މޯލްޑިވްސް ފެމިލީ ފައުންޑޭޝަންގެ ފަރާތުން ކ.ތުލުސްދޫގެ ރައްޔިތުންނަށް އަމާޒުކޮށްގެން "މިންތީގެ ތަފާތުކުރުން ނައްތާލުން" ނަމުގައި ހޭލުންތެރި ކުރުވުމުގެ ޕްރޮގްރާމެއް ކުރިއަށް ގެންގޮސްފިއެވެ.
ކ. އަތޮޅު ތަޢުލީމީ މަރުކަޒުގައި އިއްޔެ ކުރިއަށް ގެންދިޔަ މި ޕްރޮގްރާމް އަކީ މޯލްޑިވް ފެމިލީ ފައުންޑޭޝަން އާއި މާލެއަތޮޅު އަތޮޅު ކައުންސިލް އިދާރާ އާއި ތުލުސްދޫ ކައުންސިލާއި ތުލުސްދޫ އަންހެނުން ތަރައްޤީއަށް މަސައްކަތްކުރާ ކޮމިޓީ ގުޅިގެން ކުރިއަށް ގެންދިޔަ ޕްރޮގްރާމެކެވެ. މި ޕްރޮގްރާމްގައި މަޢުލޫމާތު ހިއްސާކޮށްދެއްވީ މޯލްޑިވްސް ފެމިލީ ފައުންޑޭޝަންގެ ރައީސާ، އަލްފާޟިލާ އާފިޔާ އަބްދުލް އަޒީޒެވެ.
މި ޕްރޮގްރާމްގައި މިންތީގެ ތަފާތުކުރުން ތަކާއި މިންތީގެ ތަފާތުކުރުން ނައްތާލޭވިދާނެ ގޮތްތަކާއިމެދު ފުޅާ ދާއިރާއެއްގައި މަޢުލޫމާތު ހިއްސާކުރެވުނެވެ. އަދި މިންތީގެ ތަފާތު ކުރުން މެދުވެރިވާ ސަބަބު ތަކާއި މި ތަފާތުކުރުން ނައްތާލުމަށް ހުރި ގޮންޖެހުނަތަކާއި ގުޅޭގޮތުންވެސް މަޝްވަރާކުރެވުނެވެ. އަދި ދީނީ ގޮތުން ދެ ޖިންސްގެ މީހުނަށް ލިބިދޭ ހައްގުތަކާއި އަދާކުރަންޖެހޭ ވާޖިބުތަކާއި ގުޅޭގޮތުން މަޢުލޫމާތު ފޯރުކޮށްދެއްވީ އައްޝައިހް އަބްދުލް ގާދިރްއެވެ.
ބޭނުންތެރި އެތައްމަޢުލޫމާތުތަކެއް ހިއްސާކުރެވިގެންދިޔަ މި ޕްރޮގްރާމްގައި ތުލުސްދޫ ކައުންސިލްގެ ރައީސް އަސްލަމް މޫސާގެ އިތުރުން ބައެއް ކައުންސިލް މެންބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައެއް މެންބްރުންގެ އިތުރުން ރަށުގެ މުއައްސަސާ ތަކުގެ މުވައްޒަފުންނާއި އާންމު ރައްޔިތުން ބައިވެރި ވިއެވެ. ބައިވެރިންގެ ޚިޔާލާއި، ބައިވެރިންގެ ސުވާލުތަކަށް ޖަވާބު ދިނުން މި ޕްރޮގްރާމްގެ ތެރެއިން ކުރިއަށްދިޔައެވެ.
މި ޕްރޮގްރާމާއި ގުޅޭގޮތުން ތުލުސްދޫ ކައުންސިލްގެ ރައީސް އަސްލަމް މޫސާ ވިދާޅުވީ، މިފަދަ ޕްރޮގްރާމެއް ހިންގުމަކީ އެއްގޮތަކަށްވުރެ ގިނަ ގޮތްގޮތުން ފައިދާވާވާނެ ކަމެއް ކަމުގައެވެ. އެގޮތުން އިއްޔެގެ ޕްރޮގްރާމްގައި ހިއްސާކުރެވުނު މަޢުލޫމާތު ތަކަކީ އާއިލާއެއް ބިނާކުރުމާއި ވަޒީފާގެ މާހައުލުގައިވެސް ވަރަށް ފައިދާ ކުރާނެ، ބޭނުންތެރި މަޢުލޫމާތުތަކެއް ކަމަށާއި މިފަދަ ޕްރޮގްރާމްތަކުގެ ފައިދާ ބޮޑަށް ފެންނާނީ މިފަދަ ޕްރޮގްރާމްތައް ގިނައިން ކުރިއަށް ގެންދެވިގެންކަން އަސްލަމް ފާހަކަ ކުރެއްވިއެވެ.
