އެމެރިކާގެ އޮރެގޯންގައި މިހާރު ކުރިއަށްދާ ވޯލްޑް ޗެމްޕިއަންޝިޕް އެތުލެޓިކްސް މުބާރާތުގެ 100 މީޓަރު ދުވުމުގެ ޕްރިލިމިނަރީ ބުރު ފަަހަނައަޅައި ގޮސް، ރާއްޖޭގެ އެންމެ ބާރު ދުވުންތެރިިޔާ، ހަސަން ސާއިދު ފުރަތަމަ ބުރުގައި ވާދަކޮށްފިއެވެ.
އިއްޔެ ކުރިއަށްދިޔަ ޕްރިލިމިނަރީ ބުރު ސާއިދު ނިންމީ 10.77 ސިކުންތުން ރޭސް ނިންމައިގެންނެވެ. މި ހީޓު ސާއިދު ނިންމީ ފަސްވަނައިގައި އޮވެގެންނެވެ. އެކަމަކު މިއަދު ކުރިއަށްދިޔަ ފުރަތަމަ ބުރުގެ ހީޓުގެ ފުލަށް ދިޔައީ ސާއިދެވެ. ފުރަތަމަ ބުރުގައި ސާއިދުގެ ޓައިމިން އަކީ 10.83 ސިކުންތެވެ.
ޕްރިލިމިނަރީ ބުރުގައި ސާއިދު ހިމެނުނު ހީޓުގެ ގަދަ ހަތެރެއްގައި ނިންމި އެތުލީޓުންނަކީ 10.49 ސިކުންތުން ރޭހުގެ އެއްވަނައަށް ދިޔަ ޕެރަގުއޭގެ ސެޒާ އަލްމިރޯން އާއި، 10.66 ސިކުންތުން ދެވަނައިގައި ނިންމި ތަޖިކިސްތާނުގެ އިލްދާރު އަހްމަދިއޭފް އާއި 10.68 ސިކުންތުން ތިންވަނައަށް ދިޔަ ލެބަނަންގެ ނޫރައްދީން ހަދީދްގެ އިތުރުން ހަތަރުވަނައިގައި ރޭސް ނިންމި، ބެލީޒްގެ ޝޯން ގިލްއެވެ. ބެލީޒް ޝޯން ރޭސް ނިންމީ 10.76 ސިކުންތުންނެވެ. އެއީ ސާއިދަށްވުރެ މިލި ސިކުންތުގެ ކުރިންނެވެ.
ފުރަތަމަ ބުރުގައި ސާއިދު ވާދަކުރަން ޖެހުނީ ވަރުގަދަ އެތުލީޓުން ހިމެނޭ ހީޓެއްގަ އެވެ. ސާއިދު ދުވި ފުރަތަމަ ބުރުގެ ހީޓް ދޭއްގެ އެއް ވަނަ ހޯދީ އެމެރިކާގެ ފްރެޑް ކާލީ އެވެ. އޭނާގެ ޓައިމިން އަކީ 9.79 ސިކުންތެވެ. ދެ ވަނައިގައި ނިންމި އިނގިރޭސި ދުވުންތެރިޔާ، ޒާނެލް ހިއުސް ވަނީ 9.97 ސިކުންތުން ރޭސް ނިންމައިފައެވެ.
ވޯލްޑް ޗެމްޕިއަންޝިޕަށްފަހު ސާއިދަށް ދެން އޮތީ ބައިނަލްއަގްވާމީ ދެ ގޭމްސްއެވެ. އެއީ މި މަހު ފަހުކޮޅުގައި އިނގިރޭސިވިލާތުގެ ބާމިންހަމްގައި ފަށާ ކޮމަންވެލްތު ގޭމްސް އާއި އަންނަ މަހު އަށްވަނަ ދުވަހު ތުރުކީގެ ކޮންޏާގައި ފަށާ އިސްލާމިކް ސޮލިޑާރިޓީ ގޭމްސްއެވެ.
