މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައީސް އިބުރާހިމް މުހައްމަދު ސާލިހު، މާފަންނު ހުޅަނގު ދާއިރާ އެމްޑިޕީގެ މެމްބަރުންގެ ގޭގެއަށް ޒިޔާރަތް ކުރައްވައިފިއެވެ.

މިއަދު ހަވީރު ރައީސް ސާލިހު މާފަންނު އުތުރު ދާއިރާގައި ދޮރުން ދޮރަށް ހިންގަވާ އެދާއިރާގެ އެމްޑީޕީގެ މެމްބަރުންނާއި ބައްދަލު ކޮށްފައިވާއިރު، އެމްޑީޕީގެ މާލޭ ދާއިރާގެ މެމްބަރުންނާއި އަދި އޭގެ އިތުރުން ކެމްޕޭން ޓީމުތަކާއި މިރޭ ރައީސް ސާލިހު ބައްދަލު ކުރައްވާގޮތަށް ވަނީ ހަމަޖެހިފައެވެ.

އެމްޑީޕީގެ ރިޔާސީ ޕްރައިމަރީގެ "އެމްޑީޕީ ކުރިޔަށް" ކެމްޕޭން ޓީމުން ހާމަ ކޮށްފައިވާ ގޮތުގައި، ކެމްޕޭން ޓީމުތަކާއި އަދި މާލޭގެ ދާއިރާގެ މެމްބަރުންނާއި ރައީސް ސާލިހު ބައްދަލު ކުރުމަށް ހަމަޖެހިފައިވަނީ މިރޭ 8:30 ގައި ދަރުބާރުގޭގެ ފާށަނާ މާލަމްގައެވެ.

ރައީސް މިރޭ މާލޭގެ ކެމްޕޭން ޓީމުތަކާއި ބައްދަލު ކުރުމަށް ހަމަޖެހިފައިވާއިރު، މި ހަފްތާގައި ރައީސް ސާލިހުވަނީ 3 އަތޮޅަކަށް ދަތުރު ކުރައްވާ އެ އަތޮޅުތަކުގެ ރަށްތަކުގައި ތިބި އެމްޑީޕީގެ މެމްބަރުނާއި ބައްދަލުކޮށް ކެމްޕޭން ކުރައްވާފައެވެ.

މިގޮތުން އެންމެ ފުރަތަމަ ރައީސް ސާލިހު ވަޑައިގެންފައިވަނީ ރ. އަތޮޅަށެވެ. އަދި އެއަތޮޅުގެ ރ. މީދުގައި ޖަލްސާ ބޭއްވުމަށްފަހު ދެން ރައީސް ސާލިހު ވަޑައިގަތީ ނ. އޮތޮޅަށެވެ. ނޫނު އަތޮޅުގެ ރަށްތަކުގެ ތެރެއިން އެއަތޮޅު ވެލިދޫގައި ކެމްޕޭންގެ ބޮޑު ޖަލްސާއެއް ބޭއްވުމަށްފަހު ރައީސް ސާލިހު އިއްޔެވަނީ ބ. އަތޮޅުގެ ރަށްތަކަށް ޒިޔާރަތްކޮށް، ޕާޓީގެ މެމްބަރުންނާއި ބައްދަލު ކުރައްވާފައެވެ.

މި ދަތުރުފުޅުތަކުގެ ތެރެއިން ބ. އޭދަފުއްޓަށް ކުރެއްވި ދަތުރުފުޅުގައި އެރަށުގެ އެމްޑީޕީގެ މެމްބަރުންނާއި ބައްދަލުކުރައްވާ، ބ. ތުޅާދޫގައި އެއަރޕޯޓެއް އެޅުމަށް ކުރިޔަށް އޮތް 3 ހަފްތާ ތެރޭގައި ބަޔަކާއި ހަވާލު ކުރައްވާނޭކަމަށް ރައީސް ސާލިހު ވިދާޅުވެފައި ވެއެވެ. އަދި އެއަތޮޅު ދަރަވަންދޫގައި ވާހަކަ ދައްކަވަމުން ރައީސް ސާލިހު ވިދާޅުވެފައިވަނީ އެމަނިކްފާނުގެ ރިޔާސީ ފުރަތަމަ ދައުރު ފުރިހަމަ ކުރައްވާނީ ކޯލިޝަންއާއެކީ ކަމަށެވެ.

އެމްޑީޕީގެ ޕްރައިމަރީ ކެމްޕޭންގައި ވާދަކުރައްވާ އެޕާޓީގެ ރައީސް މުހައްމަދު ނަޝީދުވެސް ގެންދަވަނީ ކެމްޕޭން ކުރެއްވުމަށް ރަށްތަކަށް ދަތުރު ކުރައްވަމުންނެވެ.

އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28 ވަނަ ދުވަހުއެވެ.