ކީރިތި ރަސޫލާއާއި ޤުރުއާނަށް ފުރައްސާރަކް ޕީޖޭޕީގެ ތަރުޖަމާނު ދެއްކެވި ވާހަކަތައް ސަރުކާރުން ކުށްވެރި ނުކުރި މައްސަލަ ސަރުކާރުގެ ސަމާލުކަމަށް ގެނައުމަށް މަޖިލީހަށް ހުށައެޅި ކުއްލި މައްސަލަ ބޭރުކޮށްލުމުގައި ބައިވެރިވި މަޖިލީޙުގެ މެމްބަރުންނަށް ބޮޑެތި ފާޑުކިޔުން އަމާޒުވެއްޖެއެވެ.

ސޯޝަލް މީޑިއާގައި މިމެމްބަރުންނަށް ބޮޑެތި ފާޑުކިތުންތައް އަމާޒުވަމުންދާއިރު، މިވޯޓުގައި ބައިވެރިވި ވަކިވަކި ދާއިރާތަކުގެ މެމްބަރުންގެ ފޮޓޯއާއިއެކު ގިނަ ބަޔަކު ދަނީ ނުރުހުން ފާޅު ކުރަމުންނެވެ. ނުރުހުން ފާޅު ކުރަމުންދާ މީހުންގެ ތެރޭގައި ވެރިކަން ކުރާ އެމްޑީޕީގެ ބައެއް މެމްބަރުންވެސް ހިމެނެއެވެ.

ސޯޝަލް މީޑިއާގައި ފާޑުކިޔުންތައް އަމާޒުވުން މިމެމްބަރުންނަށް ބޮޑުވެފައިވާއިރު، މިމައްސަލަ މަޖިލީހުން ބޭރުކޮށްލުމަށް އެމްޑީޕީން ވަނީ ތްރީ ލައިން ވިޕެއްވެސް ނެރެފައެވެ. ނަމަވެސް މިވިޕާއި ޚިލާފްވެ ވޯޓުގައި ބައެއް މެމްބަރުން ބައިވެރިވެފައި ނުވެއެވެ. ވޯޓުގައި ބައިވެރިވި މެމްބަރުންނަށް ބޮޑެތި ފާޑުކިޔުންތައް އަމާޒުވަމުންދާއިރު، މިފަދަ މެމްބަރުންނަކީ ދީނީ އަޤީދާ ބަލިކަށި މެމްބަރުންގެ ގޮތުގައި ބައެއް ފަރާތްތަކުން ދަނީ ފާހަގަ ކުރަމުންނެވެ.

Keerithi Rasoola ﷺ ah furassaara kurevunu hindhu R Majleehun ekan kuhveri nukoh massala beyrukollumaky Islamee Rayyithun ge moonugai jehi thafaaleh! Meegen alhugandah dheyha v Hakuru dhenyya bodu beybe usool kan MDP in gengulhenee! V dhera ladhu ethi manzareh! Shame on u MDP!

— Ali Zaid (@alizaid1000) June 6, 2022

މިމެމްބަރުންނަށް ފާޑު ކިޔަމުންދާ ބޭފުޅުންގެ ތެރޭގައި ރާއްޖޭގެ ގިނަ ދީނީ ޢިލްމުވެރިންވެސް ހިމެނެއެވެ. މަޖިލީހުން މިމައްސަލަ ބޭރުކޮށްލި ސަބަބު އެމްޑީޕީގެ މަޖިލިސް މެމްބަރަކު ވަނީ މިއަދު މަޖިލީހުގައި ކިޔައިދީފައެވެ. މަޖިލީހުންމި މައްސަލަ ބޭރުކޮށްލި ކޮށްލުމާއި ގުޅިގެން މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވީ އެ މައްސަލަ ބޭރުކޮށްލީ ވިޕެއް ނެރެގެންކަމަށެވެ. އެމްޑީޕީ ޕީޖީ ގްރޫޕްގައި މިހާރު އޮތީ ސަރުކާރުގެ މެންބަރުންނަށް ބާރުކަމަށް ސިފަކުރައްވާ ބޮންޑެ ވިދާޅުވީީ، ހުރިހާ ބަދުނާމެއް އާންމުން ރައްދުކުރަނީ މަޖިލީހުގެ ރިޔާސަތަށްކަމަށެވެ. އެހެންކަމުން މިކަން އެނޫންގޮތަކަށް ހަދަންޖެހޭކަމަށް ބޮންޑެ ވިދާޅުވިއެވެ.

މި މައްސަލަ މަޖިލީހަށް ބަލައިގަތުމަށް ވޯޓަށް އެހުމުން 33 މެންބަރުންގެ އަގްލަބިއްޔަތުން ވަނީ މައްސަލަ ބޭރުކޮށްލާފައެވެ. އެ މައްސަލަ ބަލައިގަތުމަށް ވޯޓު ދެއްވީ 10 މެންބަރުންނެވެ. މިކަން ހިނގައިގެން އުޅޭތާ އެތައް އިރެއް ވީފަހުން މިއަދު ހަވީރު ދިވެހި ސަރުކާރުން މިކަން ކުށްވެރިކޮށްފައެވެ. ސަރުކާރުގެ ކުރު ބަޔާނުގައި މިކަން ކުށްވެރިކޮށް، މިކަމުގައި ޝާމިލުވި މީހުންނަށް ހަރުކަށި އަދަބު ދިނުމަށް ގޮވާލުމުގެ ބަދަލުގައި ސަރުކާރުން ވަނީ ބީޖޭޕީގެ ނިންމުމަށް މަރުހަބާ ދަންނަވާފައެވެ.

އިންޑިއާގެ ސިޔާސީ ޕާޓީއެއްކަމަށްވާ ބީޖޭޕީގެ އޮފިޝަލަކު ދެއްކި ވާހަކަތައް ކުށްވެރިކުރައްވައި ދިވެހި ސަރުކާރުން ނެރުއްވި ބަޔާނުގައި ވިދާޅުވީ، މާތްވެގެންވާ އިސްލާމްދީނުގެ މަތިވެރި އުސޫލުތަކާއި، މާތް ރަސޫލާގެ ރިވެތި އުސޫލުތަކާ ދެކޮޅަށް ހިންގާ އެއްވެސް ޢަމަލެއް ދިވެހި ސަރުކާރުން ބަލައިނުގްނަނާނެކަމަށެވެ. އަދި އެފަދަ ކޮންމެ ޢަމަލެއްވެސް އެންމެ ހަރުކަށި ޢިބާރާތުން ދިވެހި ސަރުކާރުން ކުށްވެރި ކުރާކަމަށެވެ.

ބީޖޭޕީގެ މިޢަމަލުގައި ޝާމިލުވި އޮފިޝަލަށް އެޕާޓީން ފިޔަވަޅު އަޅާފައިވާތީ ދިވެހި ސަރުކާރުން ވަނީ މަރުހަބާ ވިދާޅުވެފައެވެ.