2015 ވަަނަ އަހަރު ނެރުނު ކާމިޔާބު ފިލްމު "ދްރިޝްޔަމް"ގެ ދެވަނަ ބައި ކަމުގައިވާ "ދްރިޝްޔަމް 2″ ގެ ޓްރެއިލާ ދައްކާލައިފިއެވެ.
ފިލްމުގެ ދެވަނަ ބައި ކަމަށްވާތީ ވާހަކަ ކުރިއަށް ގެންގޮސްފައި ވަނީ ފުރަތަމަ ބައި ނިމުނު ހިސާބުންނެވެ. މި ފިލްމް ގެ މުހިންމު ރޯލުތަކުން ފެނިގެންދަނީ މި ފިލްމުގެ ފުރަތަމަ ބައިން ވެސް ފެނިގެންދިޔަ ތަރިންނެވެ. އެގޮތުން ފިލްމުގެ ލީޑުން އަޖޭ ދޭވްގަން، ޝްރިޔާ ޝަރަން، ތައްބޫ، އިޝިތާ ދަތުގެ އިތުރުން އަކްޝޭ ކަންނާ ފެނިގެން ދާނެއެވެ.
2015 ވަނަ އަހަރު ނެރުން "ދްރިޝްޔަމް"ގެ ކާމިޔާބީއަށް ފަހު މީގެ ދެވަނަ ފިލްމެއް ނެރޭއިރު ފިލްމުގައި ކުރީގެ ފިލްމަށް ވުރެ ބެލުންތެރިންގެ ޝައުގު ހޯދަން މަސައްކަތް ކޮށްފައިވާނެ ކަމަށް ފިލްމުގެ ޓީމުން ވަނީ ބުނެފައެވެ.
މި ފިލްމަކީ ލޯބިވެރިޔާގެ ފަރާތުން ކުރިމަތިވާ ފުރައްސާރައަކާ ގުޅިގެން އަންހެން ކުއްޖެއްގެ އާއިލާ އިން، ލޯބިވެރިޔާ މަރާލައި އޭނާ ފޮރުވަން ކުރާ މަސައްކަތް ދައްކުވައިދިން ފިލްމެކެވެ.
އެހެން ކަމުން އަންނަ މަހުގެ 18 ގައި ސިނަމާތަކަށް ގެންނަ "ދްރިޝަމް 2″ ބިނާވެފައި އޮންނާނީ ތަހުގީހުގެ އާ މަރުހަލާއަށެވެ. ކުރީގެ ފިލްމު 2020 ގައި މަރުވި ނިޝިކާންތު ކަމަތު ޑައިރެކްޓްކުރި އިރު، އާ ފިލްމު ޑައިރެކްޓްކުރީ އަބީޝެކް ޕަޓަކް އެވެ.
"ދްރިޝްޔަމް" އަކީ ހަމަ މިނަމުގައި 2013 ވަނަ އަހަރު ނެރުނު މަލަޔާލަމް ފިލްމެއްގެ ރިމޭކެކެވެ. މަލަޔާލަމް ބަހުން ވަނީ މީގެ ދެވަނަ ބައެއްވެސް 2020 ވަނަ އަހަރު ގެނެސްދީފައެވެ. އަދި އަޖޭގެ "ދްރިޝްޔަމް 2″ އަކީވެސް މަލަޔާލަމް ފިލްމާ ގުޅޭގޮތަށް ހަދާ ފިލްމެއްކަމަށް ބައެއް ރިޕޯޓުތައް ވަނީ ބުނެފައެވެ.
