އެމްޑީޕީ ޕްރައިމަރީ ކެމްޕެއިންގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ނ.އަތޮޅަށް ވަޑައިގެންފައިވާއިރު، އެމްޑީޕީގެ ރައީސް މުހައްމަދު ނަޝީދު ފ.އަތޮޅަށް ވަޑައިގެންފިއެވެ.
ނ. އަތޮޅަށް ކުރައްވާ މި ކެމްޕެއިން ދަތުރުފުޅުގައި ރައީސް ޞާލިހު ފުރަތަމަ ވަޑައިގަތީ ނ. ކެނދިކުޅުދޫ އަށެވެ. ކެނދިކުޅުދޫއަށް ވަޑައިގެން ރައީސް ވަނީ ސަޕޯޓަރުންނާ ބައްދަލުކުރައްވާފައެވެ. ނ. އަތޮޅަށް ވަޑައިގަތުމުގެ ކުރިން ރައީސް ސޯލިހް ވަނީ ރ. އަތޮޅަށް ވެސް ކެމްޕެއިނު ދަތުރުފުޅެއް ކުރައްވާފައެވެ. އަދި ރ. މީދޫގައި ރޭ ވަނީ ޕްރައިމަރީ ކެމްޕެއިން ޖަލްސާއެއް ވެސް ބާއްވާފައެވެ.
ކެމްޕޭންގައި ރައީސް ނަޝީދު މިއަދު ވަނީ ފ. ފީއަލީއަށް ވަޑައިގެން އެރަށުގެ ގޭގެއަށް ޒިޔާރަތް ކުރައްވާ ސަޕޯޓަރުންނާ ބައްދަލު ކުރައްވާފައެވެ. ރައީސް ނަޝިދު ފީއަލީއަށް ވަޑައިގެންނެވީ ހަތަރު އަތޮޅަކަށް އިއްޔެ ފެއްޓެވި ކެމްޕޭން ދަތުރުފުޅުގެ ތެރެއިންނެވެ. އއ. އަތޮޅާއި އދ. އަތޮޅުގެ އިތުރު ފ. އަތޮޅާއި ދ. އަތޮޅުގެ ކެމްޕޭން ދަތުރުފުޅަށްފަހު ރައީސް ނަޝީދު އެނބުރި ވަޑައިގަތުމަށް ހަމަޖެހިފައިވަނީ މިއަދު އެވެ.
ކެމްޕޭންގައި ރައީސް ނަޝީދު ދަތުރު ކުރެއްވުމަށް ހަމަޖެހިފައިވާ އަތޮޅުތައް:
– ނ ،ރ، އަދި ބ. އަތޮޅު – ޖެނުއަރީ ނުވައަކުން 11 އަށް
– ލ، ތ، މ، އަދި ވ. އަތޮޅު – ޖެނުއަރީ 13 – 15 އަށް
– ޅ. އަތޮޅާއި މާލެ އަތޮޅު – ޖެނުއަރީ 17 ގަ
– ގއ އަދި ގދ. އަތޮޅު – ޖެނުއަރީ ޖެނުއަރީ 19 – 21 އަށް
– އައްޑޫ ސިޓީ – ޖެނުއަރީ 23 – 24 އަށް
އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28 ވަނަ ދުވަހުއެވެ. ރައީސް އިބްރާހީމް މުހައްމަދު ސޯލިހްގެ އިތުރުން މި ޕްރައިމަރީގައި ވާދަކުރައްވަނީ ރައީސް މުހައްމަދު ނަޝީދެވެ. ޕާޓީގެ ރިޔާސީ ޕްރައިމަރީގެ ފޯރި ގަދަވެފައިވާއިރު ރައީސް ސޯލިހާއި ރައީސް ނަޝީދު ގެންދަވަނީ ކެމްޕޭން ހަރަކާތްތައް ހިންގަވަމުންނެވެ. އެމްޑީޕީން އާންމުކުރި ދާއިމީ ލިސްޓުގައިވާ ގޮތުން 57،255 މީހުންނަށް އެ ޕާޓީގެ ރިޔާސީ ޕްރައިމަރީގައި ވޯޓު ލެވޭނެއެވެ.
