މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، އެޕާޓީގެ ރައީސް މުހައްމަދު ނަޝީދުގެ އާ ކެމްޕޭން ޖަގަހައެއް މިރޭ މާލޭ ސިޓީގައި ހުޅުވައިފިއެވެ.
"ފިކުރެއްގެ ދިރުން" ނަމުގައި ތައްޔާރު ކޮށްފައިވާ މި ޖަގަހަ ހުޅުވާފައިވަނީ އަމީރުއަހުމަދު މަގުގައި، ދަރުމަވަންތަ ސްކޫލް ކުރިމަތީގައި، ހ، ފޭރުގަސްދިށު ގޭގައެވެ.
ނަޝީދުގެ ކެމްޕޭންއިން ހާމަ ކޮށްފައިވާ ގޮތުގައި މިރޭގެ ޖަގަހަ ހުޅުއްވުމަށްފަހު މާލޭގެ ބޯހިޔާވަހިކަމާ ގުޅޭގޮތުން ނަޝީދު ގެންގުޅުއްވާ ސިޔާސަތުގެ މައްޗަށް އެމަނިކުފާނު މިރޭ ވާހަކަފުޅުދައްކަވާނެއެވެ.
ނަޝީދު އާ ކެމްޕޭން ޖަގަހައެއް މިރޭ ހުޅުވާފައިވާއިރު، ނަޝީދުއާއި ކެމްޕޭންގައި ވާދަ ކުރައްވަމުން ގެންދަވާ ރައީސް ސާލިހު މިރޭ ވަނީ އެމަނިކްފާނުގެ ޕްރައިމަރީގެ ކެމްޕޭންގެ މާލޭ ދާއިރާތަކުގެ ކެމްޕޭން ޓީމުތަކާ ބައްދަލު ކުރައްވާފައެވެ.
މި ބައްދަލު ކުރެއްވު ކުރިޔަށް ގޮސްފައިވަނީ އެމްޑީޕީގެ ދަނޑި ކޮށި ޖަގަހައިގައެވެ.
ރައީސް ސާލިހު މިރޭ، ކެމްޕޭންގެ މާލޭ ދާއިރާތަކުގެ ޓީމްތަކާއި ބައްދަލު ކުރައްވާފައިވާއިރު، ފާއިތުވެދިޔަ 3 ދުވަހު އެމަނިކްފާނު ކެމްޕޭން ކުރައްވާފައިވަނީ، މާލެ ފިޔަވާ ރާއްޖޭގެ އެންމެ ބޮޑު އާބާދީއެއް އޮންނަ އައްޑޫ ސިޓީގައެވެ.
އެމްޑީޕީގެ ކުރިޔަށް އޮތް ރިޔާސީ ޕްރައިމަރީގައި އެ ޕާޓީގެ އެންމެ އިސް ދެ ލީޑަރުން ވާދަކުރައްވާއިރު، ދެބޭފުޅުންވެސް ގެނަދަވަނީ ފޯރިއާއެކު ކެމްޕޭން ކުރައްވަމުންނެވެ. ޕްރައިމަރީގެ ވޯޓުލުން ބޭއްވުމަށް ހަމަޖެހިފައިވަނީ މިމަހުގެ 28 ވަނަ ދުވަހުއެވެ.
