ރާއްޖޭގެ ޤައުމީ އެއަލައިން މޯލްޑިވިއަންގެ މިސްރާބު ހުރީ ބަނގުރޫޓްވުމާއި ދިމާލަށް ކަމުގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.

އަލީ ހުސެއިން މިހެން ވިދާޅުވީ ޤައުމީ އެއާލައިން ކަމަށްވާ މޯލްޑިވިއަން ހިންގާ އައިލޭންޑް އޭވިއޭޝަން ސާވިސެސް ލިމިޓެޑަށް މިދިޔަ އަހަރުވި ގެއްލުން 159 މިލިއަން ރުފިޔާއަށް އަރައިފައިވާކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދެއްކުމާއި ގުޅިގެން ކަންބޮޑުވުން ފާޅު ކުރައްވައި ކުރެއްވި ޓުވީޓެއްގައެވެ.

މެމްބަރު އަލީ ހުސެއިން ވިދާޅުވީ ރާއްޖޭގެ އެންމެ ބޮޑު އެއް ސިނާއަތް ކަމުގައިވާ ފަތުރުވެރި ކަމުގެ ފައިދާ ޤައުމީ އެއާލައިނަށް ނުހިންގެނީ އެތައް ހިންގަން ތިބި މީހުންނަށް ހިންގުމުގައި ސީރިއަސް ވާންޖެހޭ ދަރަޖަށް މައްސަލަތައް ހުރުމުން ކަމަށެވެ. މިހާރު ހިސާބުތަކަށް ބަލާއިރު ޤައުމީ އެއާލައިން އޮތީ ބަނގުރޫޓް ވުމާއި ކައިރީގައިކަމަށް އަލީ ހުސެއިން ވިދާޅުވިއެވެ.

ޤައުމީ އެއަރލައިން މިއޮށްދަނީ ބަނގުރޫޓުވުމާ ދިމާލަށް. ފަތުރުވެރި ކަމުގެ ފައިދާ މޯލްޑިވިއަންއަށް ނުނެގެނީ ހިންގުމުގައި ބޮޑެތި ސީރިއަސް މައްސަލަތަކެއް ހުރީމަ.

– އަލީ ހުސެއިން ވިދާޅުވިއެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މޯލްޑިވިއަންއަށް މިދިޔަ އަހަރު އެންމެ ބޮޑު ގެއްލުމެއްވީ ދެވަނަ ކުއާޓަރުގައެވެ. އެ ކުއާޓަރުގައި އެ ކުންފުންޏަށް 99 މިލިއަން ރުފިޔާގެ ގެއްލުން ވެފައިވާއިރު އެހާ ބޮޑު ގެއްލުމެއްވީ އެ ކުއާޓަރުގައި ލިބުނު އާމްދަނީ ވަރަށް ބޮޑަށް ދަށްވުމުގެ ސަބަބުންނެވެ. މިދިޔަ އަހަރު މޯލްޑިވިއަންއަށް ލިބިފައިވަނީ 1.2 ބިލިއަން ރުފިޔާގެ އާމްދަނީއެކެވެ.

މޯލްޑިވިއަންއަށް އެންމެ ބޮޑު އާމްދަނީއެއް ލިބެނީ ޑޮމެސްޓިކް ދަތުރުތަކުންނެވެ. އެގޮތުން ރާއްޖޭގެ އެކި ހިސާބުތަކުގައި ތަރައްގީ ކޮށްފައިވާ 16 އެއާޕޯޓުގެ ތެރެއިން 13 އެއާޕޯޓަށް މޯލްޑިވިއަންއިން ދަތުރުކުރެއެވެ. ނަމަވެސް ކޮވިޑާ ގުޅިގެން ބޯޑަރު ބަންދުކޮށް، ދަތުރުފަތުރު ކުރުން ހުއްޓާލުމާ ގުޅިގެން 2020 ވަނަ އަހަރު މޯލްޑިވިއަންއަށް ބޮޑު ގެއްލުމެއް ވިއެވެ. އެ އަހަރު އެ ކުންފުންޏަށް 400 މިލިއަން ރުފިޔާގެ ގެއްލުން ލިބުނެވެ.