އއ. މާޅޮހުގެ ދެކުނުން ބަންޑުން ޖަހާލި ލޯންޗުން ގެއްލިގެން ހޯދަމުންދާ އުމުރުން 28 އަހަރުގެ ޒުވާނާ ހޯދުމަށް އއ. ފެރިދޫ ފުއްޓަރު ފަރާތު ކަނޑުގެ ބޮޑު ސަރަޙައްދެއް ބެލުމަށް ހިންގުނު އޮޕަރޭޝަން ހުއްޓާލައިފިއެވެ.
އެމްއެންޑީއެފްއިން ބުނެފައިވަނީ އއ. މާާޅޮހު ކައިރިން ބަންޑުން ޖަހާލާފައި އޮއްވާފެނުނު ލޯންޗުން ގެއްލުނު މިންހާޖު ހޯދުމަށް ކުރަމުންދާ ސާރޗް އެންޑް ރެސްކިއު އޮޕަރޭޝަނުގައި އިއްޔެވެސް 300 އަކަ ނޯޓިކަލް މޭލުގެ ސަރަޙައްދު ބަލާފައިވާކަމަށެވެ. 4 ދުވަހުގެ ސާރޗް އޮޕަރޭޝަނުގައި ވައިގެ މަގުން 2000 އަކަ ނޯޓިކަލް މޭލު އަދި ކަނޑުމަގުން 665 އަކަ ނޯޓިކަލް މޭލުގެ ސަރަޙައްދެއް ވަނީ ބަލާފައެވެ. ނަމަވެސް މިހާރު ސާރޗް އެންޑް ރެސްކިއު އޮޕަރޭޝަން ވަނީ ހުއްޓާލެވިފައިކަމަށް ކޯސްޓް ގާޑުން ވަނީ ބުނެފައެވެ.
މިދިޔަ ބުރާސްފަތި ދުވަހު 13:00 ހާއިރު މާލެއިން ފުރައިގެން އުކުޅަހަށް ދަތުރުކުރި މި ލޯންޗު ބަންޑުން ޖަހާލަފައި އޮއްވާ ފެނުނީ މާޅޮހު ކައިރިންނެވެ. މި ލޯންޗުން ދަތުރުކުރި ދެ މީހުންގެ ތެރެއިން އެކަކު ފެރިދޫ ފުއްޓަރާ ދިމާއިން އޮކްޓޯބަރ 7 ވަނަ ދުވަހު ވަނީ ފެނިފައެވެ. އަދި އޭނާއަށް ފެރިދޫ ޞިއްޙީ މަރުކަޒުގައި ފަރުވާދިނުމަށްފަހު އިތުރު ފަރުވާ ދިނުމަށް އާއިލާގެ އެދުމަށް އޭނާ މާލެ ގެނެސް އައި.ޖީ.އެމް ހޮސްޕިޓަލުގައި ފަރުވާދިނުމަށްފަހު މިހާރުވަނީ ދޫކޮށްލާފައެވެ.
މި ޙާދިސާގައި ގެއްލިގެން ހޯދަމުން ދަނީ ސ. ހިތަދޫ، މިންހާ, މުޙައްމަދު މިންހާޖުއެވެ. އޭނާ އެންމެފަހުން ލައިގެން ހުރީ އަޅި ކުލައިގެ އަތް ދިގު ޓީޝާޓަކާއި ނޫ ކުލައިގެ ޖިންސެއް ކަމަށް އެމް.އެން.ޑީ.އެފް ކޯސްޓްގާޑަށް ވަނީ މަޢުލޫމާތު ލިބިފައެވެ. ފުލުހުން ވިދާޅުވީ، ލޯންޗު ބަންޑުންޖަހާލިކަމުގެ މައުލޫމާތު ލިބުމާއެކު މެރިން ޕޮލިހުގެ ޑައިވް ޓީމެއް ހަމަ އެ ދުވަހު އއ. އަތޮޅަށް ގޮސް، ގެއްލުނު މީހާ ހޯދުމުގެ މަސައްކަތް ފަށާފައިވާކަމަށެވެ.
ގެއްލިގެން ހޯދަމުންދާ ޒުވާނާ ފެނިއްޖެނަމަ ނުވަތަ އޭނާއާ ގުޅޭ އެއްވެސް މައުލޫމާތެއް ލިބިއްޖެނަމަ 119 ނުވަތަ 3322111 އަށް މައުލޫމާތު ހިއްސާކޮށްދިނުމަށް ފުލުހުން ވަނީ އެދިވަޑައިގެންފައެވެ.
