އދ. ފެންފުށީގައި މޫދަށް އެރި އުޅެނިކޮށް ހާލު ސީރިއަސްވި ދެ ޒުވާނުންގެ ތެރެއިން އެކަކު ދެންމެ ނިޔާވެއްޖެއެވެ.
މިއަދު ހަވީރު ފެންފުށީ ތުޑީ ސަރަހައްދުގައި މޫދަށް އެރި އުޅެނިކޮށް އައި އެރި ރާޅަކާއިއެކު ގެއްލުނު ދެ ޒުވާނުންވެސް ފެނި އެދެމީހުންނަށް ދިޔައީ ފަރުވާ ދެމުންނެވެ. ފެންފުށި މަރުކަޒުގައި ފަރުވާ ދިނުމަށްފަހު އިތުރު ފަރުވާއަށް މަހިބަދޫ ހޮސްޕިޓަލްގައި ފަރުވާ ދެމުން ދަނިކޮށް ނިޔާވީ ތ. ދިޔަމިގިލީ، އީސާ ޖުނާހު، 23، އެވެ. އަނެއް ޒުވާނާގެ ހާލުވެސް ސީރިއަސްކަމަށް އެނގިފައިވެއެވެ.
މޫދަށް އެރި އުޅުނު ހަތަރު ޒުވާނުންގެ ތެރެއިން ދެ މީހަކު ގެއްލިގެން ފުލުހަށް ރިޕޯޓުކުރީ ހަވީރު 6:00 ހާއިރެވެ. އެ ދެ މީހުން ހޯދައި އެންމެ ފުރަތަމަ ފަރުވާ ދިނީ ފެންފުށީ ހެލްތު ސެންޓަރުގައެވެ.
މިޒުވާނުން ތުޑީގައި ތިއްބަައި މޫސުން ގޯސްވެ އުދަބާނިގަނޑުގައި ޖެހުމުން ޒުވާނުން ވަނީ އެއްގަމަށް އެރުމަށް މަސައްކަތް ކޮށްފައެވެ. އެސަރަހައްދުގައި މި ޒުވާނުން ތިބީ ފޮޓޯ ނެގުމަށްކަމަށް މައުލޫމާތުލިބެއެވެ. އޭރު އެސަރަހައްދުގައި 4 ޒުވާނުން ތިއްބެވެ.
ކައުންސިލުން ލަފާކުރާ ގޮތުގައި އެ ދެ ޒުވާނުން ބޭރަށް ދަމައިގަތީ ބާނި ބޮޑުވި ވަގުތުގައެވެ.
