ޤާނޫނު ހިންގަންވީ ރުޅި އަންނަ މީހާއާ ދެކޮޅަށް އެކަނި ނޫންކަމަށް ވިދާޅުވެ ކުރީގެ އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދު ފާޑުވިދާޅުވެއްޖެއެވެ.
އެއްޖިންސުން ގުޅުންހިންގާ ވީޑިއޯތަކެއް އާންމުވެ އެތައް ބައެއްގެ ނުރުހުން ސަރުކާރަށް އަމާޒުވެފައިވާ މިދަނޑިވަޅުގައި ޑރ.ޝަހީމްވެސް ސަރުކާރަށް ފާޑުވިދާޅުވެ ކުރެއްވި ޓްވީޓްގައި ވިދާޅުވީ، އެއް ޖިންސުން ގުޅުން ހިންގިކަމަށް ތުހުމަތު ކުރެވުނު ވަކި ފަރާތްތަކެއް ހައްޔަރުގައިތިބިކަމަށެވެ. ނަމަވެސް ދެން ތިބި ފަރާތްތައް މުޖުތަމަޢުގަ ދޫވެފައިކަމަށާއި، ނުވަތަ މަޤާމްތަކުގައިތިބިކަމަށް ޝަހީމް ވިދާޅުވިއެވެ. ޤާނޫނު ހިންގަންވާނީ އެންމެނާ މެދު އެއް ހަމައަކުންކަން ފާހަގަކުރައްވާ ޑރ.ޝަހީމް ވިދާޅުވީ، ޤާނޫނު ހިންގަންވީ ރުޅި އަންނަ މީހާއާ ދެކޮޅަށް އެކަންޏެއްނޫންކަމަށެވެ.
ޑރ.ޝަހީމް މިހެން ވިދާޅުވެފައިމިވަނީ ބަންގްލަދޭޝްގެ ޒުވާނެއްކަމަށްވާ އަލަމްގިރިއާއެކު ރާއްޖޭގެ 250އަށްވުރެ ގިނަ މީހުން އެއްޖިންސުން ގުޅުންހިންގާފައިވާކަމަށް ތުހުމަތުކުރެވޭ މައްސަލާގައި މަދު ބަޔަކު ހައްޔަރުކޮށްފައިވާތީއެވެ.
އާންމުންގެ ބޮޑެތި ފާޑުކިޔުންތަކާއި ގުޅިގެން އަލަމްގިރި ވަނީ ހައްޔަރުކޮށްފައެވެ. އަދި އޭނާއާއެކު އެއްޖިންސުން ގުޅުން ހިންގިކަމަށް ތުހުމަތުކުރެވޭ ބައެއް މީހުން ހައްޔަރުކޮށްފައި ވީނަމަވެސް، ގިނަ ބަޔަކުސަރުކާރުގެ އެކި މަޤާމުތަކުގައި އެބަތިބިކަމަށް ބައެއް ފާރަތްތަކުން ތުހުމަތުކުރެއެވެ. އަދި އެ އެންމެންގެ ވަނަވަރު ހާމަކޮށް މަޤާމުތަކުން ދުރުކޮށް ހައްގު އަދަބު ދިނުމަށްވެސް ސޯޝަލް މީޑިއާގައި ދަނީ ގޮވާލަމުންނެވެ.
އަލަމްގިރިއާއެކު ސްކޫލްތަކުގައި ކިޔަވައިދޭ މުދައްރިސުންތަކާއި، ސަރުކާރުގެ މުއައްސަސާތަކުގެ މަޤާމުތަކުގައި ތިބި މީހުން ގުޅުންހިންގިކަމަށް ބުނާ ވީޑިއޯތަކެއް ދައުރުވަމުންދެއެވެ.
މީގެ އިތުރުން އަލަމްގިރިއާއެކު އެއްޖިންސުން ގުޅުން ހިންގިކަމުގެ ތުހުމަތުގައި ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ކޮއްކޮ އަދި ޤާނޫނީ ވަކީލް ނާޒިމް ސައްތާރާއި، ނޮޅިވަރަމް ދާއިރާގެ ކުރީގެ މެންބަރު މުޙައްމަދު ނަޝީދު (ކާނަލް)އާއި ފުލުހެއް ހައްުޔަރުކޮށްފައިވާކަމަށް ފުލުހުން ބުނެފައިވެއެވެ. އަދި އެކަމުގެ ތުހުމަތުގައި އިތުރު ބަޔަކު ހައްޔަރުކުރިކަމެއް ފުލުހުން ހާމަކޮށްފައެއް ނުވެއެވެ.
