ރާއްޖެއަށް އާންމުކޮށް ދަތުރުކުރާ އެއަރލައިނެއް ކަމުގައިވާ ބެންކޮކް އެއަރވޭސްއިން އަލުން ރާއްޖެއަށް ދަތުރުތައް ފަށައިފިއެވެ.
ކޯވިޑްގެ ކާރިސާއާއި ގުޅިގެން މި އެއަރލައިންގެ ދަތުރުތައް މެދު ކަނޑާލުމަށްފަހު އަލުން ދަތުރުތައް ފަށާފައިވަނީ އިއްޔެއެވެ. މިގޮތުން މި އެއަރލައިނުން ހަފްތާއަކު ތިން ދަތުރު ރާއްޖެއަށް ކުރާނެއެވެ. އެއީ ހުކުރު ދުވަހާއި ހޯމަ ދުވަހާއި އަދި އަންގާރަ ދުވަހުއެވެ.
ބެންކޮކްއަކީ ރާއްޖޭގެ ރައްޔިތުން ބޭސްފަރުވާގެ އިތުރުން ވިޔަފާރީގެ ބޭނުންތަކުގައިވެސް އާންމުކޮށް ދަތުރު ކޮށްއުޅޭ ގައުމެކެވެ. އަދި ރާއްޖެއަކީ، ތައިލޭންޑުގެ ފަތުރުވެރިން ގިނަ އަދަދަކަށް ޒިޔާރަތްކުރާ މަންޒިލެކެވެ.
ކޯވޮޑް ކާރިސާއަށްފަހު، ބެންކޮކާއި ރާޖެއާއި ދެމެދު، ބަޖްޓް އެއަރލައިނެއް ކަމުގައި އެއަރ އޭޝިއާއިންވެސް ވަނީ ފާއިތުވެދިޔަ ޑިސެމްބަރުމަހު ދަތުރުތައް ފަށާފައެވެ. އެއައޭޝިއާއިން ދަނީ މިދެމެދުގައި ހަފްތާއަކު ދެ ދަތުރު ކުރަމުންނެވެ.
Excited to see @bangkok_airways back with us again! 👏🏻😁 🇹🇭✈️🇲🇻 #VelanaAirport | #AsiasBoutiqueAirline pic.twitter.com/d99tpV4xyM
— Velana Airport (@VelanaAirport) June 24, 2022
ކޯވިގެ އާލަމީ ވަބާއަށްފަހު މިހާރު ގިނަ ގައުމުތަކުގެ ބޯޑަރުތައް ހުޅުވާލާފައި ވާއިރު، ރާއްޖެ ހިމެނިގެންދަނީ ކޯވިޑާއި ދެކޮޅަށް އަޅާފައިވާ ފިޔަވަޅުތަކަށް އެންމެ ބޮޑަށް ލުއި ދީފައިވާ ގައުމުތަކުގެ ތެރޭގައެވެ. އަދި ފިޔަވަޅުތަަކަށް ލުއި ދިނުމާއެކު، ކުރިން ދަތުރުތައް މެދު ކަޑާލި އެއަރލައިންތަކުގެ ތެރެއިން 24 އެއަރލައިނަކުން މިހާރުވަނީ އަލުން ރާއްޖެއަށް ދަތުރުތައް ފަށާފައެވެ.
