ރާއްޖޭގައި ތިބި އިންޑިއާ ސިފައިންނަށް ގޯނާކޮށް މަލާމާތާއި ފުރައްސާރަ ކުރާނޭކަމުގައި، ރައްޔިތުންގެ މަޖިލިހުގެ ދިއްދޫ ދާއިރާގެ ކުރީގެ މެމްބަރު އަބުދުއްލަތީފް މުހައްމަދު ވިދާޅުވެއްޖެއެވެ.

ރައީސް ޔާމިން ބޮޑު ތިލަދުންމައްޗަށް ކުރައްވަމުންގެންދަވާ ދަތުރުފުޅުގައި، ލަތީފްގެ އަމިއްލަރަށް، ހއ. ދިއްދޫގައި ރޭ ބޭއްވުނު ޖަލްސާގައި ވާހަކަ ދައްކަވަމުން ލަތީފް ވިދާޅުވެފައިވަނީ، ދިވެހިރާއްޖޭގައި އިންޑިއާ ސިފައިން ތިބުމަށް ގާނޫނު އަސާސީން ފުރުސަތު ނުދޭ ކަމަށެވެ. އެހެންކަމުން އިންޑިއާ ސިފައިން މި ގައުމުން ބާލަން ހަރުއަޑުން ގޮވާނެކަމަށް ވިދާޅުވަމުން ލަތީފް ވިދާޅުވެފައިވަނީ އިންޑިއާ މިލިޓަރީގެ އެންމެ ބޫޓު ކިބައެއް ވެސް ރާއްޖޭގައި ހުރުމަށް ފުރުސަތު ނުދޭނެ ކަމަށެވެ.

އޭގެ ސަބަބެއް ކަމުގައި ލަތީފް ވިދާޅުވީ އިންޑިއާ ސިފައިން ރާއްޖެ އަޅިވެތި ކޮށްގެން ތިބުމެވެ.

އެކިއެކި ގޯނާ ކުރާނަން އިނގޭތޯ، އެކިއެކި ޖެއްސުން ކުރާނަން އިނގޭތޯ! އެކިއެކި މަލާމާތާއި ފުރައްސާރަ ކުރާނަން. ކީއްވެގެންތޯ؟ އަޅުގަނޑުމެންގެ މިނިވަންކަން ގެއްލޭތީ، އަޅުގަނޑުމެން އަޅުވެތި ކުރާތީ، އެކަމުގެ ނުރުހުނުގައި މިދަންނަވަނީ އިންޑިއާ ސިފައިން ބާލާނަމޭ!

އިންޑިއާ ސިފައިން ރާއްޖޭގައި ތިބޭ ތިބުމުގެ ސަބަބުން ރާއްޖޭގެ މިނިވަންކަން ގެއްލިގެން ގޮސްފައިވަކަމަށް ވިދާޅުވެ، އެ މޭރުމުން ވާހަކަ ދައްކަވަމުން ލަތީފް ވިދާޅުވެފައި ވެއެވެ.

ލަތީފް ވިދާޅުވީ ބޮޑު ތަކުރުފާނުވެސް ޖިހާދަށް ނިކުންނެވީ އޭރު އޮތް ސަރުކާރަކުން ހުއްދަ ދީގެން ނޫން ކަމަށާއި އެހެންވީމާ ރާއްޖެ މިނިވަން ކުރުމަށް ބޮޑު ތިލަދުންމަތީގެ ރައްޔިތުން ޖިހާދަށް ނިކުންނަވާނީ އަމިއްލައަށް ކަމަށްވެސް މި ޖަލްސާގައި ވާހަކަ ދައްކަވަމުން ލަތީފް ވިދާޅުވިއެވެ.

ބޮޑުތަކުރުފާނު ޖިހާދަށް ނުކުންނެވީ އޭރު އޮތް ސަރުކާރުން ހުއްދަ ދީގެންނެއްނޫން، އެހެންވީމަ މިދަންނަވަނީ ބޮޑުތިލަދުންމަތީގެ ރައްޔިތުން ޖިހާދަށް ނުކުންނާނީ އަމިއްލައަށް އިނގޭތޯ؟ ބޮޑުތަކުރުފާނު ކުރެއްވި ޖިހާދު ކުރައްވަން މިހާރުވެސް މި ބޮޑުތިލަދުންމަތީގެ ރައްޔިތުން ތިބީ ތައްޔާރަށް.

ލަތީފް ވިދާޅުވިއެވެ.

ލަތީފް އިތުރަށް ވިދާޅުވި ގޮތުގައި، މުޅި ރާއްޖެ ތަރައްގީ ކޮށްދީ ރާއްޖެއަށް އުފާވެރި މަންޒަރެއް ގެނެސްދޭނީ ރައީސް ޔާމިން ކަމަށާއި، ދިއްދޫގެ ރައްޔިތުން ތިބީ ރައީސް ޔާމިނަށް ވޯޓުދޭން ކެތް މަދުވެފައި ކަމުގައެވެ. އަދި ރައީސް ޔާމިން ދިއްދޫގެ ފަޅު ހިއްކާ އެއްރޕޯޓު ތަރައްގީ ކޮށްދެއްވުމަށް ވަދުވެވެޑައިގަތުމުން ރައީސް ޔާމީނަށް ޝުކުރު ދަންނަވަމުން ލަތީފް ވިދާޅުވީ އެރަށުގައި އަޅާ އެއަރޕޯޓު އިންޑިއާއަށް ވިއްކާ ނުލެވޭނެ ކަމަށެވެ.