ބޯހިމެނުމަށްޓަކައި ރާއްޖެއިން ބޭރުގައި ދިރިއުޅޭ ދިވެހިންގެ މައުލޫމާތު އެއްކުރުމުގެ މަސައްކަތް މޯލްޑިވްސް ބިއުރޯ އޮފް ސްޓެޓިސްޓިކްސް އިން ފަށައިފިއެވެ.
އެ ބިއުރޯ އިން އިއްޔެ ސޯޝަލް މީޑިއާގައި ކުރި ޕޯސްޓެއްގައި ބުނީ، ރާއްޖެ އިން ބޭރުގައި ދިރިއުޅޭ ދިވެހިންގެ ސާވޭ ހެދުން މިހާރު ފަށާފައިވާ ކަމަށެވެ. މިދިޔަ އަންގާރަ ދުވަހުން ފެށިގެން މި މަހު 30ގެ ނިޔަލަށް އެ މަސައްކަތް ކުރިއަށް ގެންދާނެ ކަމަށް ވެސް ބުންޏެވެ.
އެ މުއްދަތުގެ ތެރޭގައި، ރާއްޖެއިން ބޭރުގައި ދިރިއުޅޭ ދިވެހިން އެ ބިއުރޯގެ ވެބްސައިޓްގައިވާ ފޯމު މެދުވެރިކޮށް، މައުލޫމާތު ފުރިހަމުކުރުމަށް އެ ބިއުރޯއިން އެދެއެވެ. ރާއްޖޭގައި ބޯހިމެނުމުގެ މަސައްކަތް 8 އަހަރު ފަހުން ފަށައިގެން ކުރިއަށް ގެންދާއިރު، މިދިޔަ މަހު އެ ސްޓެޓިސްޓިކްސް ބިއުރޯ އިން ނެރުނު ތަފާސްހިސާބުތައް ދައްކާ ގޮތުން މިހާތަނަށް ގުނާފައިވާ އާބާދީގައި، ރާއްޖޭގައި ދިރިއުޅޭ ދިވެހިންގެ އަދަދަކީ 355،331 އެވެ.
މި ސާވޭ މެދުވެރިކޮށް ލިބޭ މައުލޫމާތަކީ ދިވެހިރާއްޖޭގެ ޖުމުލަ އާބާދީގެ އަންދާޒާކޮށް އެކުލަވާލުމުގައި ބޭނުންކުރެވޭނެ މައުލޫމާތުތަކެއް ކަމަށާއި މައުލޫމާތުގެ ސިއްރު ހިފަހައްޓާނެ ކަމަށް އެ ބިއުރޯއިން ވަނީ ބުނެފައެވެ.
ބިއުރޯ އޮފް ސްޓެޓިސްޓިކްސް އިން އެންމެ ފަހުން ބުނިގޮތުގައި މިހާތަނަށް ގުނުނީ ރާއްޖެ އާއި ރާއްޖެއިން ބޭރުގައި އުޅޭ ދިވެހިންގެ ތެރެއިން 89 ޕަސެންޓެވެ. މިހާތަނަށް މައުލޫމާތު ނުލިބޭ މީހުންގެ މައުލޫމާތު އެއްކުރުމުގެ މަސައްކަތް އަދިވެސް ކުރިއަށް ގެންދާ ކަމަށް އެ ބިއުރޯ އިން ބުންޏެވެ.
މިހާތަނަށް ބޯހިމެނިފައި ނުވާ ނަމަ ހޮޓްލައިން 1423 އަށްް ނުވަތަ ފޯން ނަންބަރު 3008400 އަށް ގުޅުމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން އެދެ އެވެ. އެ ކަމަށް އެދޭ ފޯމު އޮންލައިންކޮށް ހުށަހަޅައިގެން ވިޔަސް ބޯހިމެނުމުގައި ބައިވެރިވާން ބުންޏެވެ.
