ރައީސް ބައިވެރިވެ ވަޑައިގަންނަވާ އައްޑޫ ބޮޑު ޖަލްސާ މިރޭ

މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި "އެމްޑީޕީ ކުރިއަށް" ކެމްޕޭންގެ ފަރާތުން އައްޑޫ ސިޓީގައި ބާއްވާ ބޮޑު ޖަލްސާ މިރޭ އޮންނާނެއެވެ. މި ޖަލްސާގައި ރައީސް ސާލިހު ބައިވެރިވެ ވަޑައިގަންނަވާ ގޮތަށް ވަނީ ހަމަޖެހިފައެވެ.

ރައީސް ސާލިހުގެ "އެމްޑީޕީ ކުރިއަށް" ކެމްޕޭނުން ހާމަ ކޮށްފައިވާ ގޮތުގައީ "އައްޑޫ ޖަލްސާ"ގެ ނަމުގައި ބާއްވާ މި ޖަލްސާ ބޭއްވުމަށް ހަމަޖެހިފައިވަނީ މިރޭ 8:30 ގައި ސ. ހިތަދޫ ސިޓީ ބާޒާރު ސަރަހައްދުގައި ކަމުގައެވެ.

މިރޭ އައްޑު ބޮޑު ޖަލްސާ ބޭއްވުމަށް ހަމަޖެހިފައިވާއިރު، މިހަފްތާގައި އައްޑޫ ސިޓީން ކައުންސިލުންވަނީ އެ ސިޓީގެ 4 ރަށްތަކުން ޖުމްލަ 100 ގޯތި ދޫކުރުމަށް އިއލާން ކޮށްފައެވެ. މީގެރެއިން އެންމެ ފުރަތަމަ ދޫކުރުމަށް އިއުލާން ކުރި ގޯތިތައް ދޫކުރުމަށް އިއުލާން ކޮށްފައިވަނީ މިހަފްތާގެ ހޯމަ ދުވަހުގެ ރޭގެ ދަންވަރުގެ ވަގުތުގައެވެ. އަދި ދަންވަރު އައްޑޫ ސިޓީ ކައުންސިލުން ގޯތި ދޫކުރުމަށް އިއުލާން ކުރުމާއި ގުޅިގެން އެ ކައުންސިލަށް ބޮޑެތި ފާޑު ކިއުންތަކެއްވެސް އަމާޒުވެގެން ވަނީ ގޮސްފައެވެ.

އެފަހަރު އައްޑޫ ސިޓީން ހުޅުވާލީ ފޭދޫން 1,500 އަކަފޫޓޫގެ 300 ގޯއްޗާއި ހުޅުދު އާއި މީދޫގެ ކޮންމެ ރަށަކުން 2,000 އަކަފޫޓުގެ 100 ގޯތި ދޫކުރާށެވެ.

އައްޑޫ ސިޓީގެ ހިތަދޫންއިން 500 ގޯތި ދޫކުުރުމަށް ސިޓި ކައުންސިލުން އިއުލާން ކޮށްފައިވަނީ މިއަދުއެވެ.

އައްޑޫ ސިޓީގައި ބޮޑު ޖަލްސާއެއް ބޭއްވުމަށް ރަައީސް ސާލިހުގެ ކެމްޕޭނުން ތައްޔާރުވަމުން ދާއިރު، ފާއިތުވެދިޔަ ހަފްތާގައި މާލޭގައިވެސް ވަނީ ކެމްޕޭންގެ ބޮޑު ޖަލްސާއެއް ބާއްވާފައެވެ. މި ޖަލްސާއަށް ކައިރި ބައެއް ރަށްރަށުން މީހުން ހާޒިރުވިއިރު، ރައީސް ސާލިހަށް ތާއީދުކުރާ އެތައް ސަތޭކަ އެމްޑީޕީ މެމްބަރުންނެއްވަނީ މިޖަލްސާގައި ބައިވެރި ވެފައެވެ.

ކުރިޔަށްދާ، އެމްޑީޕީގެ ޕްރައިމަރީ ކެމްޕޭންގައި މިހަފްތާގައި ރައީސް ސާލިހުވަނީ ކ. އަތޮޅުގެ ބައެއް ރަށްތަކަށާއި، އަދި އއ. އަދި އދ.ގެ ބައެއް ރަށްތަކަށް ވަޑައިގެންފަައެވެ. އޭގެ ކުރިން ރައީސް ވަނީ ފުވައްމުލަށް އަދި ހުވަދޫ އޮތޮޅުގެ ބައެއް ރަށްތަކަށްވެސް ވަޑައިގެންފައެވެ.

މީގެ އިތުރުން ފާއިތުވެދިޔަ ހަފްތާތަކުގައި ހއ، ހދ، ށ އަދި ލ އަތޮޅުގެ ރަށްތަކަށް ދަތުރު ކުރެއްވުމުގެ ކުރިން ރައީސް ސާލިހުވަނީ ރ. ބ. ޅ. ހއ. ހދ ށ. ނ. އަތޮޅުގެ އިތުރުން އައްޑޫ އަތޮޅަށްވެސް ވަޑައިގެންފައެވެ.