ނޫސްވެރިކަމުގެ މިނިވަންކަމަކީ ގާނޫނުއަސާސީގެ 28 ވަނަ މާއްދާ އިން ކަށަވަރު ކޮށްދީފައިވާ ހައްގަކަށްވާއިރު ފަހަކަށް އައިސް އެ މަސައްކަތަށް ހުރަސް އެޅެމުންދާ ކަމުގެ ޝަކުވާ މީޑިއާ ކައުންސިލަށް ލިބެމުންދާ ކަމުގައި އެކައުންސިލުން ބުނެފިއެވެ.

މީޑިއާ ކައުންސިލުން ނެރެފައިވާ ބަޔާނެއްގައި އެ ކައުންސިލުން ބުނެފައިވަނީ، މުޒާހަރާތަކާއި އެހެނިހެން ހަރަކާތްތައް ރައްޔިތުންނާ ހަމައަށް ފޯރުކޮށްދިނުމަށް މަސައްކަތް ކުރާ ނޫސްވެރިންނަށް ހުރަސް އެޅުމާއި ބައެއް ނޫސްވެރިންނަށް އަނިޔާ ލިބެމުންދާ ކަމުގެ ޝަކުވާއަކީ އެ ކައުންސިލުން ނުހަނު ކަންބޮޑުވާ ކަމުގައެވެ. މިގޮތުން ބައެއް މުޒާހަރާތަކާއި އެއްވުންތަކުން ނޫސްވެރިން ހައްޔަރުކުރާކަމުގެ، ޝަކުވާތަކާއި ގުޅިގެން ކަމާ ގުޅުންހުރި އިދާރާތަކާ އެކައުންސިލުން މަޝްވަރާކޮށް އަލިމަގެއް ހޯދުމުގެ މަސައްކަތް ކުރަމުންދާ ކަމުގައިވެސް މީޑިއާކައުންިސލްގެ ބަޔާނުގައި ހާމަކޮށްފައި ވެއެވެ.

މީޑިއާ ކައުންސިލުން ބުނެފައިވަނީ، މުޒާހަރާތަކާއި އެހެނިހެން ހަރަކާތްތައް ގެނެސްދޭ ނޫސްވެރިންނަށް، ގާނޫނު އަސާސީ އިން ކަށަވަރު ކޮށްދޭ ހައްގު ފުރިހަމަ ގޮތުގައި ބޭނުންކުރެވޭނެގޮތް ހަދާދީ، ކަމާ ގުޅުންހުރި އިދާރާތަކުން އެއްބާރުލުން ދޭންޖެހޭނެކަމަށް އެ ކައުންސިލުން ދެކޭކަމުގައެވެ.

ހަމައެއާއެކު މުޒާތައްފަދަ ހަރަކާތްތައް ކަވަރު ކުރުމުގައި ނޫސްވެރިކަމުގެ އަޚްލާގީ މިންގަނޑަށް ތަބާވެ، ގާނޫނު އަސާސީ އާއި ގާނޫނުތަކާ އެއްގޮތަށް އަމަލުތައް ބެހެއްޓުމަށްވެސް އެ ކައުންސިލުން ވަނީ އިލްތިމާސް ކޮށްފައެވެ..