ށ. މިލަންދޫ ބަނދަރު ތަރައްޤީ ކުރުމުގެ މަޝްރޫޢު ސަރުކާރުން އެމްޓީސީސީއާއި ހަވާލުކޮށްފިއެވެ.
މި މަޝްރޫޢު ހަވާލުކުރުމަށް ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ، އާދަމް އާޒިމެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ، ޑިރެކްޓަރ ޖެނެރަލް، ފާތުމަތު ޝާނާ ފާރޫޤެވެ.
މިމަޝްރޫޢުގެ ދަށުން މިލަންދޫގައި މިހާރު އޮތް ބަނދަރުން 17900 ކިއުބިކް މީޓަރުގެ ސަރަޙައްދެއް ފުންކޮށް، 70400 ކިއުބިކް މީޓަރުގެ އައު ބަނދަރެއް ފުންކުރުމަށްވަނީ ހަމަޖެހިފައެވެ. އަދި 8400 ކިއުބިކް މީޓަރުގެ ސަރަޙައްދުގެ ނެރު ފުންކޮށް 93 މީޓަރުގެ ރިވެޓްމަންޓެއް ޖެހުމަށްވަނީ ހަމަޖެހިފައެވެ.
ށ.މިލަންދޫ ބަނދަރުގެ މަސައްކަތް އެމްޓީސީސީއާ ހަވާލުކޮށްފައިވަނީ 79 މިލިއަނަށްވުރެ ގިނަ ރުފިޔާއަށެވެ. މިމަސައްކަތް އެކުންފުންޏާއި ހަވާލުކޮށްފައިވަނީ ދޮޅު އަހަރުގެ ތެރޭގައި މަސައްކަތް ނިންމާގޮތަށެވެ.
2،700 މީހުން ދިރިއުޅޭ ށ. މިލަންދޫއަކީ ހެޔޮވަރެއްގެ އާބާދީއެއްއޮތް ބިންބޮޑު ރަށެކެވެ. އެގޮތުން ރަށުގެ 131 ހެކްޓަރުގެ ބިމުން ރަށު ރައްޔިތުން ދަނޑުވެރިކަން ކުރުމަށްޓަކައި މިހާރުވެސް 30 ބިންވަނީ ދޫކޮށްފައެވެ. މި ރަށުގައި މާބޮޑު މަސްވެރިކަމެއް ނެތްނަމަވެސް، ރަށުގައި ވަދުއަޅާ ފަރުމަހަށް ދިޔުމަށް ފުދޭވަރަކަށް ޑިންގީ އަދި ލޯންޗު ގެންގުޅެއެވެ. ރަށުގައި ރަނގަޅު ފެންވަރަކަށް ކޮންސްޓަރަކްޝަން މަސައްކަތްކުރާ ފަރާތްތައް އުޅޭއިރު ވަރަށް ގިނަ އަދަދެއްގެ ރައްޔިތުން ރިސޯޓްތަކުގައިވެސް ވަޒީފާ އަދާކުރެއެވެ.
މިލަންދޫއަކީ ށ. އަތޮޅުގެ ގިނަ ރަށްރަށުން އެކި ކަހަލަ ވިޔަފާރިތަކަށް އާންމުކޮށް އައިސްހަދައި ރަށެއްކަމުން، އެކަށީގެންވާ ތަނަވަސް ބަނދަރެއް ނެތުމުގެ ދަތިކަން މިރަށުގެ ރައްޔިތުންނަށް ވަނީ ތަޙައްމަލު ކުރަންޖެހިފައެވެ. ބަނދަރުގެ ޖާގަ ކުޑަވުމާއި އެއްގަމުތޮށީގެ އެކި ދިމަ ދިމާއިން ވެލިގަނޑު ދެމިގެން ގަނބާފައިވުމުން ބަނދަރު އެންމެ އެކަށީގެންވާގޮތުގައި ބޭނުންކުރުމުގައި މި ރަށު ރައްޔިތުންނަށް ދަތިތަކެއް އަންނަނީ ދިމާވަމުންނެވެ. އެހެންކަމުން، މިއަދު ސޮއެކުރެވިގެން މިދިޔަ މަޝްރޫޢުގެ ދަށުން ށ. މިލަންދޫގެ ބަނދަރު މުސްތަޤުބަލުގައި އިތުރަށް ތަރައްޤީވެ ތަނަވަސް ވެގެންދިޔުމާއެކު މިލަންދޫ ރައްޔިތުންނަށް ލަފާފުރުމުގައި އެތަކެއް ލުއިފަސޭހައަކާއި، ހިތްހަމަޖެހުމެއް ލިބިގެންދާނެކަމަށް އެ ކުންފުނިން ދެކެއެވެ.
