ރާއްޖޭގައި ދީނީ ކަންކަން ކުރިއެރުމަށް މަސައްކަތް ކުރާ ސަލަފް ޖަމްއިއްޔާއާއި، އިދިކޮޅު އެންމެބޮޑު ޕާޓީ ޕީޕީއެމްއަކީ އެއް ވާގަނޑެއްގެ ދެކޮޅު ކަމުގައި ރޯޑް ޑިވެލޮޕްމަންޓް ކޯޕަރޭޝަން، އާރްޑީސީގެ މެނޭޖިގ ޑިރެކްޓަރ މޫސާ އަލި މަނިކު (މޫކޭ) ވިދާޅުވެއްޖެއެވެ.

އޭނާ މިހެން ވިދާޅުވީ، ބައިނަލްއަޤްވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި ބޭއްވި ޙަރަކާތަށް ހުރަސްއަޅައި ހަމަނުޖެހުން ހިންގާފައިވާތީ އެކަމުގެ ކަންބޮޑުވުންފާޅުކޮށް ކުރެއްވި ޓުވީޓެއްގައެވެ.

މޫކޭ ވިދާޅުވީ މިކަން އިންތިޒާމު ކުރުމުގައި ކަންކަން ހިނގާފައިވާ ގޮތުން ފެންނަން ހުރިކަމަށެވެ. ނަމަވެސް މިހާރު މިކަމާއި ހަވާލުވާނެ ބަޔަކުނުވެ، އެންމެންވެސް ބޯ ދަމައިގަންނަމުންދާކަމަށެވެ. އޭނާ ވަނީ މިކަމަކީ ޕީޕީއެމްއާއި، ސަލުން ގުޅިގެން ކުރިކަމެއްކަމަށް ދޭހަވާ ގޮތަަކަށް ވިދާޅުވެފައެވެ. އަދި ސަލަފް ޖަމްއިއްޔާއާއި، ޕީޕީއެމްއަކީ އެއްވާޑެއްގެ ދެކޮޅުކަމަށް މޫކޭ ވިދާޅުވިއެވެ.

ޙަވާލު ވާނެ މީހަކު ނުވި. ދީނަކާއި ދީން. ރައްޔިތަކާއި ރައްޔިތެއް. ސަލަފުގެ ފިތުނަވެރިން ގުޅި، ޕީޕީއެމް ގެ އޮފީސް ތެރެއިން ނެރުނު ސައުންޑާއި ދިދަތައް ދީގެން ހިންގި ޓެރަރިސްޓް ޢަމަލުތައް ޖަޒުބާތުގަ ނުކުތް މީހުންގެ ބޮލަށް. ސަލަފާ ޕީޕީއެމް އަކީ އެއް ވާގަނޑެއްގެ ދެކޮޅު.

– މޫކޭ ވިދާޅުވިއެވެ.

ޔޯގާ ޙަރަކާތް ހުއްޓުވުމަށް އެއްވިމީހުން ހިންގި ހަމަނުޖެހުންތަކަކީ ސިޔާސީ މަޤްޞަދެއްގައި ހިންގި ކަމެއްކަމަށް ތުހުމަތުކުރެވެމުން ދަނިކޮށް، ސޯޝަލް މީޑިއާގައި ދައުރުވާން ފެށީ އެއްވި މީހުން ބޭނުންކުރި ދިދަތަކާ އެއްގޮތް ދިދަތަކެއް ޕީޕީއެމް އޮފީހުން ނެރެމުންދާ މަންޒަރު ފެންނަ ފޮޓޯތަކެކެވެ. ފަހުން ފުލުހުން ނެރުނު ބަޔާނެއްގައިވަނީ މިހަމަނުޖެހުންތަކުގައި ބޭނުންކުރި އާލާތްތައް ނެރުނީ ޕީޕީއެމްގެ އޮފީހުންކަމަށް ވިދާޅުވެފައެވެ.

މިކަމާއި ގުޅިގެން ޕީޕީއެމްއިން މިއަދު ބުނެފައިވަނީ މިހަރަކާތަކީ އެޕާޓީއާއި އެއްވެސް ގުޅުމެއް ނެތް ހަރަކާތެއްކަމަށެވެ. އަދި މިއީ ސީދާ ސަރުކާރު އަޑީގައި އޮވެގެން ހިންގި ބޮޑު ޖަރީމާއެއް ކަމަށެވެ. މިކަން ތަހުގީގް ކުރުމުގައި ދޭންޖެހޭ ފުރިހަމަ އެއްބާރުލުން ދޭން ތައްޔާރަށް ތިބިކަމަށް ޕީޕީއެމްއިން ވަނީ ބުނެފައެވެ.

މިހަމަ ނުޖެހުމާއި ގުޅިގެން ބައެއް ފަރާތްތަކުން ސަލަފް ޖަމިއްޔާއަށް ކުރަމުންދާ ތުހުމަތުތަކާއި ގުޅިގެން ނެރުނު ބަޔާނެއްގައި ބުނެފައި ވަނީ ރާއްޖޭގައި ޔޯގާގެ ކަންކަން ހިންގަން ފެށި ހިސާބުން ފެށިގެން އަބަދުވެސް އެކަމުގެ ހުކުމާމެދު ރައްޔިތުން ހޭލުންތެރިކުރުމަށް އެ ޖަމިއްޔާއިން މަސައްކަތް ކުރަމުން އަންނަ ކަމަށެވެ. އެ ޖަމިއްޔާއިން ބުނެފައި ވަނީ މިއަދު ގަލޮޅު ދަނޑުގައި ހިންގި ހަރަކާތަކީ އެ ޖަމިއްޔާ އާއި އެއްވެސް ގުޅުމެއް އޮތް ކަމެއް ނޫން ކަމަށެވެ.