މަރުގެ މައްސަލަތަކާއި، ވައްކަމުގެ މައްސަލަތައް ބަލަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އުފެއްދެވި މަރު ކޮމިޝަނާއި، އެސެޓް ރިކަވަރީ ކޮމިޝަނަށް ވީއެއްވެސް ކަމެއް ނެތްކަމަށާއި، ގޮހޮރަށް ކައިގެން ދިއުން ނޫންކަމެއް ވެފައި ނުވާކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ ހުޅުމާލޭގައި ގޮތްނޭގޭ ގޮތަކަށް މަރުވެފައި އޮތްވާ ފެނުނު މުހައްމަދު އަޒުހާންގެ މަރާއި ގުޅޭގޮތުން އާދަމް ޝަރީފް ހުށަހެޅުއްވި ކުއްލި މައްސަލާގައި ވާހަކަ ދައްކަވަމުންނެވެ. މިމައްސަލާގައި މިއަދު ވާހަކަ ދެއްކެވި އެމްޑީޕީގެ މެމްބަރުންނާއި، އިދިކޮޅު މެމްބަރުންވެސް ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
މިމައްސަލާގައި ވާހަކަ ދައްކަވަމުން ޝިޔާމް ވިދާޅުވީ މިސަރުކާރުން ވެރިކަމަށް އައުމަށްޓަކައި، އެންމެ ބޮޑަށް ވިއްކީ ގެއްލިފައިވާ މީހުންނާއި މަރާލެވިފައިވާ މީހުންނަށް އިންސާފު ހޯދުންކަމަށް ވީނަމަވެސް މިއަދާއި ހަމައަށް މިއިން އެއްވެސް ކަމަކަށް އިންސާފު ލިބިފައި ނުވާކަމަށެވެ. ފެނިގެންދަނީ އަމިއްލަ އެޖެންޑާތައް ހާސިލް ކުރުމަށްޓަކައި ދެއްކި ވާހަކަތަކާއި ވީވައުދުތައް ފަނުފުލުން ދިޔަތަންކަމަށް ޝިޔާމް ވިދާޅުވިއެވެ.
މަރުގެ މައްސަލަތައް ބަލަން ވައުދުވެ އުފެއްދެވި މަރުކޮމިޝަނަށް ވީއެއްކަމެއްވެސް ނެތްއިރު، ކޮރަޕްޝަންގެ މައްސަލަ ބަލަން އުފެއްދެވި އެސެޓް ރިކަވަރީ ކޮމިޝަނަށް ވީހަމަ އެއްކަމެއްވެސް ނެތްކަމަށް ޝީޔާމް ވިދާޅުވިއެވެ. ދައުލަތުގެ ބަޖެޓުން އެތައް މިލިޔަން ރުފިޔާ ނަގައިގެން ހަބަޑަށް ކެއުން ފިޔަވައި ވީހަމަ އެއްކަމެއްވެސް ނެތްކަމަށް ޝިޔާމް ވިދާޅުވިއެވެ.
މަރުކޮމިޝަން އެސެޓް ރިކަވަރީ ކޮމިޝަން ދިޔައީ ގޮހޮރަށް ކައިގެން. ކުރެވުނު މަސައްކަތް ޒީރޯ. ފުލުހުންގެ އިހުމާލު ބޮޑު، އަފްރާޝީމް މަރުގެ 10 އަހަރުވީ، ގަނޑުތަކެއްދެއްކި މިހިރީ ލިޔުންތަކޭ ކިޔާފަ މިހާރުގެ ހޯމް މިނިސްޓަރު. އޭނާދެއްކި ވާހަކަ ބަލަންޖެހޭ.
– ޝިޔާމް ވިދާޅުވިއެވެ.
މިމައްސަލާގައި ޝިޔާމް ވަނީ މަޖިލިސް ރައީސާއި، މިސަރުކާރުންވެސް ހެޔޮ ނިޔަތެއް ނެތްކަމަށް ވިދާޅުވެފައެވެ. އަދި ފެނިގެންދަނީ އަމިއްލަ އެޖެންޑާ ހާސިލްކޮށް ސިޔާސީ މަންފާ ހާސިލް ކުރާ މަންޒަރުކަމަށް ޝިޔާމް ވިދާޅުވިއެވެ.
