ނަމާދު ވަގުތުގައި ނަމާދު ކުރުމަކީ ހަރުކަށިކަމާ ގުޅުވޭނެ ކަމެއްނޫން ކަމުގައި ދީނީ އިލްމުވެރިޔާ އަދި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑޜ.ޝަހީމް މިހެން ވިދާޅުވީ ޔޫތު މިނިސްޓްރީގެ އިސްނެގުމަށް ސުކޫލު ޓީޗަރުންނަށް ޚާއްޞަކޮށްގެން ބޭއްވި ޕްރޮގުރާމެއްގައި ނަމާދު ގަނޑިއަށް ސަމާލުވުމަކީ ހަރުކަށި ފިކުރުގެ އަލާމާތެއްކަމަށް ކިޔައިދީފައިވާކަމަށްބުނެ ފަތުރިފައިވާ ޚަބަރާއި ގުޅިގެން ކުރެއްވި ޓުވީޓެއްގައެވެ.
ޑރ.ޝަހީމް ވިދާޅުވީ ދިވެހިރާއްޖޭގެ ޤާނޫނު އަސާސީގައި ބަޔާންވެގެންވާ ގޮތުގެ މަތިން ތަޢުލީމީ ނިޒާމު އޮންނަންޖެހޭނީ އިސްލާމްދީނަށް ލޯބި ޖެއްސުމުގެ މައްޗަށްކަމަށެވެ. އެހެން ކަމުން ނަމާދު ކުރުމަށް ބާރު އެޅުމަކީ ޒަމާނުއްސުރެ ނިޒާމުގެ ތެރޭގައި ވާރުތަވަމުން އައި ކަމެއް ކަމަށާއި، އެއީ ހަރުކަށިކަމާ ގުޅުންހުރިކަމެއް ނޫންކަމަށް ޝަހީމް ވިދާޅުވިއެވެ.
ނަމާދަކީ ކޮންމެ މުސްލިމެއްގެ މައްޗަށްވެސް ވަގުތު ކަނޑައެޅިގެންވާ ފަރުޞެއް ކަމުގައިވާއިރު، ނަމާދު ވަގުތަށް ނަމާދު ކުރުމަކީ އެއްވެސް ހާލެއްގައި ހަރުކަށި ކަމާއި ގުޅުވޭނެކަމެއް ނޫންކަމަށް، ޝަހީމް ވިދާޅުވިއެވެ. އަދި މިފަދަ މައުލޫމާތު ފެތުރުމަކީ ޢަލްމާނިއްޔަތު ކުރިއަރުވައި މުސްލިމުންގެ ޙަޔާތުން ދީން ދުރުކޮށްލަން ހިންގޭ ފިކުރީ ހަނގުރާމައިގެ ޢަލާމާތެއްކަމަށްވެސް ރާއްޖޭގައި އިސްލާމީ އިލްމު އެގުނުމަށް ގިނަ މަސައްކަތްތަކެއް ކުރައްވާ ޝަހީމް ވިދާޅުވިއެވެ.
ނަމާދަކީ ކޮންމެ މުސްލިމަކު އަދާކުރަންޖެހޭ ދީނުގެ އެންމެ މަތީ ރުކުން، ނަމާދު ވަގުތުގައި ނަމާދު ކުރުމަކީ ހަރުކަށިކަމުގެ ޢަލާމާތެއްކަމުގައި ވިސްނުވައިދޭން މަސައްކަތްކުރުމަކީ ޢަލްމާނިއްޔަތު ކުރިއަރުވައި މުސްލިމުންގެ ޙަޔާތުން ދީން ދުރުކޮށްލަން ހިންގޭ ފިކުރީ ހަނގުރާމައިގެ ޢަލާމާތެއް.
– ޝަހީމް ވިދާޅުވިއެވެ.
ހަފުތާ ރެސް"ގެ ނަމުގައި ރ.އުނގޫފާރުގައި ބޭއްވި ހަފްތާރރސް ޕްރޮގުރާމުގެ ފަސްވަނަ ދުވަހު އަމާން ވިލުންތެރި މުޖުތަމައެއް ބިނާކުރުމަށް ތައުލީމީ ދާއިރާއާއެކު މި ޝިއާރުގެ ދަށުން ބޭއްވި ސެޝަނުގައި ކުދިން ހަރުކަށި ފިކުރާ ދިމާލަށް ދާކަން ދެނެގަންނާނެ ގޮތްތަކެއް ކިޔައިދީފައިވެއެވެ.
އޭގެ ތެރޭގައި ސުކޫލު ވަގުތުގައި ނަމާދުގެ ވަގުތަށް އިސްކަންދިނުމާއި، ފުރާވަރުގެ ކުދިން ތުނބުޅި ބެހެއްޓުމާއި، އެސެމްބްލީގެ ލަވާގައި މިއުޒިކު ހިމެނޭތީ ލަވަ ނުކިޔުން ފަދަ ކަންކަން ހިމެނެއެވެ. މިކަންކަން ހިމަނައިގެން ތައްޔާރުކުރި ލިސްޓަކީ ކުރީ ކޮޅުގައި ހަރުކަށި ވިސްނުމަށް ކުއްޖަކު ދާކަން ދެނެގަންނަ އަލާމާތްތައް ކަމަށް ބުނެދީފައިވެއެވެ.
