ރާއްޖޭގެ ރިޔާސީ ނިޒާމް އެކުލަވާލެވިފައި އޮތީ ފުރަތަމަ ބުރުގައި އިންތިހާދު ވާގޮތަކަށް ނޫންކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިހާރު ކުރިޔަށްދާ އަމިއްލަފުޅު ކެޕްމޭން ހަރަކާތްތަކާއި ގުޅޭގޮތުން މިއަދު ނޫސްވެރިންނާއި ބައްދަލުކޮށް ވާހަކަ ދައްކަވަމުން ނަޝީދު ވިދާޅުވީ ރައްޔިތުންގެ ބޭނުންވާގޮތް ހާމަކުރުމަށް ރައްޔިތުންނަށް ފުރުސަތު ދޭން ޖެހޭކަމުގައެވެ.
އެމްޑީޕީއަށް ކިހާބައެއްތޯ ތާއީދުކޮށް ތިބެން ބޭނުންވަނީ، ޖުމުހޫރީ ޕާޓީއަށް ކިހާބައެއްތޯ، އަދާލަތު ޕާޓީއަށް ކިހާބައެއްތޯ، ދެން އެހެންވެސް ޕާޓީތަކަށް ކިހާބައެއްތޯ. އަޅުގަޑު ދެކޭގޮތުގައި ރައްޔިތުންގެ ފުރުސަތުތަކެއް ނަގާލުން، އެއީ ފުރަތަމަ ބުރުގަ ޓްރާންސެކްނަލް ގޮތަކަށް ޕާޓީތަކާ މުއާމަލާތް ކޮށްގެން.. ޓްރާންސެކްޝަނަލް ގޮތޭ އަޅުގަޑު މިދަންނަވަނީ ގެނެވިއްކުމުގެ އުސޫލުން ސިޔާސީ ހަރަކާތް ހިންގުން.
ނަޝީދު ވިދާޅުވިއެވެ.
ނަޝީދު ވިދާޅުވީ ގަނެއްވިއްކުމުގެ އުސޫލުން އެހެން ޕާޓީތަކާއި ވާހަކަ ދައްކައިގެން، ރައްޔިތުނަށް އޮތް ފުރުސަތު ފުރަތަމަ ބުރުގައި ނަގާލުމަކީ އެންމެ ރަގަޅުގޮތެއް ކަމުގައި ދެކެވަޑައިނުގަންނަވާ ކަމުގައެވެ.
ނަޝީދު ވިދާޅުވީ ގަނެއްވިއްކާ އުސޫލުން ސިޔާސީ އެއްބަސްވުންތައް ވެެގެން ސިޔާސީ ހަރަކާތް ހިންގުމަކީ ޑިމޮކްރަސީއަށް އެޅޭ ހުރެހެއް ކަމުގައެވެ. އިތުރަށް ވިދާޅުވިގޮތުގައި ޑޮމިކްރަޓިކް ނިޒާމު ގަޑުބަޑު ނުކޮށް ކުރިޔަށް ގެންދިއުމަކީ ބޭނުންތެރިކަމެއް ކަމުގައެވެ.
ކުރިޔަށް އޮތް ރިޔާސީ އިންތިޚާބުގެ ފުރަތަމަ ބުރުގައި އެއްވެސް ޕާޓީއަކާއެކު ކޯލިޝަން ނުހައްދަވާނެކަމަށް ނަޝީދު ވިދާޅުވިއިރު، ކުރިޔަށްދާ ޕްރައިމަރީ ކެމްޕޭންގައި ރައީސް ސާލިހު ވިދާޅުވަމުން ގެންދަވަނީ، އެމްޑީޕީއަށް ގިނިކަންޏާ އިންތިޚާބު ކާމިޔާބު ނުކުރެވޭނެކަމަށާއި، އެމަނިކްފާނު މެނުވީ ކޯލިޝަނަކާއެކީ ވެރިކަން ކުރެއްވޭނެ ބޭފުޅަކު އެމްޑީޕީގައި ނެތްކަމަށެވެ.
އަދި އެމަނިކްފާނުގެ މިދައުރުވެސް ފުރިހަމަ ކުރައްވާނީ ކޯލިޝަންއަކާ އެކީކަމަށް ވިދާޅުވަމުން، ރައީސް ސާލިހު ވިދާޅުވަމުން ގެންދަވަނީ ކޯލިޝަން ހެއްދުމަށް ހުރިހާ ޕާޓީއަކާއެކީވެސް ވާހަކަ ދައްކަވާނެކަމުގައެވެ.
