މެންޗެސްޓާ ސިޓީ އަށް ކުޅެމުން އަންނަ އިނގިރޭސި ވިންގް، ރަހީމް ސްޓާލިން ގަންނަން ޗެލްސީން މަސައްކަތް ކުރަމުން އަންނަ ކަމަށް އިނގިރޭސި މީޑިއާތަކުން ރިޕޯޓްކޮށްފިއެވެ.
ސްޓާލިން، މި ވަގުތުު ސިޓީގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. ސްޓާލިން އަށް ސިޓީގެ ފުރަތަމަ އެގާރައިން ގަވާއިދުން ފުރުސަތު ނުލިބޭތީ، އޭނާ އަންނަނީ ސިޓީ ދޫކޮށްލަން އެ ޓީމާ އެކު މަޝްވަރާ ކުރަމުންނެވެ. އެ ގޮތުން ސްޓާލިންގެ އޭޖެންޓް، އެއިޑީ ވާޑް ވަނީ މި ފަހަރުގެ ޓްރާންސްފާ މާކެޓް ފެށި ފަހުން ޓޮޓެންހަމާއި ލިވަޕޫލަށް ވެސް ސްޓާލިން ގަންނަން ހުށަހަޅައިފަ އެވެ. އެކަމަކު، އެ ދެ ކްލަބުން ނިންމީ އެ ޑީލަށް މަޝްވަރާ ނުކުރުމަށެވެ.
ޗެލްސީއިން ހާމަކުރާގޮތުގައި އެ ކުލަބަށް އޭނާ އިނގިރޭސި ޕްރިމިއާ ލީގުގައި ދެމިހުރުމަށް ޝައުގުވެރިކުރުވިދާނެއެވެ. އަދި މިއަންނަ ސީޒަނުގައި ޔުއެފާ ޗެމްޕިއަންސް ލިގުގެ ފުރުސަތު އެ ކުލަބަށް އޮތުމާއެކު، މިއީ ސްޓާލިން އެ ކްލަބަށް އައުމަށް ބާރު އެޅޭނެ އިތުރު ކަމެއް ކަމަށްވެސް ޗެލްސީން ވަނީ ހާމަކޮށްފައެވެ.
މިދިޔަ ސީޒަންގައި ސްޓާލިން ވަނީ ޕްރިމިއާ ލީގުގައި ސިޓީއަށް 30 މެޗު ކުޅެދީ ،13 ލަނޑު ޖަހާދީފައެވެ. ނަމަވެސް ޗެމްޕިއަންސް ލީގުގައި ރެއާލް މެޑްރިޑާ ބައްދަލުކޮށް ބަލިވި ސެމީ ފައިނަލްގެ ދެ މެޗްގައިވެސް އޭނާ އިނީ ބެންޗްގައެވެ. އަދި ލީގުގެ ފަހު މެޗުގައި އެސްޓަން ވިލާއާ ދެކޮޅަށް ބެންޗުން ފެށި ނަމަވެސް، ދެވަނަ ހާފްގައި ކުޅެން އަރައި އެނާ ވަނީ ލީގު ކާމިޔާބުކުމުގައި މުހިންމު ދައުރެއް އަދާކޮށްފައެވެ. އެގޮތުން ސިޓީން އެ މެޗްގައި ޖެހި ފުރަތަމަ ލަނޑު ޖަހާފައިވަނީ ސްޓާލިން ތަނަވަސްކޮށްދިން ފުރުސަތެއްގައެވެ.
