މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައީސް ސާލިހު މާލޭގެ ބައެއް ދާއިރާތަކުގެ އެމްޑީޕީގެ މެމްބަރުންގެ ގޭގެއަށް ޒިޔާރަތް ކުރައްވައިފިއެވެ.

ރައީސް ސާލިހު މިއަދު ޒިޔާރަތް ކުރައްވާފައިވަނީ ވިލިމާލޭގެ އިތުރުން ގަލޮޅުގެ ބައެއް ގޭގެއަށެވެ. ރައީސް މިއަދު މާލޭގެ ގޭގެއަށް ޒިޔާރަތް ކުރެއްވިއިރު ރައްޔިތުންގެ މަޖިލިހުގެ ބައެއް މެމްބަރުންނާއި އަދި ކެބިނެޓްގެ ބައެއް ވަޒީރުންވެސް ވަނީ ކެމްޕޭންގައި ބައިވެރިވެ ވަޑައިގެންފައެވެ.

ރައީސް ސާލިހު މިއަދު މާލޭ ދާއިރާތަކުގެ ބައެއް ގޭގެއަށް މި ވަޑައިގެންނެވީ ފާއިތުވެދިޔަ ހަފްތާގައި މާލެ އަތޮޅާއި އއ. އަދި އދ. އަތޮޅުގެ ބައެއް ރަށްތަކަށް ޒިޔާރަތް ކުރެއްވުމަށް ފަހުއެވެ.

އޭގެ ކުރިން ރައީސް ވަނީ ކެމްޕޭންގައި ރ. ބ. ޅ. ހއ، ހދ، ށ ނ. އަދި ލ އަތޮޅުގެ ރަށްތަކަށް ދަތުރު ކުރައްވާފައެވެ. އަދި އައްޑޫ އަތޮޅަށްވެސް ރައީސް ވަނީ ޒިޔާރަތް ކުރައްވަފައެވެ. ރައީސް ސާލިހުގެ ކެމްޕޭން ނިންމާ ޖަލްސާވެސް ބޭއްވުމަށް ހަމަޖެހިފައިވަނީ އައްޑޫގައެވެ.

ރައީސް ސާލިހުއާއި މި ޕްރައިމަރީގައި ވާއްދަ ކުރައްވާ، އެމްޑީޕީގެ ރައީސް މުހައްމަދު ނަޝީދު މިހާރު ވަޑައިގެން ހުންނެވީ ފުވައްމުލަކުގައެވެ.

އަންނަ ހޮހިރު ދުވަހު ވޯޓުލާއިރު ދެ ކެނޑިޑޭޓުންވެސް ގެންދަވަނީ ވަރަށް ފޯރީއާއެކު ކެމްޕެއިން ކުރައްވަމުންނެވެ. ރައީސް ޞާލިހުވެސް އަދި ނަޝީދުވެސް ވިދާޅުވަމުންދަނީ އިންތިޚާބު ކާމިޔާބު ކުރައްވާނެ ކަމުގަވެ.

އެމްޑީޕީން ބުނެފައިވަނީ މި އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.މި އިންތިޚާބުގައި ވޯޓުލުން ކުރިއަށްދާނީ 28 ވަނަ ދުވަހުގެ ހެނދުނު 9:00 އިން ހަވީރު 5:00 އަށެވެ.

މި އިންތިޚާބުގައި މޮނީޓަރުންގެ ގޮތުގައި ހަރަކާތްތެރިވާން ބޭނުންވާ މީޑިއާތަކަށް ވެސް މިހާރު ވަނީ އެ ފުރުސަތު ހުޅުވާލާފައެވެ. މި ފުރުސަތު ހުޅުވާލާފައި ވަނީ މި މަހުގެ 20 ވަނަ ދުވަހުގެ 12:00އާއި ހަމައަށެވެ. ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް އެ ޕާޓީން ބުންޏެވެ.

އެމްޑީޕީންވަނީ ޕާޓީގެ ވޯޓާސް ލިސްޓުވެސް މިހާރު އާންމުކޮށްފައެވެ. އެ ލިސްޓުގައި ހިމެނެނީ 57،257 މީހުން ވޯޓު ލެވޭނެކަމަށް ބުނެފައިވެއެވެ.