އެތައް ޒަމާނެއްގެ އަމިއްލަ ވެރިކަމަކަށްފަހު، ރައީސް މައުމޫނުގެ ދިގު 30 އަހަރުގެ ވެރިކަން ނިމިގޮސް ދިވެހިން އާ ގާނޫނު އަސާސީއަކާއެކީ، މުޅިން އާ ވެރިމަކަމުގެ ނިޒާމެއް ބަލައިގަތީ 2008ވަނަ އަހަރުއެވެ. އެއަށްފަހު ދިވެހިރާއްޖެ ވަނީ ޑިމޮކްރަސީގެ މުޅިން އާ ފަތިހަކަށް ނޭވާ ލާފައެވެ.
މިގޮތުން 2008 ވަނަ އަހަރު ދިވެހިރާއްޖެއަށް ތައާރަފްވެގެން އައި މަލްޓީ ޕާޓީ ޑިމޮކްރަސީއާއެކު، ރާއްޖޭގެ އިޖުތިމާއީ އަދި ސިޔާސީ މަސްރަހުން ފެނިގެންދިޔަ އެންމެ ބަދަލަކަށް ވެގެން ދިޔައީ ރައްތުންގެ އާންމު ދިރިއުޅުމުން ފެށިގެން ގޮސް އާއިލީ ގުޅުންތަކާއި ދޭދޭ ފަރުދުންގެ މެދުގައި އޮންނަ އެކުވެރި ރަހުމަތެރި ގުޅުމާ ހަމައިންވެސް ސިޔާސީ ޕާޓީތަކުން އަދާކުރަން ފެށި ދައުރެވެ.
އަދި މީގެ އިތުރުން، ސިޔާސީ ޕާޓީތައް އުފައްދާ، ޕާޓީތަކުން ލީޑަރުން ވެރިކަމުގެ އުއްމީދުގައި ކުރަމުންދާ މަސައްކަތްތަކުގެ ތެރޭގައި، އާދައިގެ ނިކަމެތި ރައްޔިތުންގެ ނިކަމެތިކަމާއި ނުކުޅެދުންތެރިކަމުގެ ނާޖާއިޒް ފައިދާ ނަގާ، ސިޔާސީ ޕާޓީތައް މެދުވެރިވެގެން މެނުވީ އާންމު ނިމަކެތި ރައްޔިތު މީހާއަށް ހަމަޖެހުމެއް ކުރިމަގެއް ނުފެންނާނޭ ހުރިހާ ގޮތްތަކެއް މިއަދު މުޖުތަމައުގައި މިވަނީ ފުރިހަމަޔަށް ގާއިމްވެ ނިމިފައެވެ.
މިއުސޫލުގެ މަތިން ފާއިތުވެދިޔަ 13 ވަރަކަށް އަހަރު ދުވަހުގެ ތެރޭގައި ކަން ހިނގާ، އެކަންކަން އާންމު ރައްޔިތުންގެ ހިތްތަކުގައި ބިންވަޅުނެގި ދިއުމުގެ ނަތިޖާއަކަށް ވެގެން ގޮސްފައިވަނީ، ސިޔާސީ ވެރިންގެ ފަސްބައިގައި އެލިގަނެގެން މެނުވީ ކުރިމަގެއް ފެންނާން ނެތްކަމުގެ އިހުސާސްތައް ގިނަ ބަޔަކަށް ކުވެރިގެން ދިއުމެވެ.
އޭގެ ނަތީޖާއަކީ މުޅި މުޖުތަމަޢު ސިޔާސީވެ، ހެޔު ނުބައި ވަކިކުރުންވެސް ސިޔާސީ ވިސްނުމުން މެނުވީ ކުރެވޭނޭ ކަމަކަމަށް ވެގެން ނުދިއުމެވެ.
އިދިކޮޅު ސިޔާސީ ފަރާތްތަކުގެ ޒިންމާއަކީ ހަމައެކަނި ފާޑުކިޔުންތަ؟
ދުނިޔޭގެ އެހެން ގައުމުތަކެކޭ އެއްފަދައިން، އަދި ޑިމޮކްރަސީގެ އުސޫލާ އެއްގޮތަށް، އިދިކޮޅު ސިޔާސީ ފަރާތްތަކުން ސަރުކާރު ޒިންމާ ދާރު ކުރުމުގެ މަސްއޫލިއްޔަތަކީ ދިވެހިރާއްޖެ ބަލައިގެންފައިވާ ޑިމޮކްރަޓިކް ނިޒާމުގައިވެސް އެކަން އޮތް ގޮތެވެ.
އެހެންނަމަވެސް، ރާއްޖޭގައި އޮތް ޑިމޮކްރަޓިކް ނިޒާމުގެ ތެރޭގައި މި ސިޔާސަތާއި އުސޫލު ތަންފީޒު ކުރުމުގައި އޮތް ތަފާތަކީ، ފިކުރު ބަދަލުވުމުން، އޭރު ރަގަޅުކަމަށް ވަކާތު ކުރިކަންކަން ގޯސް، ކުރިން ފާޑު ކިޔަމުން އައިހައިކަމެއް ފިކުރު ބަދަލުވުމާއެކު ރަގަޅުވެ ހުދު ކާފޫރަށް ވެގެން ދިއުވެ.
އެއް މިސާލަކީ ހަމަ ކޮންމެ ވެރިކަމެއްގައިވެސް، އިނދިކޮޅު ފަރާތްތަކުން ފަނޑިޔާރުންނަށް އަމާޒުކޮށް ވިދާޅުވަމުން ގެންދަވާ ފާޑު ވިދާޅުވުންތަކެވެ. ރައީސް ޔާމިންގެ ދައުރުގައި ފަޑިޔާރު ގެތަކަށް ނުފޫޒު ފޯރުވާ، ފަނޑިޔާރުން ސިޔާސީ ވެރީންގެ މައްޗަށް ކުރަމުންދިޔަ ބޭއިންސާފު ހުކުމްތަކަށް އޭރު ދެލޯ މަރާލައިގެން ތިބި ބަރާތްތަކަށް މިއަދ ފަނޑިޔާރު ގެތަކުން ހަދާ ގޯސްތައް ފެންނާން ފެށުމެވެ.
އެހެންނަމަވެސް ފެންނާން އޮތް ހަގީގަތަކީ، ސުޕްރީމް ކޯޓުގެ ފަނޑިޔާރުން ހިފާ ހައްޔަރުކޮށް، ޖަލަށްލާ، މަޖިލިސް މެމްބަރުންގެ ގޮނޑި ގެއްލިއްޖެކަމަށް ނިންމާ، އޭރު ކުޅެވިގެންދިޔަ ހުރިހާ ސިޔާސީ ޑްރާމާއެއްވެސް ފަނޑިޔާރު ގެތަކުން ކުޅެ، ހިނގައިދިޔަހާ ބޮޑެތި ޖަރީމާތަކަށް އޭރުގެ ފަނޑިޔާރު ގެތަކުން އަމަލީގޮތުން އެއްބާރުލުން ދެމުން ދިޔައިރުވެސް، މިއަދު ފަނޑިޔާރު ގެތައް ގޯސްވެ، ފަޑިޔާރުގެތައް އިސްލާހުވާން ޖެހޭކަމަށް ގޮވާލާ ފަރާތްތައް އޭރު ހަނު ތިއްބެވިކަމެވެ.
މިއީ ރާއްޖޭގެ ސިޔާސީ ހަގީގަތެވެ. އަދި މިއުސޫލުން ހިގަމުންދާ މިފަދަ އެތައް ކަމެކެވެ. މީގެ ތެރެއިންވެސް އެންމެ ޚާއްސަ ގޮތެއްގައި ފާހަގަވާން ހުރީ ދީން ކަންކަމެވެ.
މިގޮތުން އިއްޔެވެސް މިއަދުވެސް، ވަކީން ޚާއްސަކޮށް ދީނީ ކަންކަން ސިޔާސީ ކޮށްލުމަކީ ރާއްޖޭގެ ސިޔާސީ ފަރާތްތަކުގެ އުފަލަކަށް ވެގެން ގޮސްފައިވާކަން މިއީ ކަށަވަރުވެ ޔަގީންވާން އޮތް ކަމެކެވެ.
މީގެ އެންމެ ފުރިހަމަ އެއް މިސާލެއް ފެނިގެން ދިޔައީ ދާދިފަހުން ފެންމަތިވެގެން ދިޔަ، މިސްކިތެއްގައި ބިދޭސީން ނިދާކަމަށް ބުނެ އާންމު ކުރި ވީޑިއޯއާއި ގުޅިގެން ސިޔާސީ ފަރާތްތަކުން ދާއްކާފައިވާ ވާހަކަތަކުންނާއި ކޮށްފައިވާ ޓުވީޓުތަކުންނެވެ.
މި ވީޑިއޯ އާންމު ވެގެން ދިއުމާއެކު، ރާއްޖޭގައި މަސައްކަތް ކުރާ އިންޑިއާ މީހުން މިސްކިތެއްގައި ނިދަމުންދާ ކަމަށް ބުނެ، ގިނަ ބަޔަކުވަނީ ޓުވިޓަރގައި ޝުޢޫރު ފާޅުކޮށްފައެވެ. އަދި މިއީ ސަރުކާރުން ގަސްތުގައި، މިސްކިތެއްގައި އިންޑިއާގެ ބިދޭސީން ނިދާ ކައިބޮއި ހެދުމަށް ފުރުސަތު ދިން ދިނުމެއްގެ ގޮތުގައި ސިފަކޮށް، ބައެއް ސިޔާސީ ފަރާތްތަކުން ވަނީ އިސްލާމިކް މިނިސްޓަރުގެ އިސްތިއުފާއަށްވެސް ގޮވާ ހަދާފައެވެ.
މިއީ މިހާ ހިސާބަށް ރާއްޖޭގައި الله ގެ ގެކޮޅުގެ ޙުރުމަތް ކަނޑާލުމަށް ހިންގުނު އެންމެ ފާޅުކަންބޮޑު ވިޔާނުދާ ޢަމަލް. މިކަން ހުއްޓުވަން@PoliceMv އިން ނުުކުޅުދޭނަމަ މުޅި ރާއްޖޭގެ ރައްޔިތުން ތެދުވާންޖެހޭ. ބަހާނާ ނުދައްކައި އިސްލާމިކް މިނިސްޓަރ އިސްތިޢުފާ ދެއްވާ pic.twitter.com/jIKtYq5k1i
— Mohamed Jameel Ahmed (@MJameelAhmed) June 18, 2022
އެހެންނަމަވެސް، ކަމުގެ ހަގީގަތައް ސާފު ކޮށްދިނުމުގެ ގޮތުން އިސްލާމިކް މިނިސްޓްރީން ނެރުނު ބަޔާނުގައި ވިދާޅުވެފައިވަނީ، މިސްކިތެއްގައި ބިދޭސިންތަކެއް ދިރިއުޅެމުންދަނީ ކަމަށް ބުނެ ވީޑިއޯ އާއްމުކުރި އިމާރާތަކީ ގަބުރުމަތީގައި އަޅާފައި ހުރި މިސްކިތެއްކަން އެނގިގެން ނަމާދުކުރުން ހުއްޓާލައި، މިސްކިތްތަކުގެ ދަފްތަރުން ވެސް 2017 ގައި އުނިކޮށްފައި ވާކަމުގައެވެ.
އަދި އިސްލާމިކް މިނިސްޓްރީން ބުނެފައިވަނީ މިމިސްކިތް ބަންދުކޮށްފައިވަނީ ދަރަނބޫދޫގައި އަލަށް އިމާރާތްކުރި މިސްކިތް 2017 ވަނަ އަހަރު ބޭނުންކުރަން ފެށުމާއި ގުޅިގެން ކަމުގައެވެ.
އެެހެންނަމަވެސް، ކަމުގެ ހަގީގަތަށް ބެލުމެއްނެތި، މީގެ 5 އަހަރު ކުރިން މިސްކިތެއްގެ ގޮތުގައި ބޭނުން ކުރަމުންއައި އިމާރާތުގައި ބިދޭސީން ދިރިއުޅެމުން އައި މަންޒަރު އިދިކޮޅު ސިޔާސީ ފަރާތްތަކުން އާންމު ކޮށްފައިވަނީ، އަޅުކަން ކުރުމަށް މިހާރުވެސް ބޭނުން ކުރާ މިސްކިތެއްގައި ބިދޭސީން ނިދާ، ކައިބޮއި ހަދަމުންދާ ކަމަށް ސިފަ ކުރަމުންނެވެ.
އަދި މި ވީޑިއޯ އާންމު ކުރުމާއެކު، ކަމުގެ ހަގީގަތަކަށް ބެލުމެއް ނެތެވެ. އެންމެވެސް އަވަސްވެގަތީ، ސަރުކާރަށް ހެއްދެވި ނެހެއްދެވިއަށް ގޮވާ، ސަރުކާރުން ދީން ފުޑާލައިފިކަމަށް ބުނެ، ރައީސުލްޖުމްހޫރިއްޔާގެ އާއި އިސްލާމިކް މިނިސްޓަރުގެ އިސްތިއުފާއަށް ގޮވުމަށެވެ.
ގިނަބަޔަކު ތިބީ ސިޔާސީ ޖަޒުބާތުގައި އާފިލްވެގެން!
ސިޔާސީ ޖަޒްބާތުގައި ހެޔޮ ނުބައި ވަކި ނުވުމާއި، ގަސްތުގައި ހަގީގަތް އަޅުވާލުމުގެ ސަގާފަތެއް މުޅި ގައުމުގައި އަށަގެންފައި އޮތްއިރު، މި ސަގާފަތުގެ ހަގިގީ ޝިކާރައަކަށް މިއަދު ވެގެން ގޮސްފައިވަނީ އާދައިގެން ރައްޔިތުންކަންވެސް މިފުރުސަތުގައި ފާހަގަ ކޮށްލާން ޖެހެއެވެ. ސިޔާސީ ލީޑަރުންނާއި އިސް ފަރާތްތަކުން އެބޭފުޅުންގެ ސިޔާސީ އުއްމީދުތައް ހާސިލް ކުރަމުންދަނީ ނިކަމެތި ރައްޔިތުން މަގުތަކަށް ނެރެގެންނެވެ. ރައްޔިތު މީހާ ގުރުބާން ކޮށްގެންނެވެ.
އަދި އެއަށްފަހު ބާރުތައް އަތައް އެރުމުން މަގުމަތީގައި މުޒާހިރާއަށް ނިކުތް އާންމު ރައްޔިތުމީހާ ހަމަ އެނިކަމެތިކަންމަތީގައި އުޅެން ޖެހިފައި އޮންނަކަމީ، ދުރުނޫން މާޒީގައި ރާއްޖެއިން ފެންނާހުރި ސާފު ހަގީގަތްތަކެވެ.
އަދި މި ހަގީގްތަތަކުގެ މައްޗަށް އެންމެ ބޮޑު ނިކަމެތިކަމެއް ލިބެމުން ދަނީވެސް ގައުމަށެވެ. އާދައިގެ ދިއިރުޅުމެއްގައި ދިރިއުޅެމުންދާ ނިކަމެތި ރައްޔިތުންނަށެވެ.
އެހެންނަމަވެސް ގައުމަށް ނިކަމެތިކަން ލިބެމުންދަނީ، މިއީ އުސޫލުންކަމުގައި ގިނަބަޔަކަށް ބަލައިގަނެވުމުގެ ނަތީޖާއެއްގެ ގޮތުގައި ކަމުގައި ދަންނަވާން ޖެހެއެވެ. ހާލަތު ބަދަލު ކުރުމަށްޓަކާ ގިނަބަޔަކަށް އެކީ އެއްރޫހެއްގައި މަސައްކަތް ނުކުރެވޭހާ ހިނދަކު ހާލަތު ބަދަލުވެގެން ނުދާނޭ ކަމުގައިވެސް ގަބޫލުކުރާން ޖެހެއެވެ.
