އެމްޑީޕީގެ މިހާރު ކުރިޔަށްދާ ޕްރައިމަރީ ކެމްޕޭންގައީ، ރައީސް ސާލިހު ވެރިކަމުން ބާލާނެކަމަށް ވިދާޅި ނަޝީދު ދެއްކެވި ވާހަކަފުޅަށް ރައީސް ސާލިހު ރައްދު ދެއްވައިފިއެވެ
ހުޅުމާލޭގައި ދިރިއުޅުއްވާ އެމްޑީޕީގެ މެމްބަރުންނާއި ބައްދަލު ކުރެއްވުމަށް ރޭ “އެމްޑީޕީ ކުރިޔަށް“ ކެމްޕޭއިން އިންތިޒާމްކޮށްގެން ބޭއްވި ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ އެމަނިކްފާނަށް ވެރިކަން ދިނީ ނަޝީދުކަމަށް، ނަޝީދު ވިދާޅުވަމުން ގެންދަވާ ކަމަށެވެ.
ރައީސް ވިދާޅުވީ މި ދެކެވޭ ވާހަކައާއިމެދު ފުންކޮށް ވިސްނާލަންޖެހޭ ކަމަށާއި، ވެރިކަމަކީ އެންމެ ފަރާތަކުން މިންވަރުކުރައްވާ ކަމެއް ކަމަށެވެ.
އެއްކަމަކަށް މިއަދު އަޅުގަޑަށް ފާހަގަވީ ސުރުޙީއެއްގައި އޮތީ، ވެރިކަން ދިނީވެސް ތިމަންނައޭ، ވެރިކަން ބަދަލު ކުރާނީވެސް ތިމަންނައޭ.. ވަރަށް ފުންކޮށް ވިސްނަން އެބަޖެހޭ. ކާކަށްތޯ އެހެން މީހަކަށް ވެރިކަމެއް ދެވޭނީ.. ވެރިކަން ބަދަލު ކުރެވޭނީ.. އަޅުގަޑު ހިތުން އިންސާނުންނަށް، ﷲގެ އަޅުންނަށް އޮންނަކަމަކީ މަސައްކަތް ކުރުން. ވެރިކަމަކީ އެފަރާތުން ދެއްވާ އެއްޗެއް.
ރައީސް ސާލިހު ވެރިކަމަށް ގެނައީވެސް، އަދި ބާލާނީވެސް އެމަނިކްފާނުކަމަށް ވިދާޅުވެ ނަޝީދު ދެއްކެވި ވާހަކަފުޅަށް ފާޑު ވިދާޅުވަމުން ރައީސް ސާލިހު ވިދާޅުވިއެވެ.
މި ޖަލްސާގައި އިތުރަށް ވާހަކަ ދައްކަވަމުން ރައީސް ވިދާޅުވީ، އެމަނިކުފާނަށް ވެރިކަމަށް އާދެވުނީ "އިރާދަފުޅާއެކު" އެތައް ބައެއްގެ ތާއީދާ ވޯޓާއެކު ކަމަށެވެ.
އެންމެ މީހެއްގެ ތާއީދާއެކުއެއް ނޫން. އަޅުގަޑަށް މި މަގާމްގައި ދެމި މިހުރެވެނީވެސް އެންމެ މީހެއްގެ ތާއީދާއެކީއެއް ނޫން. ﷲގެ އިރާދަފުޅުން، ތި ހުރިހާ ބޭފުޅުންގެ ތާއީދާ މަދަދާއި އެއްބާރުލުމާއެކީގަ.
ވެރިކަމަށް އާދެވުނީ އެތައް ބައެއްގެ ބުރަ މަސައްކަތުން ކަމުގައި ވިދާޅުވަމުން މި ބައްދަލުވުމުގައި ރައީސް ސާލިހު ވިދާޅުވިއެވެ.
ރައީސް ވިދާޅުވީ ހުއްޓި ތިބެވޭކަށް ނެތް ކަމަށާއި، އެމްޑީޕީ ދާނީ އަބަދުވެސް ކުރިޔަށް ކަމުގައެވެ.
ކޮމެންޓު ފޮނުވާ