ދީނީ ކަންކަމުގައި ފަތުވާ ނެރުމުގެ ޙައްޤު ދީނީ އަދި ޤާނޫނީ ގޮތުންވެސް މުހައްމަދު ނަޝީދަށް ލިބިގެން ނުވާ ކަމުގައި ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.
ޑރ.އިޔާޒު މިހެން ވިދާޅުވީ ރާއްޖޭގައި ޔޯގާ ހެދުމަކީ ހަރާމްކަމެކޭ ކިޔައިގެން ސަލާމަތުގެ އައްސޭރިއަކަށް ނުދެވެނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެ ދެއްކެވި ވާހަތަކާއި ގުޅިގެންނެވެ. މިމައްސަލަ މިހާރު ފުލުހުންނަށް ހުށަހަޅާފައިވާއިރު، ގިނަ އިލްމުވެރިން ދަނީ އިލްމުވެރިންގެ ބަސް ގަބޫލުނުކޮށް ޔޯގާއާއިމެދު ބައެއް ބޭފުޅުން ނެރުއްވާ ރައުޔުތަކަށް ފާޑު ކިޔަމުންނެވެ.
ޑރ.އިޔާޒު ވިދާޅުވީ ރައީސް މުހައްމަދު ނަޝީދަކީ ރާއްޖޭގައި ދީނީ ކަންކަމުގައި ފަތުވާ ނެރުމުގެ ހައްގު ދީނީ ގޮތުންވެސް އަދި ޤާނޫނީ ގޮތުންވެސް ލިބިގެންވާ މީހެއް ނޫންކަމަށެވެ. ކޮންމެ ކަމެއްގައިވެސް ފަހުބަސް ބުނާނީ އެފަންނުގެ މީހުންނަށްވާއިރު، ދީނީ ކަންކަމުގައި ފަހުބަސް ބުނާނީ ދީނީ އިލްމިވެރިންކަމަށް ޑރ.އިޔާޒު ވިދާޅުވިއެވެ.
ކޮންމެ ކަމެއްގައިވެސް ފަހުބަސް ބުނަންވާނީ އެފަންނެއްގެ އަހްލުވެރިން. ދީނީ ކަންކަމުގައި ފަތުވާ ނެރުމުގެ ޙައްޤު ދީނީ އަދި ޤާނޫނީ ގޮތުންވެސް މުހައްމަދު ނަޝީދަށް ލިބިގެން ނުވޭ.
– ޑރ.އިޔާޒު ވިދާޅުވިއެވެ.
އެމްޑީޕީގެ 17 ވަނަ އަހަރީ ދުވަސް ފާހަގަކުރަން އެޕާޓީގެ ހަރުގޭގައި ބޭއްވި ދިދަ ނެގުމުގެ ރަސްމިއްޔާތުގައި ވާހަކަ ދައްކަވަމުން ނަޝީދު ވިދާޅުވީ، ދިވެހިންނަކީ މިނިވަންކަމާއި އުފަލުގައި އުޅެމުން އައި ބައެއް ކަމަށާއި މިއަދު ދެކެވޭ ވާހަކަތަކުން ދިވެހިންގެ ދިރިއުޅުމަށް ބުރޫ އަރާނެ ކަމަށެވެ. އެގޮތުން ނަޝީދު ވިދާޅުވީ، ރާއްޖޭގައި ޔޯގާ ހެދުމަކީ ހަރާމް ކަމެކޭ، ކަސްރަތު ކުރުމަކީ އިސްލާމްދީނާއި ހިލާފު ކަމެއް ކަމަށް ބުނެ ވާހަކަ ދައްކައި، އާންމު ދިރިއުޅުމަށް ބުރޫއަރުވަން މަސައްކަތް ފަށައިފިނަމަ ރާއްޖެ ސަލާމަތުގެ އައްސޭރިއަކަށް ނުދާނެ ކަމަށެވެ.
ނަޝީދު ވިދާޅުވީ، ގައުމުތައް ހަލާކުގެ އައްސޭރިއަށް އަދި ބާކީވެ އެކަހެރިވި މަންޒަރު ވެސް އެމަނިކުފާނަށް ފެނިފައިވާ ކަމަށާއި ރާއްޖެ އެ ހާލަތަށް ދިޔުމަށް ޖާގަ ދެވިގެން ނުވާނެ ކަމަށެވެ. އިތުރަށް ނަޝީދު ވިދާޅުވީ، ރާއްޖޭގެ ރައްޔިތުން އެދޭ ރާއްޖެ އަށް ހޯދައިދިނުމަކީ އެމްޑީޕީގެ އަބަދު ވެސް އަމާޒު ކަމަށާއި ކުރިއަށް އޮތްތަނުގައި ވެސް އެ މަގުސަދު ހާސިލުކޮށްދޭނެ ޕާޓީއަކީ އެއްވެސް ޝައްކެއް ނެތް ގޮތުގައި އެމްޑީޕީ ކަމަށެވެ.
