މިސަރުކާރުގެ ގިނަ މަސައްކަތްތައް ހުރީ އަންނީ އަންނީ އެއްގައި ކަމަށްބުނެ ރިޔާސީ ޕްރައިމަރީގެ ވާދަވެރިޔާ ކުރީގެ ރައީސް މުހައްމަދު ނަޝީދު ދެއްކެވި ވާހަތަކަށް ރައީސް ޞާލިހު ރައްދު ދެއްވައިފިއެވެ.
ނަޝީދު ބޭއްވި ކެމްޕެއިނު ޖަލްސާއެއްގައި ވަނީ މި ސަރުކާރުގެ ޝިއާރަކީ ތަރައްގީ "އަންނަނީ، އަންނަނީ" ކަމަށް ވިދާޅުވެ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
ސަރުކާރުގެ ސްލޯގަން އަކީ ޝިއާރަކީ އޮލިމްޕަހުގައި އަޅުވާނެ އަންނަނީ، އަންނަނީ، ދެން އަންނަނީ މިއަންނަ ކުއާޓާގައި އަންނާނެ ދެން އަންނަ ކުއާޓާގައި އަންނާނެ. އަންނަނީ، މިފިލްމެއް ނުއެއް ފެނުނު. ހަމަ އަންނަނީ.
– ނަޝީދު ވިދާޅުވިއެވެ.
ނަޝީދު އަށް ރައްދު ދެއްވަމުން އައްޑޫ މީދޫގައި މިއަދު ބޭއްވި ކެމްޕެއިނު ހަރަކާތެއްގައި ރައީސް ވިދާޅުވީ ހަމައެކަނި އައްޑޫއަށް ބެލި ނަމަވެސް ފެންނަނީ ކަންކަން ނިމިފައިވާ މަންޒަރު ކަމަށެވެ. މީދޫގައި ބޭއްވި ކެމްޕެއިން ޖަލްސާގައި ރައީސް އިބްރާހިމް މުހައްމަދު ސޯލިހު އެހެން ވިދާޅުވީ، މި ސަރުކާރުން ފަށާފައިވާ ބައެއް ކަންކަން އަދިވެސް ނުނިމި "ކުރިއަށް ދަނީ" ކަމަށް ވިދާޅުވެ، ވާދަވެރިޔާ ކުރީގެ ރައީސް މުހައްމަދު ނަޝީދުގެ ކެމްޕެއިން ޓީމުން އެކި ޕްލެޓްފޯމުތަކުގައި "މަލާމާތް" ކުރަމުންދާ ދަނޑިވަޅެއްގައެވެ.
އެކަމަކު ރައީސް އިބްރާހިމް މުހައްމަދު ސޯލިހު މިއަދު ވިދާޅުވީ، ހުޅުމީދޫ ދާއިރާގެ ގިނަ ކަންކަން ނިންމާލާފައިވާ ކަމަށެވެ. އޭގެ ތެރޭގައި މީދު އާއި ހުޅުދޫގެ ސިއްހީ މަރުކަޒުގެ މަސައްކަތާއި ހުޅުމީދޫ ބޮޑުމަގާއި ޓޫރިޒަމް ޒޯނާއި ބަނދަރުގެ މަސައްކަތެވެ.
ބިން ހިއްކުން ކޮންޓްރެކްޓް ކުރެވިއްޖެ. އިޖުތިމާއީ މަރުކަޒު ޓެންޑަ ކުރެވިފައި. ފުޓުބޯޅަ ދަނޑު އަޕްގްރޭޑް ކުރެވިއްޖެ. ނިމިއްޖެ. ގޮނޑުދޮށް ހިމާޔަތްކޮށް ނިމިއްޖެ. ދެން އެހެން ގޮސް ނިމިއްޖެ ނިމިއްޖެ ކިޔަން ވެއްޖިއްޔާ އަޅުގަނޑަށް މިތާ ހުރެ ދިގު ލިސްޓެއް ކިއިދާނެ.
– ރައީސް ވިދާޅުވިއެވެ.
ރައީސް ވިދާޅުވީ، ހުޅުމީދޫގެ ބައެއް މީހުންނާ ބައްދަލުވެ ހުށަހެޅި ކަންކަން ނިންމަން މަސައްކަތް ކުރައްވާނެ ކަމަށެވެ. ހާއްސަކޮށް މީދޫން ހުށަހެޅި ބައެއް ކަންކަން މިހާރުން މިހާރަށް ވެސް ނިންމޭނެ ކަމަށް ވިދާޅުވިއެވެ. ރައީސް އިތުރަށް ވިދާޅުވީ އައްޑޫ ސިޓީގެ މަޝްރޫއުތައް ކުރިއަށް ގެންދަމުން އަންނަނީ އައްޑޫ ސިޓީގެ ރައްޔިތުން އަތުން، ލިޔެ ތައްޔާރު ކުރި މެނިފެސްޓޯގައި ވާ ގޮތަށް ކަމަށެވެ.
