ކަޅުވަކަރު މިސްކިތާއި، ކަޅުވަކަރު މިސްކިތް ހިމެނޭ ސަރަޙައްދު މާދަމާ ހެނދުނު 10:00 ގައި ހުޅުވުމަށް ވަނީ ހަމަޖެހިފައެވެ. މިސްކިތް ހުޅުއްވައިދެއްވާނީ ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙެވެ. މިސްކިތް ހުޅުވާދުވަހަކީ ރައީސް ޞާލިހުގެ ވެރިކަމުގެ ދައުރުގެ ދެވަނަ އަހަރު ފުރޭ މުނާސަބު ދުވަސްވެސް މެއެވެ.
ހެރިޓޭޖް މިނިސްޓްރީން ވިދާޅުވީ ހެލްތު ޕްރޮޓެކްޝަން އޭޖެންސީން ދެއްވާފައިވާ އިރުޝާދާއި އެއްގޮތަށް މި އިވެންޓް ކުރިއަށް ގެންދިއުމަށް، އިވެންޓް ރޭވުމުގައި އެކިއެކި ފިޔަވަޅުތައް އަޅަމުންދާކަމަށެވެ. އެގޮތުން އިވެންޓްގައި ބައިވެރިވާ މީހުންގެ އަދަދު މަދުކުރުމަށްޓަކާ އަޅާ އެއް ފިޔަވަޅެއްގެ ގޮތުން ހުރިހާ މީޑިއާތަކަކަށް އިވެންޓް ކަވަރު ކުރުމުގެ ފުރުޞަތު ދިނުމުގެ ބަދަލުގައި މީޑިއާތަކަށް ވަގުތުން އިވެންޓްގެ ވީޑިއޯ އާއި ފޮޓޯ ލިބޭނެ އިންތިޒާމް މިހާރު ވަނީ ހަމަޖައްސާފައެވެ.
އެގޮތުން ޕީއެސްއެމް މެދުވެރިކޮށް ހުރިހާ ޓީވީ ޗެނަލްތަކަށް އިވެންޓްގެ ލައިވް، ކްލީން ފީޑް ލިބޭނެ އިންތިޒާމު ހަމަޖައްސައި، އަދި ރައީސުލްޖުމްހޫރިއްޔާގެ އޮފީހުގެ ސޯޝަލް މީޑިއާ އެކައުންޓްތައް މެދުވެރިކޮށް އިވެންޓްގެ ފޮޓޯ ވަގުތުން ލިބޭނެ އިންތިޒާމާއި، އިވެންޓްގެ އިތުރު ފޮޓޯ އިވެންޓް ނިމުމަށްފަހު ރައީސުލްޖުމްހޫރިއްޔާގެ އޮފީހުގެ ވެބްސައިޓް މެދުވެރިކޮށް ލިބޭނެ އިންތިޒާމު ވަނީ ހަމަޖައްސާފައިކަމަށް އެ މިނިސްޓްރީން ވިދާޅުވެއެވެ.
ކަޅުވަކަރު މިސްކިތް ހުޅުވުމާއި ގުޅިގެން މިސްކިތާއި މިސްކިތް ހިމެނޭ ސަރަޙައްދު އާންމުންނަށް ހުޅުވާލާނެ ގަޑިތަކާއި، އެކަމާއި ގުޅޭ އެހެނިހެން މަޢުލޫމާތު މާދަމާ ސަގާފީ ތަރިކަ ރައްކާތެރިކުރާ ޤައުމީ މަރުކަޒުން ނޫސްބަޔާނެއް މެދުވެރިކޮށް އާންމު ކުރުމަށް ވަނީ ހަމަޖެހިފައެވެ.
