އެތުލެޓިކްސް އެސޯސިއޭޝަން އޮފް މޯލްޑިވްސްއިން ކުރިއަށްގެންދިޔަ މައިލޯ އެސޯސިއޭޝަން ޗެމްޕިއަންޝިޕް 2022 ގެ އޯޕަން ބައިގެ އެންމެ މޮޅު ފިރިހެން އެތުލީޓުގެ މަގާމު ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ހޯދިއިރު، އަންހެން އެތުލީޓުގެ މަގާމު ރާއްޖޭގެ އެންމެ ބާރު އަންހެން ދުވުންތެރިޔާ އާއިޝަތު ހިމްނާ ހަސަން ހޯދައިފިއެވެ.
މާލެ ސިންތެޓިކް ޓްރެކުގައި މިދިޔަ ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށްދިޔަ މި މުބާރާތުގެ އެންމެ މޮޅު ފިރިހެން އެތުލީޓަކަށް ހޮވުނު ސާއިދު ވަނީ ހަތަރު ރަން މެޑެލް ހޯދާފައެވެ. އަދި އަންހެން އެތުލީޓު ހިމްނާ ވަނީ ތިން ރަން މެޑެލް ހޯދާފައެވެ.
ދިވެހި ސިފައިންގެ ކުލަބުގެ ސާއިދު ރަން މެޑެލް ހޯދާފައިވަނީ 100 މީޓަރު ދުވުމާއި، 200 މީޓަރު ދުވުމާއި، 400 މީޓަރު ދުވުމުގެ އިތުރުން ހަތަރެއް ގުނު 400 މީޓަރު ރިލޭއިންނެވެ. ސާއިދާއި އެންމެ ގާތުން ވާދަކުރީ ދިވެހި ސިފައިންގެ ކުލަބުގެ ހުސައިން ފަޒީލް ހާރޫން (ފްލޭޝް) އެވެ. އޭނާ ވަނީ 1500 މީޓަރު ދުވުމާއި 5000 މީޓަރު ދުވުމުން އެއްވަނަ ހޯދާފައެވެ.
މީގެ އިތުރުން އަންހެން އެންމެ މޮޅު އެތުލީޓު ހިމްނާ ރަން މެޑެލް ހޯދާފައިވަނީ 100 މީޓަރު ދުވުމާއި، 200 މީޓަރު ދުވުން އަދި 400 މީޓަރު ދުވުމުންނެވެ. އޭނާއާ އެންމެ ގާތުން ވާދަކުރީ އައިމިނަތު ޖައިޝާ ޖުނީޒެވެ. އޭނާވެސް ވަނީ ތިން ރަން މެޑެލް ހޯދާފައެވެ. އެއީ އަންހެނުންގެ 800 މީޓަރު ދުވުމާއި، 1500 މީޓަރު ދުވުން އަދި 5000 މީޓަރު ދުވުމުންނެވެ.
ހިމްނާ އާއި ޖާއިޝާވެސް ވަނީ ރަން މެޑެލް ހޯދި ހުރިހާ އިވެންޓަކުންވެސް މީޓު ރިކޯޑު ހަދާފައެވެ. އެހެންކަމުން ރަން މެޑެލްގެ އަދަދާއި މީޓް ރެކޯޑުވެސް އެއްވަރުވެ، ދެން މޮޅު އެތުލީޓު ހޮވީ އިންޓަނޭޝަނަލް އެތުލެޓިކްސް ސްކޯރިންއަށް ބަލައިގެންނެވެ. މި ސްކޯރިންއަށް ބަލައިގެން ކުރި ލިބުނީ ހިމްނާއަށެވެ.
މި ފަހަރުގެ މުބާރާތުގެ ފިރިހެން އެންމެ މޮޅު ޓީމަކީ ދިވެހި ސިފައިންގެ ކުލަބެވެ. އަދި އަންހެން އެންމެ މޮޅު ޓީމަކަށް ހޮވިފައިވަނީ ޓްރެކް އެންޑް ފީލްޑް އެސޯސިއޭޝަނެވެ.
