ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ކަންކަން އެނގިވަޑައިނުގަންނަވާކަމުގެ ނާޖާއިޒު ފައިދާ، ފިނޭންސް މިނިސްޓަރު އިބްރާހީމް އަމީރު ދަނީ ހިތުހުރިގޮތަކަށް ނަންގަވަމުންކަމަށް ވިދާޅުވެ މާވަށު ދާއިރާގެ މެމްބަރު، އަދި ކުރީގެ އިކޮނޮމިކް މިނިސްޓަރ މުޙައްމަދު ސަޢީދު ފާޑު ވިދާޅުވެއްޖެއެވެ.
ދައުލަތުގެ ރިޒާވްގެ ހިސާބުތައް ފެންނަ ގްރެފިކްސް ޗާޓެއް ހިމަނުއްވައި ކުރެއްވި ޓްވީޓެއްގައި ސަޢީދު ވިދާޅުވީ، ދައުލަތުގެ ރިޒާވްގައި އެންމެ 2 މަހުގެ ކާޑާއި އަސާސީ މުދާ ގަންނާނެ ބޭރުފައިސާ ނެތްވާހަކަ ބުނަނީ މިހެންވެގެން ކަމަށެވެ. މިއީ މީގެކުރީގެ އެއްވެސް ސަރުކާރަކުން ކުރިކަމެއްނޫންކަމަށް ސަޢީދު ވިދާޅުވިއެވެ.
ރިޒާވްގައި 2މަހުގެކާޑާއި އަސާސީމުދާގަންނާނެ ބޭރުފައިސާ ނެތްވާހަކަ ބުނަނީ މިހެންވެ. މިއީ މީގެކުރީގެ އެއްވެސްސަރުކާރަކުން ކުރިކަމެއްނޫން. ރައީސްއަށް ކަންކަން ނުބެލުން ނުވަތަ ނޭނގުމުގެ ފައިދާ ފިނޭންސްމިނިސްޓަރުދަނީ ހިތުހުރިވަރަކަށްނަގަމުން! މިއީ އިދިކޮޅު ސިޔާސީވުންތޯ؟ @iameeru pic.twitter.com/q2NdZCSxiD
— Mohamed Saeed (@em_saeed) November 21, 2022
ރާއްޖޭގެ އިޤްތިޞާދީ ޙާލަތު ދަނީ ގޯހުން ގޯހަށް ކަމަށާ، ރާއްޖެ މިދަނީ ބަނގުރޫޓުވުމާ ދިމާއަށްކަމަށް ބުނެ އިދިކޮޅު ސިޔާސީ ފަރާތްތަކާއި ރައްޔިތުންގެ މަޖިލީހުގެ ބައެއް މެމްބަރުންނާއި މާލީ ދާއިރާގެ ބައެއް ބޭފުޅުންވެސް އަންނަނީ ބުނަމުންނެވެ. އެގޮތުން ރައްޔިތުންގެ މަޖިލީހުގެ ރައީސް މުޙައްމަދު ނަޝީދުވެސް އިއްޔެ ވަނީ ސަރުކާރުގެ މާލީ ސިޔާސަތުތަކާއި އެއާ ގުޅިގެން ސަރުކާރުން ދައްކަމުންދާ ވާހަކަތަކަށް ވަރަށްބޮޑަށް ފާޑު ވިދާޅުވެފައެވެ.
ރައްޔިތުންގެ މަޖިލީހުގައި ތިއްބެވި ސަރުކާރަށް ތާޢީދުކުރައްވާ މެމްބަރުން، ކަމުގެ ހަޤީޤަތް ނުބައްލަވައި ސަރުކާރު ދިފާޢުކުރުމުގެ ގޮތުން ހަޤީޤަތާ ދުރު ވާހަކަތައް ދައްކާކަމަށް ނަޝީދު ތުހުމަތުކުރައްވައެވެ. އިޤްތިޞާދީ ހަޤީޤަތް ޤަބޫލުކޮށް މިޙާލަތުން އަރައިގަތުމަށް މަސައްކަތްކުރަން ނަޝީދު ގޮވާލައްވައެވެ.
