މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައީސް އިބުރާހިމް މުހައްމަދު ސާލިހު، މާލޭގެ ހެންވޭރު އަވަށުގައި ދިރިއުޅޭ އެމްޑީޕީގެ މެމްބަރުންގެ ގޭގެއަށް ޒިޔާރަތް ކުރައްވައިފިއެވެ. އަދި މިއަދު ރައީސް ސާލިހުވަނީ ހެންވޭރުގައި އެމަނިކްފާނުގެ އާ ކެމްޕޭން ޖަގަހައެއްވެސް މިއަދު ހުޅުވާފައެވެ.
މިޖަގަހަ ހުޅުވާފައިވަނީ އިބޫ ޖަގަހައިގެ ނަމުގައި ހެންވޭރު އުތުރު ދާއިރާގައެވެ.
އެމްޑީޕީގެ ޕްރައިމަރީ ކެމްޕޭންގައި، ހެންވޭރުގައި ދިރިއުޅޭ އެމްޑީޕީގެ މެމްބަރުންގެ ގޭގެއަށް މިއަދު ކުރެއްވި ޒިޔާރަތުގައި އެމްޑީޕީގެ ބައެއް މަޖިލިސް މެމްބަރުންގެ އިތުރުން ކެބިނެޓްގެ ބައެއް ވަޒީރުންވެސް ވަނީ ބައިވެރިވެ ވަޑައިގެންފައެވެ.
މިމަހު 28ގައި ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީން ޓިކެޓް ކަށަވަރު ކުރެއްވުމަށް ރައީސް ސާލިހު ކުރައްވަމުން ގެންދަވާ ކެމްޕޭންގެ ތެރެއިން އެމަނިކްފާނުވަނީ އިއްޔެ ހުޅުމާލޭގެ އެމްޑީޕީގެ މެމްބަރުންގެ ގޭގެއަށް ޒިޔާރަތްކޮށް، އަދި ރޭ ހުޅުމާލޭގެ ރައްޔިތުންނާއި ބައްދަލުކުރެއްވުމަށް ޚާއްސަ ބައްދަލުވުމެއްވެސް ބާއްވާފައެވެ.
އަދި މާއްދަމާ ކެމްޕޭން ދަތުރެއްގައި ރައީސް ސާލިހު އައްޑު އޮތޮޅަށް ވަޑައިގަންނަވާނެއެވެ.
މި ކެމްޕޭންގައި ރައީސް ސާލިހުއާއި ވާދަކުރައްވާ، އެމްޑީޕީގެ ރައީސް މުހައްމަދު ނަޝީދު ރ. އަތޮޅާއި އަދި ބ. އަތޮޅަށް ކުރެއްވި ކެމްޕޭން ދަތުރެއް ނިންމަވާލެއްވުމަށްފަހު މިއަދު ހަވީރު އެމްޑީޕީގެ އާންމު މެމްބަރުންނާއި ބައްދަލު ކުރެއްވުމަށް ހަމަޖެހިފައިވަނި ރާޅުގަޑު ސަރަހައްދުގައެވެ.
ކޮމެންޓު ފޮނުވާ