އެތައް ސަތޭކަ މިލިއަން ރުފިޔާއިން ސަރުކާރު ހިއްސާވާ ކުންފުނިތައް، އަމިއްލަ ކުންފުނިތަކަށް ދަރާފައިވާކަމަށް ވިދާޅުވެ ނައިފަރު ދާއިރާގެ މެންބަރު އަދި ޕީޕީއެމްގެ ނާއިބު ރައީސް އަޙްމަދު ޝިޔާމް ފާޑުވިދާޅުވެއްޖެއެވެ.
ޝިޔާމް މިހެން ވިދާޅުވީ، ދައުލަތް ބަނގުރޫޓު ނުވާނެކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެފައިވާ ވާހަކަފުޅާއި ގުޅިގެންނެވެ. ޝިޔާމް ވިދާޅުވީ، ސަރުކާރުން އަމިއްލަ ކުންފުނިތަކަށް ދައްކަންޖެހޭފައިސާ ފޮތްތަކަށް ނާރުވަންވެގެން އުޅެކަމަށެވެ. އަމިއްލަ ކުންފުނިތައް އޮޑިޓުކުރާއިރު ރިސީވަބަލްގެ ބޮޑު އަދަދުތަކަކީ ސަރުކާރުން ލިބެންޖެހޭ ފައިސާކަމަށާއި، އާސަންދަ ފަދަ ކުންފުނިތައް އެތައް ސަތޭކަ މިލިއަނުން އަމިއްލަ ކުންފުނިތަކަށް ވަނީ ދަރާފައިކަމަށް ޝިޔާމް ވިދާޅުވިއެވެ.
ޝިޔާމް މިހެން ވިދާޅުވެފައިވާއިރު، ފިނޭންސް މިނިސްޓަރ އިބްރާހީމް އަމީރު ވިދާޅުވެފައިވަނީ، ރާއްޖެ ބަނގުރޫޓްވާ ވާހަކައަކީ އަލަށް ބަޔަކު ދައްކާ ވާހަކައެއްނޫންކަމަށެވެ. އެކި ފަރާތްތަކުން މިވާހަކަ ދައްކަނީ އެކި ސިޔާސީ ބޭނުމުގައި, ސަރުކާރު ބަލިކަށިކޮށް, މިހާތަނަށް ދިމާވި ދަތި އުނދަގުލާއެކުވެސް, ހޯދަމުންދާ ކުރިއެރުންތައް ފަނޑުކޮށް ކިލަނބުކޮށްލުމުގެ ބޭނުމުގައިކަަމށް އަމީރު ވިދާޅުވިއެވެ.
ދަތިތަކާއި ގޮންޖެހުންތަކާއިއެކުވެސް, ސަރުކާރުގެ ސިޔާސަތުތަކުގެ ތެރެއިން އެ ގޮންޖެހުންތައް ގިރާކުރަމުންދާކަމަށާއި، ރަޝިޔާ-ޔޫކުރެއިން ހަނގުރާމައާއެކު ދިމާވަމުންދާ ގޮންޖެހުންތައް މެނޭޖްކުރުަމަށްޓަކައި ސަރުކާރުން ފިޔަވަޅުތައް އަޅަމުންދާކަމަށްވެސް އަމީރު ވިދާޅުވިއެވެ.
ދަނޑިވަޅުގައި އިޤްތިސާދާއިމެދު, ނުރަނގަޅު ތަސައްވުރެއް އުފައްދައިި ބިރުވެރިކަން އުފެއްދުމަށްޓަކައި ޒިންމާދާރު މަޤާމުތަކުގައި ތިބެގެން ކުރެވޭ މަސައްކަތަކީ, ސިޔާސީ ބޭނުމަކަށް ކުރެވޭ ވަރަށް ހިތާމަހުރިކަމެއް. މާތްالله ގެ އިރާދަފުޅާއެކު, ރާއްޖޭގެ އިޤްތިސާދީ ކުރިމަގު އޮތީ ފަހިކޮށް.
– އަމީރު ވިދާޅުވިއެވެ.
އަންނަ އަހަރުގެ ބަޖެޓަކީ ނާއުއްމީދީ ބަޖެޓެއްކަމަށް ސަރުކާރާ އިދިކޮޅު މެންބަރުން ގެންދަވަނީ ވިދާޅުވަމުންނެވެ. ޚާއްޞަކޮށް ދަރަނި އަދާކުރުމަށް މާބޮޑު ސަމަލުކަމެއް ބަޖެޓުގައިދީ ފައިނުވާކަމަށް އެ މެންބަރުން ވިދާޅުވިއެވެ.
