ޚިޔާނާތުގެ ކުށް ސާބިތުވެ އިދިކޮޅު ލީޑަރު އަދި ރިޔާސީ ކެންޑިޑޭޓު ރައީސް ޔާމީން ޖަލަށްލުމާއެކު އުފެދިފައި އޮތް ޙާލަތުގައި އިދިކޮޅުގެ ސަފުތައް އޮތީ ބަދހިކޮށްކަމަށާ، ރައީސް ޔާމީންގެ މައްޗަށް ދަށުކޯޓުންކުރި ޙުކުމް ބަލައި ނުގަންނަކަމަށް އިދިކޮޅު ޕީއެންސީގެ ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެމްބަރު ޢަބްދުއްރަޙީމް ޢަބްދުﷲ (އަދުރޭ) ވިދާޅުވެއްޖެއެވެ.
އަދުރޭ ކުރެއްވި ޓްވީޓެއްގައި ވިދާޅުވީ ޕީޕީއެމް/ޕީއެންސީގެ ސަފުތައް އޮތީ ބަދަހިކޮށްކަމަށެވެ. އަދި ސަރުކާރުންވަނީ ކޯޓުތަކަށް ނުފޫޒުފޯރުވާފައިކަމަށް އަދުރޭ ތުހުމަތުކުރެއްވިއެވެ.
ޕީ.ޕީ.އެމް/ޕީ.އެން.ސީގެ ސަފުތައް އޮތީ ބަދަހިކޮށް.އިބްރާހިމު ރައީސުގެ އަނިޔާވެރި ސަރުކާރުން ޝަރުޢީ ނިޒާމަށް ހަތަރެސްފައި ބާނައިގެން ރައީސް ޔާމީނަށްކޮށްފައިވާ ހަރާން ހުކުމް އަހަރެމެން ބަލައެއް ނުގަންނަމު.މިތިބީ ފިސާރި ގަދަކޮށް ރައީސް ޔާމީނާއެކު. #FreePresidentYameenNow @RY2023 pic.twitter.com/oQk5xGZdNc
— Abdul Raheem Abdulla (@Banafsaa) December 26, 2022
ރައީސް ޔާމީނަކީ އިދިކޮޅު ރިޔާސީ ކެންޑިޑޭޓެވެ. އެމަނިކުފާނުގެ މައްޗަށް ކޮށްފައިވާ ޖަލުޙުކުމާއެކު، އިންތިޚާބުގައި ވަދަކުރުމުގެ ފުރުސަތު މިވަގުތު އޮތީ ގެއްލިފައެވެ. މަތީ މަރުޙަލާގެ ކޯޓަކުން އެޙުކުމް ބާޠިލް ނުކުރާހާ ހިނދަކު ރައީސް ޔާމީނަކަށް އިންތިޚާބުގައި ވާދަކުުރުމުގެ ފުރުސަތެއް ނުލިބޭނެއެވެ. އެހެންކަމުން އުފެދިފައި އޮތް ސުވާލަކީ އެމަނިކުފާނަށް ވާދަނުކުރެވޭ ޙާލަތުގައި އިދިކޮޅުގެ ކެންޑިޑޭޓަކަށް ވާނީ ކާކުތޯ އުފެދޭ ސުވާލެވެ.
ޚަބަރު ލިބޭގޮތުގައި ޔާމީނުން ނޫން ބޭފުޅަކު ރިޔާސީ ކެންޑިޑޭޓުގެ ގޮތުގައި ނެރޭނަމަ އެކަމުގެ ވާދަވެރިކަން އިދިކޮޅު ކޯލިޝަންގެ ތެރޭގައި ބޮޑެވެ. އަދި ފެންމަތި ނުވިނަމަވެސް އިދިކޮޅު ކޯލިޝަންގެ ތެރޭގައިވެސް ފެކްޝަންތަކެއް އުފެދިފައިވެއެވެ. ޔާމީނަށްފަހު މިވަގުތު އެކޯލިޝަންގެ އިސް ލީޑަރެއްގެގޮތުގައި ހުންނެވީ އަދުރޭ އެވެ. އެހެންކަމުން ލީޑަޝިޕް ދައްކަވައި އިދިކޮޅު ކޯލިޝަންގެ ބަދަހިކަން ހެފެހެއްޓެވުމަށް އަދުރޭ އަންނަނީ މަސައްކަތްކުރައްވަމުންނެވެ.
