ހައްގަކާއި ނުލާ އިންސާނަކު ގަތުލު ކުރުމަކީ އެންމެ ބޮޑެތި ފާފަތަކުގެ ތެރެއިން ވާކަމެއް ކަމަށާއި، ހައްގަކާނުލާ މީހަކު މަރައިފިނަމަ، އެމީހެއްގެ ކިބައިން ޤިޞާޞް ހިފަން ޖެހޭނެ ކަމުގައި މިއަދުގެ ހުކުރު ޚުތުބާގައި ވިދާޅުވެއްޖެއެވެ.
"ނަފްސުގެ ޙުރުމަތްތެރިކަން" މިމައުޟޫޢުގެ މައްޗަށް ޚާއްސަ ކުރެވިގެންދިޔަ މިއަދުގެ ޚުތުބާގައި ބަޔާން ކޮށްފައިވާ ގޮތުގައި، މީހުން މެރުމަކީ ބޮޑުވެގެންވާ ފާފައަކަށްވި ނަމަވެސް، މިއަދުގެ މުޖުތަމަޢުން މި ބޮޑު ފާފައަށް އަރައިގަތުން ދެކެނީ ވަރަށް އާދައިގެ ކުޑަކުޑަ ފާފައެއްގެ ގޮތުގައި ކަމަށެވެ. މިގޮތުން މިއަދުގެ މުޖުތަމަޢުގައި، އެއްވެސް ރަހުމެއް، ބިރުވެރިކަމެއް ނެތި އިންސާނާ މަރާލުމަށްފަހު ދޫކޮށްލަނީ ނޫންކަން ފާހަގަކުރަމުން ޚުތުބާގައި ވިދާޅުވެފައިވަނީ، ހަނގުރާމާއިގެ ހާލަތުގައިވެސް ކުރުން ޙަރާމް ކުރައްވާފައިވާ އަމަލެއް ކަމުގައިވާ، މުޘްލާ ކުރުމުގެ އަމަލު ކަމުގައިވާ، ގުނަވަންތައް ބުރިބުރިކޮށް ވަކި ކުރަނީ ކަމުގައެވެ.
އަދި ނުހައްގުން އެންމެ ނަފްސެއްވެސް މަރާލުމަކީ ހުރިހާ އިންސާނުން މަރާލުންފަދަ ބުނައިކަން ބޮޑު އަމަލެއްކަމުގައި ކީރިތި ގުރުއާންގައި ބަޔާން ކުރައްވާފައިވާކަން ހާމަކޮށް، ޚުތުބާގައި ހާމަ ކޮށްފައިވާ ގޮތުގައި، މުއުމިނެއްގެ މައްޗަށް އަނިޔާވެރި ވުމަކީ މާތްﷲ ގެ ހަޒުރަތުގައި ވަރަށްބޮޑު ކަމެއް ކަމުގައި ޚުތުބާގައި ވިދާޅުވެފައި ވެއެވެ.
ލޮބުވެތި މުސްލިމް އަޚުންނޭވެ! ހައްގަކާނުލާ މީހަކު މަރައިފިނަމަ، އެމީހެއްގެ ކިބައިން ޤިޞާޞް ހިފަން ޖެހޭނެއެވެ.
ޚުތުބާގައި ވިދާޅުވެފައި ވެއެވެ.
ދިރިހުރުމުގެ ހައްގަކީ އިންސާނާގެ އެންމެ އަސާސީ ހައްގުކަމުގައި ބަޔާން ކުރައްވަމުން މި ހައްޤަށް ހުރުމަތްތެރިކޮށް ހިތަނީ ކިތަށް މީހުންތީ ޚުތުބާގައި ސުވާލު ކުރައްވާފައި ވެއެވެ.
الله ތަޢާލާ ހުރުމަތްތެރި ކުރައްވާފައިވާ ނަފްސުތައް ހައްޤަކާއި ނުލާ، މަރަނީ ކިތައް މީހުން ހެއްޔެވެ؟ އެންމެންގެ ލޯ މަތީގައި އަނިޔާކޮށް، މީހުން މަރަމުން ދާއިރު އަނިޔޭ ލިބޭ މީހާގެ ދިފާއުގައި އެއްވެސް ކަމެއް ނުކޮށް، ކުޅިބަލަން ތިބެނީ ކިތައް މީހުން ހެއްޔެވެ؟
ޚުތުބާގައި ސުވާލު ކުރައްވާފައި ވެއެވެ.
ޚުތުބާގައި ވިދާޅުވެފައިވާ ގޮތުގައި މިއީ ހިތުގައި ރަހުމްހުރި ކޮންމެ މީހަކު ކަރުނަ އަޅާ، ރޯންޖެހޭވަރުގެ ހިތާމަހުރި ކަމެއް ކަމުގައެވެ. އަދި އިސްލާމް ދީނާއި ބައިނަލްއަޤުވާމީ މުވާހަދާތަކުގައިވެސް އިންސާނުންގެ ފުރާނަ ހިމާޔަތްކުރުމުގެ ހައްގު ލިބިދީފައި ވާކަމުގައެވެ.
އަދި ވިދާޅުވެފައިވަނީ ހައްގަކާއި ނުލާ ގަސްތުގައި މުއުމިނަކު މަރާލުމަކީ اللهގެ އަޒާބާއި ކޯފާއާއި އެކަނލާގެ ލަޢުނަތް އެމީހެއްގެ މައްޗަށް ލެއްވިގެންވާ ކަމެއް ކަމުގައެވެ.
