ވެރިރަށް މާލޭގައި ބޯހިޔާވަހިކަން ފޯރުކޮށް ދޭންޖެހޭ 5،000 އާއިލާ އެބަ ތިބި ކަމަށާއި، އެއާއިލާތަކަށް ކައިރީގަ އޮތް ހުޅުމާލެއިން 700 އަކަފޫޓުގެ 5،000 ގޯތި ދެވޭނެކަމަށް އެމްޑީޕީގެ ރިޔާސީ ޕްރައިމަރީގައި މިހާރު ވާދަ ކުރައްވަމުން ގެންދަވާ މުހައްމަދު ނަޝީދު ވިދާޅުވެއްޖެއެވެ.
ހުޅުމާލެއަކީ ޕްލޭން ކުރެވިގެން، ތަރައްގީގެ ބޮޑެތި މަޝްރޫއުތައް ތަންފީޒު ކުރުމަށް ބޮޑު ޚަރަދެއް ކުރެވިގެން ތަރައްގީ ކުރެވެމުންދާ ސިޓީއަކަށްވާއިރު، މި ޕްލޭންތަކާއެކުވެސް ހުޅުމާލޭގައި މިހާރު ހުސްކޮށް ހުރި ހުރިހާ ބިންތަކުން އާންމުންނަށް ގޯތި ދޭނެ ގޮތުގެ އެއްވެސް ތަފްސީލެއް ދެއްވުމަކާއި ނުލާ، ނަޝީދު ވިދާޅުވީ ހުޅުމާލޭގައި ތަރައްގީ ނުކޮށް އޮތް 4 މިލިއަން އަކަފޫޓުގެ ބިން އެބައޮތް ކަމަށެވެ.
ހުޅުމާލޭގައި ތަރައްގީ ނުކޮށް އޮތް ހަތަރު މިލިއަން އަކަފޫޓުގެ ބިމުން 700 އަކަފޫޓުގެ 5،000 ގޯތި އެ ރައްޔިތުންނަށް ދެވޭނެ.
ހުޅުމާލޭގައި ހުސްކޮށް އޮތް ހުރިހާ ބިމަކުން ގޯތި ދެއްވާނެކަމަށް ނަޝީދު ވިދާޅުވިއެވެ.
މިހާރު ކުރިޔަށްދާ އަމިއްލަފުޅު "ފިކުރެއްގެ ދިރުން" ކެމްޕޭންގެ ފަރާތުން މާލޭގައި ޖަގަހައެއް ހުޅުވުމަށް ބޭއްވުނު އެއްވުމުގައި ވާހަކަ ދައްކަވަމުން ނަޝީދު ވިދާޅުވީ އެމްޑީޕީގެ ފުރަތަމަ ވެރިކަމުގައި ހުޅުމާލެ އިން 250 ގޯތި ދޫކޮށްފައިވާނެ ކަމަށެވެ. އަދި ހުޅުމާލެއިން ދޫކުރި ގޯތިތަކުގައި މީހުން ދެތިން އަހަރުތެރޭ ގެދޮރުއަޅާ ދިރިއުޅެން ފަށާފައިވާކަމަށްވެސް ނަޝީދު ވިދާޅުވިއެވެ.
ރޭ ބޭއްވުނު ޖަގަހަ ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވީ މާލޭގައި ގެދޮރު ނެތި ދިރިއުޅެމުންދާ 5،000 އާއިލާއެއް މިހާރުން މިހާރަށް އެހެން ތަނަކަށް ބަދަލު ކުރާންޖެހޭ ކަމަށެވެ. އަދި ވިދާޅީ އެކަން ކުރަން މިހާރުން މިހާރަށްވެސް ލަސްވެފައި ވާކަމަށެވެ.
އަޅުގަނޑުމެންނަށް އެ 5،000 އާއިލާ އެބަ މިން އެޅޭ. އެބަ އެނގޭ. އެމީހުންނަށް މިހާރުން މިހާރަށް އަޅުގަނޑުމެން ގޮތެއް ހޯދައިދޭން އެބަ ޖެހޭ.
މާލޭގައި ގެދޮރު ނެތި ދިރިއުޅެމުންދާ ކަމަށް ނަޝީދު ވިދާޅުވާ 5،000 އާއިލާ ހުޅުމާލެއަށް ބަދަލުކޮށް، ހުޅުމާލޭގައި ހުސްކޮށް އޮތް ހުރިހާ ބިމެއްގައި އެ އާއިލާތައް ގެދޮރުވެރި ކުރުވާނެކަމަށް ވައުދުވަމުން ނަޝީދު ވިދާޅުވިއެވެ.
މި ޖަލްސާގައި ވާހަކަ ދައްކަވަމުން ނަޝީދު ވިދާޅުވީ ރައީސް ސާލިހުގެ ސަރުކާރުން ބޯހިޔާވަހިކަން ފޯރުކޮށްދިނުމުގެ މަޝްރޫއުތައް ފެއްޓެވީ މާލަހުން ކަމަށާއި އަދި ގޯތި ދެއްވުމަށް ވައުދުވަނީވެސް މާ މަދުން ކަމަށެވެ.
އެހެންވީމާ އަދި އެ މަޝްރޫއިން މީހުންނަށް ބޯހިޔާވަހިކަން މިއަންނަ އަހަރުވެސް އޭގެ އަނެއް އަހަރުވެސް ފޯރުކޮށްދިނުމަށް އަޅުގަނޑަށް ފެންނަ ތަނުގައި ދަތިވާނެ.
ނަޝީދު ވިދާޅުވިއެވެ.
ޕްލޭންކޮށް ތަރައްގީ ކުރަމުންދާ ބޮޑު ސިޓީއެއްގައި، ހުސްކޮށް ހުރި ހުރިހާ ބިމަކުން ގޯތި ދޫކުރާނީ ކިހިނެއް؟
ކަރީގަ އޮތް ހުޅުމާލެއިން 5،000 ގޯތި ދެއްވާނެކަމަށް ނަޝީދު ވައުދުވާއިރު، އެއީ ހަމައެކަނި ކެމްޕޭނަށް އަމާޒުކޮށް ދައްކަވާ ވާހަކަފުޅެއް ކަމުގައި ބައެއް ފަރާތްތަކުން ދެކެއެވެ. ސަބަބަކީ ހުޅުމާލޭގައި ހުސްކޮށް ހުރި ގިނަ ބިންތަކުގައި ބޮޑެތި އިންވެސްޓްމަންޓްތައް ކުރުމަށް އެޗްޑީސީން މިހާރުވެސް ޕްލޭންތައްކޮށް، ބޮޑެތި ޚަރަދުތަކެއް އެ ޕްލޭންތަކަށް ބޮޑެތި ޚަރަދުތައްވެސް ކޮށްފައިވާތީއެވެ.
މިގޮތުން ހުޅުމާލޭގެ ޕްލޭންތަކަށް ބަދަލު ގެނައުމަކީ މާލީގޮތުންނާއި އަދި ގާނޫނީގޮތުންވެސް ބޮޑެތި މައްސަލަތަކެއް ކުރިމަތިވެ، އެތައް ޒަމާނަކުއްސުރެ ކުރަމުން އައިސްފައިވާ ބައެއް ޕްލޭންތަކަށް ބޮޑެތި ބައެއް ބަދަލުތަކެއް ގެނައުމަށް މަޖުބޫރުވެގެން ދާނެކަމަކަށް ވާތީވެސްމެއެވެ. އަދި ހުޅުމާލޭގައި ތަރައްގީ ނުކޮށް 4 މިލިއަން އަކަފޫޓު އޮތްކަމަށް ވިދާޅުވާއިރު، މި މިންވަރަށް ހަގީގަތުގައިވެސް ގެދިޅު އެޅޭގޮތަށް ހުޅުމާލޭގައި ތަރައްގީ ނުކޮށް ބިން އޮތްތޯވެސް ޔަގީން ވާންޖެހެއެވެ.
ސަބަބަކީ ރައްޔިތުނަށް މިހާރު އެންމެ ބޮޑަށް ބޭނުން ޖެހިފައިފާ އަސާސީ ޚިދުމަތަކާއި މަތިކޮށް ކެމްޕޭނެއްގައި ވާ މިބާވަތުގެ ބޮޑެތި ވައުދުތަކުގެ ހުވަފެންތަކުގައި ހަގީގަތުގައިވެސް ރައްޔިތުން ބަދެވިގެން ދާތީއެވެ. ހަމަ އެއާއެކު، މާސްޓަރ ޕްލޭނަކާއެކު އެޗްޑީސީން ތަރައްގީ ކުރަމުންދާ ހުޅުމާލޭގެ ބިންތައް، ގޯތި ދޫކުރުމަށް ބޭނުން ކުރުމަށް ކެމްޕޭނެއްގައި ވައުދުވާއިރު، ތަންފީޒު ކުރެވެމުންދާ މިފަދަ މާސްޓަރ ޕްލޭނަކަށް ބަދަލު ގެނެވިގެންދިއުމަކީ ހަގީގަތުގައިވެސް ކުރެވިދާނެ ކަމެއްތޯވެސް ރައްޔިތުންނަށް ސިޔާސީ ވެރީން ޔަގީން ކޮށްދޭން ޖެހޭކަމުގައިވެސް ދަންނަވާން ޖެހެއެވެ.
މިގޮތުން، ހަމައެކަނި ސިޔާސީ ޕޯޑިއަމެއްގައި ވާވައުދަކަށްވުރެ ބޮޑަށް، ތަރައްގީ ކުރެވެމުންދާ ބޮޑު ސިޓީއެއްގައި، އަދި ބިމުގެ ތަނަވަސްކަންވެސް ސިޓީގެ ޚިދުމަތްތަަކަށް އެންމެ އެކަށީގެންވާވަރަށް އަދިވެސް ނެތް ތަނެއްގައި، ހުސްކޮށް ހުރި ހުރިހާ ބިންތަކެއްގައި ގެދޮރު އަޅުއްވާނެކަމަށް ވައުދު ވުމަށްވުރެ، އެއީ ހަގީގަތުގައިވެސް ކުރެވޭނެ ކަމެއްކަމަށް މޭރުންކޮށްދޭ ޕްލޭނެއް، ވައުދުވާ ފަރާތްތަކުން ހުށަހަޅުއްވަން ޖެހޭކަމުގައިވެސް ދަންނަވާން ޖެހެއެވެ.
ސިޔާސީ ވެރިންގެ ވައުދުތައް!
ރާއްޖޭގެ ފާއިތުވި 20 ވަރަކަށް އަހަރުއްސުރެ ބޮޑު މައްސަލައެއްގެ ގޮތުގައި އާންމު ރައްޔިތުން ތަހައްމަލް ކުރަމުން އަންނަ ބޯހިޔާވަހި ކަމުގެ ވައުދަކީ ކޮންމެ ރިޔާސީ އިންތިޚާބަކާއި ގުޅިވައިގެންވެސް ސިޔާސީ ވެރީން ވަމުން އަންނަ ވައުދެކެވެ.
އެވައުދު ސިޔާސީ ވެރީންނަށް މުހިންމު ވެގެންދަނީވެސް ސަބަބުތަކެއް ހުރެގެން ކަމުގައިވެސް ދަންނަވާން ޖެހެއެވެ. ސަބަބަކީ ރާއްޖޭގެ އާންމު ރައްޔިތުންނަށް މިއަދު ކުރިމަތިވެފައިވާ އެންމެ ބޮޑު ގިލަންވެރިކަމަކީ ހަގީގަތުގައިވެސް ބޯހިޔާވަހިކަމުގެ މައްސަލައަށް ވާތީއެވެ. އަދި އެމައްސަލަ ހައްލުކޮށްދޭން ވާ ވައުދުތަކަށް އިތުބާރުކޮށް ރައްޔިތުން ވޯޓު ދެމުންދާތީވެސްމެއެވެ.
އޭގެ ނަތީޖާއެއްގެ ގޮތުން ފާއިތުވި ހުރިހާ އިންތިޚާބެއްގައިވެސް ސިޔާސީ ބޭފުޅުންވަނީ، އާންމު ރައްޔިތުންނަށް ބޭނުން ޖެހިފައިވާ މި އަސާސީ ޚިދުމަތް ފުރިހަމަ ކޮށްދެއްވާނޭކަމުގެ ވައުދުތައް ވެވަޑައިގެންފައެވެ.
އަދި މި ވައުދުތަކާއެއް ގޮތަށް މި ސަރުކާރުންވެސް މާލޭގަ ދިރިއުޅެމުންދާ އާންމު ރައްޔިތުންގެ ބޯހިޔާވަހިކަމުގެ މައްސަލައަށް ހައްލު ހޯދާދިނުމަށް ހުޅުމާލޭގައި ފްލެޓް އެޅުމުގެ ބޮޑެތި ބައެއް މަޝްރޫއުތައް މިހާރު ކުރިޔަށް ގެންދަމުންދާކަންވެސް ފާހަގަ ކޮށްލާން ޖެހެއެވެ. އޭގެ ތެރޭގައި މާލޭ ސަރަހައްދުގައި މިސަރުކާރުން މިހާރުދަނީ 16،000 ޔުނިޓެގެ ހައުސިން މަޝްރޫއުތައް ކުރިޔަށް ގެންދަމުންނެވެ.
އެހެންނަމަވެސް، އެއާއި ޚިލާފަށް، މިއަދު ރައްޔިތުން އެންމެ ބޮޑު ސަމާލުކަމެއް ދޭން ޖެހިފައިވަނީ، ހަމަ އެކަނި ކެމްޕޭންތަކަށް އަމާޒުކޮށް ޕޯޑިއަމްތަކުގައި ސިޔާސީ ބޭބޭފުޅުން ވަމުންދާ ބޮޑެތި ވައުދުތަކާމެދުއެވެ. އެއްވެސް ޕްލޭނެއް ހުށަހެޅުއްވުމަކާ ނުލާ، ކުރައްވާނެކަމަށް ވިދާޅުވެ ސިޔާސީ ވެރިން ދައްކަވަމުން ގެންދަވާ ވާހަކަފުޅު ތަކަށެވެ.
ރާއްޖޭގައި ބޭއްވެމުންދާ ކޮންމެ ކެމްޕޭނަކާއިވެސް ދިމާކޮށް، ވޯޓު ހޯދުމަށް އެކަނި އަމާޒުކޮށް، ނުފުއްދޭނެ ވަރުގެ ބޮޑެތި ވައުދުތައް ސިޔާސީ ފަރާތްތަކުން ވަމުން ދިއުމަކީ އާންމު ކަމެކެވެ. އަދި ބައެއް ސިޔާސީ ލީޑަރުން މި ބީދައިން ދައްކަވާ ވާހަކަތަކަށް އިތުބާރުކޮށް، ފޮނި އުއްމީދުގައި މި ވައުދުތަކަށް ބައެއް ރައްޔިތުން ވޯޓުދީ، ވައުދު ނުފުއްދި، ވެރިކަން ނިމޭއިރު ވޯޓުދިން ގިނަބަޔަކު މަގުމަތި އަބަދުވެސް ވެގެން ދިއުމަކީ ރާއްޖެއިން އާންމުކޮށް ފެންނަމުންދާ މަންޒަރެއްކަންވެސް ފާހަގަ ކޮށްލާން ޖެހެއެވެ.
