ރައްޔިތުންގެ މަޖިލީހަކީ ސަރުކާރުން ބޭނުންވާހާ ކަމެއް ބޭނުން ގޮތަކަށް ކުރުމަށް އޮތް ގޮތްޕެއް ނޫންކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.
އަލީ ހުސެއިން މިހެން ވިދާޅުވީ ސަރުކާރުގެ ފަރާތުން ހުށަހެޅި ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނުގެ ބަހުސްގައި ބައިވެރިވެ ވަޑައިގެން ކުރެއްވި ބަހުސްގައެވެ. އަލީ ހުސެއިން ވިދާޅުވީ މަޖިލީހަށް ޤާނޫނުތައް ހުށަހެޅޭއިރު މަޖިލީހުގައި އެބިލަކާއި ގުޅޭ އެންމެހައި ޤާނޫނުތައް ފަސޭހައިން ފެންނަން ހުންނާނޭ ގޮތެއް ހަދަން ޖެހޭކަމަށެވެ. އަދި މަޖިލީހުގެ ރައީސް އިސްނަންގަވައިގެން މަޖިލީހުގައި ހުރި އެފަދަ ލިޔެކިޔުންތައް ފެންނަން ހުންނާނޭހެން ބެހެއްޓުމަށް ކުރާ މަސައްކަތަށް އަލީ ހުސެއިން ވަނީ ޝުކުރު ދަންނަވާފައެވެ.
އަލީ ހުސެއިންގެ ވާހަކަ މެދު ކަނޑާލުމަށްފަހު މަޖިލިސް ރައީސް ވިދާޅުވީ މިމަސައްކަތް މިހާރު ސަރުކާރަށް ތާއިރު ކުރާ މެމްބަރުންގެ މެޖޯރިޓީއާއިއެކު ހުއްޓުވާފައިވާކަމަށެވެ. މަޖިލީހުގެ މުހިންމު ޑޮކިއުމަންޓްރައް ރައްކާތެރިކޮށް، ދެމެހެއްޓުމަށް ކުރަމުންދިޔަ މަސައްކަތް ބަންޑާރަނައިބު ކުރައްވާ މަސައްކަތެއްގެ ގޮތުގައި ހަމަޖައްސުމުން މިހާރު އެމަސައްކަތް މެދު ކެނޑިފައިވާކަމަށް މަޖިލިސް ރައީސް ވިދާޅުވިއެވެ.
މަޖިލިސް ރައީސްގެ ވާހަކަތަކާއި ގުޅިގެން އަލީ ހުސެއިން ވިދާޅުވީ މަޖިލީހަކީ ސަރުކާރުން ބޭނުންހާ ކަމެއް ކުރަން އޮތް ގޮތްޕެއް ނޫންކަމަށެވެ. މަޖިލީހަކީ ޤާނޫނު ހެދުމައި، ޤާނޫނުތައް އެކުލަވާލުމުގެ އެންމެހާ ބާރުތައް އޮތް ތަނަށް ވާއިރު، އެމަސައްކަތް ނުކުރެވޭނެ ގޮތަކަށް ސަރުކާރަށް ކަންކަން ނުކުރެވޭނެކަމަށް އަލީ ހުސެއިން ވިދާޅުވިއެވެ.
މަޖިލީހަކީ ސަރުކާރުގެ ގޮތްޕެއްނޫން. ޒަމާނުއްސުރެއް މިކަން ހިނގަމުން އަންނަ ގޮތް އެބަޖެހޭ ބަދަލު ކުރަން. މިއީ އެއްގޮތަކަށްވެސް ސަރުކާރުން ބުނީމަ ސަރުކާރުން ބުނާހާ ގޮތަކަށް ކަންކަން ކުރަން އޮންނަ ތަނެއް ނޫން. މިތަނުގައި ހަމަ އޮންނާނެ އެބްޒޮލިއުޓް އޮތޯރިޓީ އޮންނާނެ ޤާނޫނު ހެދުމާއި، ކޮންސިލަރޭޓެޑް ޤާނޫނުގެ ވާޝަންތައް ހެދުމާއި، އެއްތަނަކުން ޤާނޫނު ހެދުމާއި، ޤާނޫނުތައް ދިރާސާ ކުރުމާއި، އަދި ޑްރާފްޓް ކުރުމުގެ ހުރިހާ ބާރެއްވެސް ހަގީގަތުގައި އޮންނާނީ މި ރައްޔިތުންގެ މަޖިލީހުގައި.
– އަލީ ހުސެއިން ވިދާޅުވިއެވެ.
މަޖިލީހުގެ މަސައްކަތްތަކުގެ ތެރެއަށް ސަރުކާރުގެ ނުފޫޒު ވަންނަމުންދާ ކަމުގެ ޝަކުވާ އެމްޑީޕީގެ މަޖިލިސް މެމްބަރުންވެސް ތަކުރާރުކޮށް ދަނީ ދައްކަމުންނެވެ. ނަމަވެސް ސަރުކާރުން ދަނީ އެވާހަކަތައް ދޮގު ކުރަމުންނެވެ.
