕީގެ ރައީސްގެ މަޤާމުގައި ހުންނަވައިގެން ނަޝީދު ވަޑައިނުގަތުމަކީ ވަރަށް ދެރަވަރު ހުތުރު ޢަމަލެއްކަމަށެވެ.
ދެބައިވެފައިވާ އެމްޑީޕީގެ ރައީސް ނަޝީދުގެ ބައެއް ޢަމަލުތައް މިހާރު ހުރިގޮތުން އޭނާ އެމްޑީޕީގެ ރައީސްކަމުގެ މަޤާމުން އިސްތިއުފާދެއްވުމަށް އެޕާޓީގެތެރެއިން ގޮވާލާ އަޑުތައް އަންނަނީ ގަދަވަމުންނެވެ. ރައްޔިތުންގެ މަޖިލީހުގެ މެމްބަރުންނާއި ޕާޓީގެ ސީނިއަރ އެކްޓިވިސްޓުންގެތެރެއިންވެސް މިއަޑު އަންނަނީ ގަދަވަމުންނެވެ.
Democracy ge reethi hamathah qaboolu kuraa komme meehaku inthikhaabegge bali vejje nama bali qaboolu kuraane. Adhi MDP ge Raees magaamuga hunnavaugen, @ibusolih ah ticket haavaalu kurumuge rasmiyyaathah, @MohamedNasheed vadainugathumahee varah dhereavaru huthuru amaleh
— Ibrahim Shareef (@AdduShareef) February 19, 2023
ޖެނުއަރީ 28ވަނަ ދުވަހު ބޭއްވި އެމްޑީޕީގެ ރިޔާސީ ޕްރައިމެރީ ބޮޑު ތަފާތަކުން ކާމިޔާބުކުރެއްވީ ރައީސް ޞާލިޙެވެ. އަދި މިދިޔަ ހުކުރުދުވަހު ވަނީ އެމަނިކުފާނަށް ރަސްމީކޮށް ޓިކެޓު ޙަވާލުކޮށްފައެވެ.
އިންތިޚާބުން ބަލިވެވަޑައިގަތުމާއެކު ނަޝީދުވަނީ އޭނާ ޕްރައިމެރީ ކެމްޕެއިންގައި ބޭނުންކުރެއްވި ޝިޢާރު، "ފިކުރެއްގެ ދިރުން"ގެ ނަމުގައި ވަކި ސިޔާސީ ޙަރަކާތެއް އެމްޑީޕީގެ ތެރޭގައި ފަށާފައެވެ. އެޙަރަކާތް އެމްޑީޕީގެ ގޮތްޕެއްގެގޮތުގައި ރަޖިސްޓްރީކުރައްވާނެކަމަށް ނަޝީދު ވިދާޅުވެއެވެ. ނަޝިދު ފެކްޝަނުން ބުނާގޮތުގައި ފިކުރެއްގެ ދިރުމަށް މިހާރު ފަންސާސް ހާހަށްވުރެ ގިނަ މީހުން ސޮއިކޮށްފިއެވެ.
