ރ. އިންނަމާދޫގެ ނަރުދަމާގެ މަޝްރޫޢު ކުރިޔަށްއޮތް 2 މަސްދުވަހުގެ ތެރޭ ނިންމުމަށް ހަމަޖެހިފައިވާ ކަމުގައި ރައީސް ސާލިހު ވިދާޅު ވެއްޖެއެވެ.
އެމްޑީޕީގެ މިހާރު ކުރިޔަށްދާ ޕްރައިމަރީ ކެމްޕޭންގައި ރ. އަތޮޅަށް މިހާރު ކުރައްވަމުން ގެންދަވާ ދަރުފުޅުގައި ރޭ ރ. މީދޫގައި ވާހަކަ ދައްކަވަމުން ރައީސް ސާލިހު ވިދާޅުވީ އިންނަމާދޫއަށް އިއްޔެ ކުރެއްވި ދަތުރުފުޅުގައި އެރަށުގެ ރައްޔިތުންގެ ކަންބޮޑުވެއްކަމުގައި ފެނިވަޑައިގަތީ އެރަށުގެ ނަރުދަމާގެ ނިޒާމު ނުނިމި ގިނަ ދުވަސްތަކެއް ވެގެން ދިއުން ކަމުގައެވެ.
މިގޮތުން ޕްލޭނިން މިނިސްޓަރާއި ފެނަކަ ކުންފުނީގެ އިސްވެރިންނާއެކު އެރަށުގައި މަޝްވަރާ ކުރައްވާފައިވާ ކަމަށް ވިދާޅުވެ ރައީސް ސާލިހު ވިދާޅުވީ މިހާރުގެ އަމާޒަކީ ކުރިޔަށް އޮތް 2 މަސްދުވަހުގެ ތެރޭގައި އެރަށުގެ ނަރުދަމާ ނިޒާމު ހަވާލުކޮށްފައިވާ އަމިއަލް ފަރާތަށް އެމަސައްކަތް ނިންމާ ނުލެވިއްޖެނަމަ، ފެނަކަ ނުވަތަ އެމްޓީސީސީއާއި ހަވާލުކޮށްގެ އެމަސައްކަތް ނިންމާލުން ކަމުގައެވެ.
އަޅުގަޑު އެންމެ ފަހުން މިއަދު ހަވީރު މިއައީ އިންނަމާދުއިން. އިންނަމާދޫގައި އޮތް އެންމެ ބޮޑު ކަންބޮޑުވުމަކީ ޒަމާންތަކެއް ވަންދެން މަސައްކަތް ކުރަމުން އަންނަ ނަރުދަމާގެ ނިޒާމު ނުނިމި ލަސްވަމުން ދިޔަކަމުގެ ޝަކުވާ. ޕްލޭނިންގ މިނިސްޓަރު އެބަ އިންނެވި. އަޅުގަޑުމެންގެ ފެނަކަ އެމްޓީސީސީގެ ބޭފުޅުން އެބަ ތިއްބެވި. މިއަދުގެ އަޅުގަޑުމެންގެ އެ މަޝްވަރާއަށްފަހުގަ އަޅުގަޑުމެން ވާހަކަދައްކާ މިނިންމީ، މިހާރު އެމަސައްކަތް ކުރުމަށް ހަވާލުކޮށްފައި އެއޮތް ފަރާތަށް ދީފައޮތް މުއްދަތު، ގާތްގަޑަކަށް ދެ މަހެއްހާ ދުވަހުގެ ތެރޭގައި އަޅުގަޑު ހިތުން ނިމޭނެ. އެހާތަނަށް ނުނިމިއްޖެއްޔާ އަޅުޑުމެން އެކަމާ ހަވާލުވެ، އިރާދަކުރެއްވިއްޔާ އިންނަމާދޫގެ ލަސްވެފައިއޮތް ނަރުދަމާގެ ނިޒާމުގެ އަމަލީ މަސައްކަތް ނިންމާ ޚިދުމަތް ދެވޭވަރު ކޮށްދޭނަން.
ރ. މީދޫގައި ބޭއްވި ކެމްޕޭން ޖަލްސާގައި ވާހަކަ ދައްވަމުން ރައީސް ސާލިހު ވިދާޅުވިއެވެ.
މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ އެމްޑީޕީން މަސައްކަތް ކުރަމުންދަނީ ރައްޔިތުންނާއި ގާތުން ރައްޔިތުންގެ އަޑު އަހައިގެންކަމަށެވެ. މިހާރުވެސް ރައްޔިތުންގެ އަޑު އެހުމަށްޓަކައި އެމްޑީޕީގެ އެތައް ޓީމުތަކެއް އަތޮޅުތެރޭގެ އެކިރަށްތަކުގައި ހަރަކާތްތެރިވާއިރު، ރައްޔިތުންގެ ގިނަ ޚިޔާލުތަކެއް ލިބިގެންދާކަމަށްވެސް ރައީސް ސާލިހު ވިދާޅުވިއެވެ.
