މިފަހަރު ނާގޯށި ތަރައްގީކުރަން 300-400 މިލިއަން ޑޮލަރު ހަރަދުވާނެ ކަމަށް ލަފާކުރެއެވެ. އެ ރިސޯޓުގައި 835 ކޮޓަރި ތަރައްގީކުރަނީ ޖުމްލަ 1600 އެނދު ހިމެނޭ ގޮތަށެވެ.

2007 ގަވަނަ އަހަރު ނާގޯށި ރިސޯޓެއްގެ ގޮތުގައި ތަރައްގީ ކުރަން ރަޝިޔާގެ ކުންފުންޏެއް ކަމަށްވާ ތްރީކޭ އާ އެންމެ ފުރަތަމަ ހަވާލުކުރީ، އެ ރަށުގައި 600 އެނދުގެ ރިސޯޓެއް ތަރައްގީކުރުމަށެވެ.

ނާގޯށި ތަރައްގީކުރަނީ ދުބާއީގެ ރޯ ގަލަދާރީ ކުންފުންޏާއި އެމްޓީޑީސީން ހަދާފައިވާ ޖޮއިންޓް ވެންޗަރއެއްގެ ދަށުންނެވެ. އެ ރަށް ތަރައްގީ ކުރާއިރު، ރޯ ގަލަދާރީގެ ހިއްސާއަކީ 85 ޕަސެންޓެވެ. ބާކީ 15 ޕަސެންޓް ހިއްސާ ވަނީ އެމްޓީޑީސީ އެވެ.

އެހެންނަމަވެސް އެ ޑީލް ހެދީ ރިސޯޓު ހިންގުމުގެ ފައިދާގެ ފިކްސްޑް އަދަދެއް ކޮންމެ މަހަކު ވެސް އެމްޓީޑީސީ އަށް ލިބޭ ގޮތަށެވެ.

ތަޒްމީލް ވިދާޅުވީ އަމިއްލައަށް ރިސޯޓު ހިންގައިގެން އެކަމުން ފައިދާ ބޮޑު ކުރެވޭނެ ކަމަށާއި އެކަމުގެ މަސައްކަތްތައް ވަރަށް ބާރަށް ކުރިއަށްގެންދާނެ ކަމަށެވެ.

އެމްޓީޑީސީ އަކީ ސަރުކާރުގެ 47 ޕަސެންޓް އަދި އާންމު ހިއްސާދާރުންގެ 53 ޕަސެންޓް ހިއްސާ އޮންނަ ކުންފުންޏެވެ. އެކުންފުނީގައި އާންމުގެ ހިއްސާދާރުންގެ ގޮތުގައި 24،000 އަށް ވުރެ ގިނަ މީހުން އެބަ ތިއްބެވެ.