ޤައުމީ އެއަރލައިން މޯލްޑިވިއަންގެ ހިންގުން ބޮއްސުންލައިގެން، މާލީ ބޮޑެތި ގެއްލުންތަކެއް ލިބެމުން އަންނާތީ ރައްޔިތުންގެ މަޖިލީހަށް މާވަށު ދާއިރާގެ މެންބަރު މުޙައްމަދު ސަޢީދު ހުށައެޅުއްވި މައްސަލަ ބަލައިނުގަނެ ބޭރުކޮށްލައިފިއެވެ.
މަޖިލީހުގެ މިއަދުގެ ޖަލްސާއަށް ސަޢީދު ހުށައެޅުއްވި މައްސަލާގައި ވަނީ 2020 ވަނަ އަހަރު އެ މޯލްޑިވިއަންއަށް 400 މިލިއަން ރުފިޔާގެ ގެއްލުންވެފައިވާކަމަށާއި، ފާއިތުވީ އަހަރު 159 މިލިއަން ރުފިޔާގެ ގެއްލުން ވެފައިވާ ކަމަށެވެ. މިހާރުވެސް އެކުންފުނި ހިންގަމުން އަންނަނީ ފިނޭންސުން އިތުރަށް 18 މިލިއަން ނަގައިގެން ކަމަށް ސަޢީދު ހުށައެޅުއްވި މައްސަލާގައި ވިދާޅުވިއެވެ.
ކުންފުނީގެ ހާލަތު އެހާ ދަށު ދަރަޖައަކަށް ވެއްޓުމުގެ ސަބަބުން، މޯލްޑިވިއަންގެ މަތިންދާބޯޓުތަކުގައި ޓެކްނިކަލް ގޮތުން ބައިނަލްއަގްވާމީ މިންގަނޑުތަކުން ދަމަހައްޓަން ޖެހޭ އަދި ހިފަހައްޓަން ޖެހޭ ކަންކަން ނުހިފެހެއްޓި، ފަހަކަށް އައިސް މަތިންދާބޯޓުގެ ޓަޔަރު ވެސް ބަދަލުކުރަން ޖެހޭ މުއްދަތަށް ނުކުރެވި، ބައެއް ބޯޓުތަކުގެ ސްޕެއާ ނުލިބި ގްރައުންޑު ކުރުމުގެ މައްސަލަ ކުރިމަތިވާކަމަށްވެސް ސަޢީދު ހުށައެޅުއްވި މައްސަލާގައިވެއެވެ.
އެހެންކަމުން ސަޢީދު ހުށައެޅުއްވި މައްސަލާގައި ވަނީ މަތިންދާބޯޓުތަކުގައި ހުންނަން ޖެހޭ ސަލާމަތީ ކަންކަން ކަށަވަރު ކުރުމަށް ސަރުކާރަށް ގޮވާލައްވާފައެވެ.
ޤައުމީ އެއަރލައިނަށް މާލީ ބޮޑެތި ދަތިތަކަކާއި ކުރިމަތިލާންޖެހި ބަނގުރޫޓްވަމުން އަންނަކަމުގެ ބިރު އޮތްކަމުގެ ކަންބޮޑުވުން ގިނަ ބަޔަކު ދަނީ ފާޅުކުރަމުންނެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މޯލްޑިވިއަންއަށް މިދިޔަ އަހަރު އެންމެ ބޮޑު ގެއްލުމެއްވީ ދެވަނަ ކުއާޓަރުގައެވެ. އެ ކުއާޓަރުގައި އެ ކުންފުންޏަށް 99 މިލިއަން ރުފިޔާގެ ގެއްލުން ވެފައިވާއިރު އެހާ ބޮޑު ގެއްލުމެއްވީ އެ ކުއާޓަރުގައި ލިބުނު އާމްދަނީ ވަރަށް ބޮޑަށް ދަށްވުމުގެ ސަބަބުންނެވެ. މިދިޔަ އަހަރު މޯލްޑިވިއަންއަށް ލިބިފައިވަނީ 1.2 ބިލިއަން ރުފިޔާގެ އާމްދަނީއެކެވެ.
މޯލްޑިވިއަންއަށް އެންމެ ބޮޑު އާމްދަނީއެއް ލިބެނީ ޑޮމެސްޓިކް ދަތުރުތަކުންނެވެ. އެގޮތުން ރާއްޖޭގެ އެކި ހިސާބުތަކުގައި ތަރައްގީ ކޮށްފައިވާ 16 އެއާޕޯޓުގެ ތެރެއިން 13 އެއާޕޯޓަށް މޯލްޑިވިއަންއިން ދަތުރުކުރެއެވެ. ނަމަވެސް ކޮވިޑާ ގުޅިގެން ބޯޑަރު ބަންދުކޮށް، ދަތުރުފަތުރު ކުރުން ހުއްޓާލުމާ ގުޅިގެން 2020 ވަނަ އަހަރު މޯލްޑިވިއަންއަށް ބޮޑު ގެއްލުމެއް ވިއެވެ. އެ އަހަރު އެ ކުންފުންޏަށް 400 މިލިއަން ރުފިޔާގެ ގެއްލުން ލިބުނެވެ.
