ފާއިތުވެދިޔަ އަަހަރުގެ ސެޕްޓެމްބަރުމަހު ޔޫއެންގެ އާންމު މަޖިލިހުގެ ރައީސްކަމާއި ހަވާލުވެ ވަޑައިގެންނެވި ރާއްޖޭގެ ފޮރިންގ މިނިސްޓަރ އަބުދުޛ ޝާހިދުގެ އާންމު މަޖިލިގެ ރައީސްކަމުގެ ދައުރު މިއަދު ނިމިއްޖެއެވެ.

ޝާހިދުގެ ޔޫއެންޖިއޭގެ ރައީސްކަމުގެ ދައުރި މިއަދު ނިމިފައި ވާއިރި، ފާއިތުވެދިޔަ ހަފްތާގައި އޭނާވަނީ، ކޮންމެ މަހަކުވެސް ޔުއެން ސެކެޓްރީ ޖެނެރަލްއާއެކު ބާއްވަންޖެހޭ ކޯޑިނޭޝަން ބައްދަލުވުމުގެ އެންމެ ފަހު ބައްދަލުވުން ބާއްވާފައެވެ.

އަދި އެއަށްފަހު ފާއިތިވެދިޔަ ހަފްތާގެ ބުރާސްފަތު ދުވަހު ޝާހިދުވަނީ ޔޫއެންޖީއޭގެ ރައީސްގެ ހައިސިއްޔަތުން އެންމެ ފަހުގެ ނޫސްވެރިންގެ ބައްދަލުވުންވެސް ބާއްވާފައެވެ.

މި ނޫސްވެރިންގެ ބައްދަލުވުމުގައި ޝާހިދުވަނީ ޔޫއެން ޖެނެރަލް އެސެމްބްލީގެ 79ވަނަ ސެޝަންގައި ހިގައިދިޔަ އެންމެހާ ކަންކަން ވަރަށް ފުރިހަމަޔަށް ކަވަރު ކޮށްދެއްވާފައިވާތީ އެންމެހާ ނޫސްވެރިންނަށް ޝުކުރު އަދާ ކުރައްވާފައެވެ. އަދި ވިދާޅުވީ، ޔޫއެންޖީއޭގެ ދައުރު ފެއްޓެވިއިރު މުޅި ދުނިޔެ އޮތީ ކޯވިޑް ކާރިސާގެ އެންމެ ނުރައްކާތެރި ހާލަތުގައި ކަމަށާއި، އެހެންނަމަވެސް، 365 ދުވަހަށްފަހު ދައުރު ނިންމަވާލައްވާއިރު، ކޯވިޑްގެ އެހާލަތުން ދުނިޔެއަށް އަރައިގަނެވިފައިވާ ކަމުގައެވެ.

އަދި ރިޔާސަތަށް ވަޑައިގެންނެވުމަށް ކުރެއްވި ކެމްޕެއިންގައި ވައުވެ ވަޑައިގަތް 5 ވައުދުގެ މައްޗަށް ބައްލާލައްވަމުން ޝާހިދުވަނީ މިވައުދުތައް ފުއްދިފައިވާ މިންވަރުގެ މައްޗަށްވެސް މި ނޫސްވެރިންގެ ބައްދަލުވުމުގައި އަލިއަޅުއްވާ ލައްވާފައެވެ.

ޝާހިދު ވިދާޅުވި ގޮތުގައި އޭނާގެ ޔޫއެންޖީއޭގެ ރިޔާސަތުގައި ކުރިމަތުވެވަޑައިގެންނެވި އެންމެ ބޮޑު އެއް ގޮންޖެހުމަމީ، ރަޝިއާއިން ޔޫކުރެއިންގައި ހިންގަމުންދާ އުދުވާން ކަމުގައެވެ. މިގޮތުން، ވީޓޯ ކުރުމުގެ ބާރު އޮންނަ، ޔޫއެން ސެކިއުރިޓީ ކައުންސިލްގެ މެމްބަރު ގައުމުތައް މިމައްސަލާގައި ޒިންމާދާރު ކުރުވުމަށް އޭނާގެ ރިޔާސަތުގައި ކުރެވިގެންދިޔަ މަސައްކަތްތަކުގެ މައްޗަށްވެސް ތަފްސީލީ ގޮތެއްގައި ޝާހިދު ބައްލަވާލައްވާލާފައި ވެއެވެ.

މިމަހުގެ ނިޔަލަށް ޝާހިދު، ޔޫއެންޖީއޭގެ ރައީސްގެ ހައިސިއްޔަތުން އަދާ ކުރައްވަމުން ގެންދަވާ ހުރިހާ ރަސްމީ މަސްއޫލިޔައްތުތަކުން ދުރަށް ވަޑައިގަންނަވާނެއެވެ.

ޔޫއެންގެ ޖެނެރަލް އެސެމްބްލީގެ 76 ވަނަ ދައުރުގެ ރިޔާސަތު ރާއްޖޭގެ ފޮރިންގ މިނިސްޓަރ ޝާހިދު ކާމިޔާބު ކުރައްވާފައިވަނީ ފާއިތުވެދިޔަ އަހަރުގެ ޖޫން މަހުގެ 7 ވަނަ ދުވަހު ބޭއްވުނު އިންތިޚާބު 193 ގައުމު އެކުލެވޭ އާންމު މަޖިލިހުގެ 143 ގައުމުގެ ބޮޑު އަޢުލަބިއްޔަތެއް ހޯއްދަވައިގެންނެވެ.