އިޚްތިކާރު ކޮށްގެން ފައިދާ ހޯދުމަކީ އިސްލާމް ދީނުގައި ހުއްދަވެގެންވާ ކަމެއް ނޫންކަމުގައި މިއަދު ހުކުރު ޚުޡުބާގައި ވިދާޅުވެއްޖެއެވެ.
"މަކަރާއި ޙީލަތް ހެދުން" މި މައުޟޫއަށް ޚާއްސަ ކުރެވިގެންދިޔަ މިއަދުގެ ޚުޡުބާގައި ބަޔާން ކޮށްފައިވާ ގޮތުގައި އިޚްތިކާރު ކުރުމަކީ މީސްތަކުންނަށް ބޭނުންޖެހިފައިވާ މުދަލެއް ބާޒާރަށް ނުނެރެ ހިފެހެއްޓުމަށްފަހު އެ މުދަލުގެ އަގު ބޮޑުވުމުން ބާޒާރަށް ނެރެ އަގު ބޮޑުކޮށް ވިއްކުމެވެ.
އިޚްތިކާރު ކުރުމަކީ މާތް ނަބިއްޔާގެ ސުންނަތުން މަނާ ކުރައްވާފައިވާ މުޢާމަލާތެއްކަން ކަށަވަރެވެ. ވަކީން ޚާއްސަކޮށް ކޮއްތުގެ ގޮތުގައި މީސްތަކުން ބޭނުންކުރާ ބާވަތްތައް އިޚްތިކާރު ކުރުމުގެ ފާފަ ވަކީން ބޮޑެވެ.
ހުކުރު ޚުޡުބާގައި ވިދާޅުވެފައި ވެއެވެ.
ޚުޡުބާގައި އިތުރަށް ވިދާޅުވެފައިވާ ގޮތުގައި، ހަމަ އެފަދައިން މިނެކިރުމުގައި އުނިއިތުރު ކުރުމަކީވެސް ގެއްލުމާއި ހަލާކު ކުރިމަތިވެގެން ދާނޭ ކަމެކެވެ. އަދި އެއީ ވިޔަފާރީގައި މަކަރާއި ޙީލަތް ހެދުމުގެ ތެރޭގައި ހިމެނޭ ކަމެއްކަމަށްވެސް ޚުޡުބާގައި ބަޔާން ކޮށްފައި ވެއެވެ.
މިގޮތުން ވިޔަފާރީގެ ގޮތުގައި ވިއްކާ އެއްޗެއްގައި ނެތް ސިފައެއް ހުރިކަމަށް ބުނެ އެއެއްޗެއްގެ ތައުރީފު ކުރުމަކީވެސް އޮޅުވާލުމާއި މަކަރު ހެދުންކަމަށާއި އެގޮތަށް ވިޔަފާރީގެ މުޢާމަލާތް ކުރާނަމަ އަމިއްލަ އަތްތަކުން މައިންބަފައިންނަށާއި، އަނބިދަރިން ނަރަކައަށް ވައްޓާލަނީ ނޫންތޯ ޚުޡުބާގައި ސުވާލު ކުރައްވާފައި ވެއެވެ. އަދި މިކަމާމެދު ފުންކޮށް ވިސްނުމަށްވެސް އިލްތިމާސް ކޮށްފައި ވެއެވެ.
ޚުޡުބާގައި ވިދާޅުވި ގޮތުގައި މަކަރު ހަދައި އޮޅުވާލަމުންދިޔަ ޤައުމުތަކުގެ ތެރޭގައި ޝިޢައިބު ޢަލައިހިއްސަލާމްގެ ގައުމު މަދްޔަނު ހިމެނެއެވެ.
މިނެކިރުމުގައި މަކަރުހަދާ އޮޅުވާ ނުލުމަށް ޝުޢައިބުގެފާނު އެބައި މީހުންނަށް ނަސޭހަތްތެރިވެ އިންޒާރު ދެއްވިއެވެ. ނަމަވެސް އެމީހުން އެއަޑެއް ނޭހިއެވެ. ނަތީޖާއަކަށްވީ ޚާލިޤުވަންތަ މާތްالله އުޑުން އަޒާބު ފޮނުއްވައި އެބައިމީހުން ހަލާކު ކުރައްވާ ނެތި ކުރެއްވުމެވެ.
ޚުޡުބާގައި ވިދާޅުވެފައި ވެއެވެ.
ޚުޡުބާގައި ވިދާޅުވެފައިވަނީ، ލިބޭ އާމްދަނީ މަދުވެގެން އާމްދަނީ އިތުރު ކުރުމަށްޓަކާ ނަމަވެސް ދީނުގައި ހުއްދަ ނޫން މަގުތައް އިޚްތިޔާރު ކުރުމަކީ ވަރަށް ނުރައްކާތެރިކަމެއް ކަމުގައެވެ. އަދި އެއީ މާތް ނަބިއްޔާ މަނާ ކުރައްވާފައިވާ ކަމެއްކަމަށް ބަޔާން ކޮށްދެއްވަމުން، މިފަދަ ކަންކަމުން ދުރުވެ ތައުބާވުމަށް ޚުޡުބާގައި ގޮވާލައްވާފައި ވެއެވެ.
