މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ނަތީޖާ ނިމިގެންދާ ގޮތަކުން އަނެއްކާވެސް މަގުމަތިވާން ޖެހިދާނެކަމަށް ރައީސިލްޖުމްހޫރިއްޔާ އިބުރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ، މިހާރު ކުރިޔަށްދާ ރިޔާސީ ޕްރައިމަރީގެ ކެމްޕޭންގައި މިއަދު އދ. ގަނގެއްޗަށް ވަޑައިގެން އެރަށުގެ އެމްޑީޕީގެ މެމްބަރުންނާއި ވާހަަކަ ދައްކަވަމުންނެވެ.
މި ބައްދަލު ކުރެއްވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ ޕްރައިމަރީން އެމްޑީޕީގެ މެމްބަރުން ހޮއްވަވާ ދެއްވަންވާނީ ކުރިޔަށް އޮތް ރިޔާސީ އިންތިޚާބަށް އެހެން ޕާޓީތަކާއެކި ގުޅިގެން މަސައްކަތް ކުރެއްވޭނެ ކެނޑިޑޭޓަކު ކަމުގައެވެ. އަދި ވިދާޅުވީ އެންމެން ގޮވައިގެން އެކީ ކުރިޔަށް ވަޑައިގެންނެވޭނެކަން އެމަނިކްފާނު ވާނީ ސާބިތުކޮށްދެއްވާފަ ކަމުގައެވެ.
މި ޕްރައިމަރީ ނިމިގެންދާ ގޮތަކުން އެނބުރި އަނެއްކާވެސް މަގުމަތިވާން ޖެހިދާނެ. އެއީކީއެއް ހަމަ ގައިމު ވެސް ރައްޔިތުން އެދޭނެ ގޮތެއް ނޫން.
އދ. ދަނގެތީގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
އިތުރަށް ރައީސް ވިދާޅުވީ 2018އިން ފެށިގެން ރާއްޖެއަށް ހަމަޖެހުމާއި ތަަރައްގީ އަންނަމުން ދާކަމަށާއި، އެއީ އޭގެ ކުރީގެ ދައުރުގައި ރައްޔިތުން ތަހައްމަލްކުރި ދަތި އުދަގޫތަކުން އަރައިގަތުމަށް ކުރެވިގެން މަސައްކަތެއް ކަމުގައެވެ.
މި ވޭތުވެ ދިޔަ ހަތަރު އަހަރު ދުވަހުގެ ތެރޭގައި މި ރާއްޖެ އަށް މި ގެނެވުނު ހަމަޖެހުމާއި އާންމު ރައްޔިތުންނަށް މި ގެނެސް ދެވުނު ހިތްހަމަޖެހުމާއި މިނިވަންކަން މިއީ އޭގެ ކުރީގެ ފަސް އަހަރު ތިބޭފުޅުން ތަހައްމަލު ކުރި ދަތި އުނދަގޫތަކުން އަރައިގަތުމަށް ކުރެވުނު ކަމެއް.
ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ ދަނގެތީގެ ބިން ހިއްކުން އެރަށުގެ ލޭންޑު ޔޫސް ޕްލޭނުގައި ހިމަނާފައިވާތީ އެއީ ކުރިޔަށް އޮތް ދައުރަށް އެކުލަވާލާއްވާ މެނިފެސްޓޯގައި ހިމަނާ ރިޔާސީ ވައުދަކަށް ހައްދަވާނޭ ކަމުގައެވެ. އަދި މިހާރު ކުރިޔަށްދާ ޕްރައިމަރީ ކާމިޔާބު ކުރެވި، ދެން ދަގެއްޗަށް ވަޑައިގަންނަވާނީ އެއީ ރިޔާސީ ވައުދެއްގެ ގޮތުގައި ހިމަނުއްވައިގެން ކަމުގައިވެސް ރައީސް ސާލިހު ވިދާޅުވިއެވެ.
އޭގެ އިތުރުން އެރަށަކަކީ ލޯކަލް ޓުއަރިޒަމްވެސް އޮތް ރަށަކަށް ވާތީ އެރަށުގެ ބަނދަރު ބޮޑު ކުރެވިގެން ދާއިރު، އެރަށުގެ ކައުންސިލުން އެދޭގޮތަށް މޫދަށް އެރޭ ޚާއްސަ ސަރަަހައްދެއް ހައްދަވާ ދެއްވާނެކަމަށްވެސް ރައީސް ވިދާޅުވިއެވެ.
ޓޫރިސްޓުންނާއި ރަށުގައި ދިރިއުޅޭ ރައްޔިތުންނަށް މޫދަށް އެރޭނެ ސަރަހައްދެއް އޮތުމަކީ މުހިންމު ކަމެއް. އަޅުގަނޑުމެން ބަނދަރު ބޮޑުކުރާއިރުގައި އަޅުގަނޑުމެން އިރާދަކުރެއްވިއްޔާ ކައުންސިލުން ތި އެދިވަޑައިގަންނަވާ ގޮތަށް މޫދަށް އެރޭ ސަރަހައްދެއް ގާއިމުކޮށްދޭނަން.
ދަނގެތީގެ ލޯކަލް ޓުއަރިޒަމަށް ބޭނުންވާ ވަސީލަތްތައް އެރަށުގައި ގާއިމް ކޮށްދެއްވާނެކަމަށް ވައުދުވަމުން ރައީސް ސާލިހު ވިދާޅުވިއެވެ. އަދި އޭގެ އިތުރުން ދަނގެތީގެ ބަދަލު ބޮޑުކުރާއިރު ހިއްކާ ސަރަހައްދަށް އެރަށުގެ އިންޑަސްރިއަލް މަސައްކަތް ބަދަލު ކުރުމަށްވެސް ލޭންޑް ޔޫސް ޕްލޭންގައި ހިމެނިފައިވާތީ އެކަންވެސް ކޮށްދެއްވާނެކަމަށްވެސް ރައީސް ވިދާޅުވިއެވެ.
ކޮމެންޓު ފޮނުވާ